Say Sankabalgan a Toon Nambilay ed Kapiganman

Kapitulo 85

Pananap ed Abalang

Si Jesus so magunaet a mananap tan almoen iramay mapaabeban manlingkor ed Dios. Kanian sikato so nananap tan akitongtong ed kada sakey nipaakar ed Panarian, pati saray bantog a managkasalanan. Say ontan iran totoo so onaasingger natan pian ondengel ed sikato.

Sanen naimano iya, binalaw na saray Pariseo tan eskriba si Jesus lapud piuulop to ed totoon kokonsideraen dan agmanepeg. Inmere-mere ra: “Sayan too awaten to so saray managkasalanan tan miaakan ed sikara.” Agaylay kaalangan to iya diad dignidad da! Ipapasen na saray Pariseo tan eskriba iray kabanyakan a totoo bilang dingot ed dapan da. Diad tua, inusar da so Hebreon balikas ya ‛am ha·’aʹrets, “totoo na dalin,” pian ipanengneng so pandimla ra parad saratan.

Diad biek a dapag, impasen nen Jesus so balang sakey tekep na dignidad, kaabigan, tan panangabagey. Bilang resulta, dakel ed sarayan abeba, pati saray totoon kabkabat a mangaagamil na kaugsan, so magunaet ya ontalineng ed sikato. Balet komusta so nipaakar ed pamabalaw na saray Pariseo ed si Jesus a manasagpot diad biang na saramay ikokonsidera dan agmanepeg?

Inebatan nen Jesus so isusumpa ra diad impangusar na sakey ya ilustrasyon. Sikato so nansalita manlapud dilin punto-de-vista na saray Pariseo, a singa sikaray matunong tan maligen ed simpokokan na Dios, bangta saray karimdimlan ‛am ha·’aʹrets so nisuawi tan walad kipapasen ya abalang. Ontalineng legan a sikatoy ontetepet:

“Siopa a too ed sikayo, ya walaan na sanlasus a carnero, et no nabalang so sakey ed sikara, agto tainan ed lawak so siamaplo tan siam, tan laen ton anapen so abalang, anga ed pakaromog to? Et sano aromog to la, sikato’y yan to ed abala to, a sililiket. Et sano onsabi ed abung, tiponen to so kakaaro to tan kaababay to, a kuan to ed sikara, Miliket kayo ed siak, ta aromog ko, so carnerok ya abalang.”

Insan si Jesus so nanggawa na aplikasyon ed istorya to, ya ipapaliwawa: “Kuan ko ed sikayo, ya ontan met wala naani liket ed tawen nisengeg ed sakey a managkasalanan a magbabawi, nagkalalo nen dia ed saray siamaplo tan siam a matunong a totoo, ya agda kaokolan so pagbabawi.”

Ikokonsidera na saray Pariseo so inkasikara bilang matunong tan sirin et agmankaukolan na panagbabawi. Sanen arum ed sikara so nanbalaw ed kinen Jesus duay taon ed asasakbay parad pirurungo ed saray managsingil na buwis tan managkasalanan, inkuanto’d sikara: “Agak dia linma’n manawag ed saray matonong, no ag saray managkasalanan.” Saray dilin-matunong a Pariseo, a sinmaew a makanengneng ed pankaukolan dan magbabawi, so agmangiiter na gayaga ed tawen. Balet saray tuan magbabawin managkasalanan so makapangiter.

Pian lalon idanet so punto a say kipawil na abalang a managkasalanan so sakey a sengegan parad baleg a panliket, si Jesus so angisalaysay na sananey nin ilustrasyon. Inkuanto: “Siopa so bii ya walaan na samplora a drakma, no nabalang to so sakey, ag manelsel na silew et panisan to so abung, tan anapen to a seetan anga ed naromog to? Et sano naromog to, tiponen to ray kakaaro to tan kaababay to, a kuan to, Miliket kayo ed siak, ta aromog ko so drakma ya abalang ko.”

Insan si Jesus so angiter na mipadparan aplikasyon. Intuloy ton inkuan: “Ontan met, kuan ko ed sikayo, wala so liket ed arap na saray angeles na Dios nisengeg ed sakey a managkasalanan a magbabawi.”

Agaylan makatantanda iyan maaron panagmalasakit na saray anghel na Dios parad kipawil na abalang iran managkasalanan! Nagkalautla iya lapud sarayan datin abeba, babalawen ya ‛am ha·’aʹrets so diad kaunoran et makapidasig parad kimembro ed mangatatawen a Panarian na Dios. Bilang resulta, sikara so makadampot ed sakey a posisyon ed tawen ya atagtagey nen saramay anghel a mismo! Balet imbes ya onibeg odino manlikna a sikaray memelagen, mapaabeban aapresyaen na saray anghel a sarayan makasalanan a totoo so akaarap tan akatalona ed kipapasen na bilay a manginlong ed sikaran manlingkor bilang maabagey tan mapangasin mangatatawen ya arari tan saserdote. Lucas 15:1-10; Mateo 9:13; 1 Corinto 6:2, 3; Apocalipsis 20:6.

▪ Akin ya akiulop si Jesus ed saray kabat a managkasalanan, tan anton kritisismo so inala to manlapud saray Pariseo?

▪ Panon so panmoria na saray Pariseo ed saray kabanyakan a totoo?

▪ Anton ilustrasyon so inusar nen Jesus, tan anto so naaralan tayo manlapud saratan?

▪ Akin a say gayaga na saray anghel so makatantanda?