Say Sankabalgan a Toon Nambilay ed Kapiganman

Kapitulo 84

Say Responsabilidad na Pagmaliw a Babangatan

Kayari intaynan ed abung na prominentin Pariseo, a mapatnag a sakey a membro na Sanhedrin, si Jesus so nantultuloy ya amaarap ed Jerusalem. Baleg a bilang na karaklan so tinmumbok ed sikato. Balet anto so motibo ra? Anton talaga so nalalanor ed pagmaliw a peteg a babangatan to?

Legan na panbabaroy da, binmaling si Jesus ed karaklan tan anganko ta abigla ra sanen inkuanto: “No siopaman a too ondago ed siak, et agto gulaen so ama to lanlamang, tan ina, tan asawa, tan saray anak, tan agagi a lalaki, tan bibii, on, tan say bilay to met lanlamang, ag nayari a sikato so babangatan ko.”

Anto so labay ya ibaga nen Jesus? Aglabay ya ibaga nen Jesus dia a saray patumbok to so literal a mangula ed kakanayon da. Imbes, sikaray kaukolan dan busolen diad pantalos ya aroen dan nagkalalo nen say panangaro ra ed kakanayon da. Say inmunan-ateng nen Jesus a si Jacob so nibagan ‘nangula’ ed si Lea tan angaro ed si Raquel, a kabaliksan toy inaro ton nagkalalo si Raquel nen say si agi ton Lea.

Konsideraen met, ya imbaga nen Jesus a say sakey a babangatan so kaukolan a mangula “anggan ed kamarerwa ton dili,” (NW) odino bilay. Lamet, say labay ya ibaga nen Jesus et say peteg a babangatan to so kaukolan a mangaro ed Sikato a nagkalalo nen say panangaro ra ed dilin bilay da. Idadanet sirin nen Jesus a say pagmaliw a babangatan to so sakey a seryoson responsabilidad. Satan so aliwan sakey a bengatlan alaen ya anggapoy maalwar a panangonsidera.

Say kairapan tan panamasegsegang so nalalanor ed pagmaliw a babangatan nen Jesus, a singa intuloy to impatnag: “Angan siopa ya ag to awiten so cruz [panamairapan a kiew, NW] to, tan ontombok ed siak, ag nayari a sikato so babangatan ko.” Kanian, say sakey a peteg a babangatan so kaukolan ya akaparaan a managmak na parehon awit na panamalaw a sinungdoan nen Jesus, anggan pati say, no kaukolan, ipapatey diad lima na kakabusol na Dios, ya asingger lan gawaen nen Jesus.

Say pagmaliw a babangatan nen Kristo, sirin, et sakey a bengatlan kaukolan a maalwar a nonoten a tuloy na saray karaklan ya ontutumbok ed sikato. Indanet nen Jesus iyan katuaan diad panamegley na sakey ya ilustrasyon. ‘Alimbawa,’ inkuanto, “siopa ed sikayo so, anta labay to so mamaalagey na sakey ya ilang, ag onyorong ya onona tan bilangen to so bili, no walaan kasi panumpal to ed sikato? Ompan lamang, no ingaton to la so pangipaletnegan, et ag to nayari’n sumpalen, amin a makanengneng gapoan da a balawen, A kuan da, Saya’n too angigapo a mamaalagey, et ag to ayarian a sinumpal.”

Kanian iyiilustra nen Jesus ed saray karaklan ya ontutumbok ed sikato a sakbay a magmaliw a babangatan to, sikaray nepeg a mapekder ya akatalaga a sarag dan sumpalen no anto so nalalanor, a singa sakey a toon malabay a mamaalagey na tore et seguroen ton walaan na magenap a gastosen sakbay ton igapo pian nalaos to itan. Mangitatarok na sananey nin ilustrasyon, intuloy nen Jesus:

“Ono siopa ya ari, leleg ya onla a mamakal ed sananey ya ari, ag onyorong ya onona tan ompanon no nayarian to ed sansamplo’n libo so onabet ed onsabi a mamakal ed sikato [a] duamplo’n libo? Ono andi, leleg a say sananey wala ni ed arawi, mangigangan na igagangan, tan onkerew na kipapasen na kareenan.”

Insan indanet nen Jesus so punto na ilustrasyon to, ya ibabaga: “No ontan sirin, angan siopa ed sikayo ya agto benegan so amin a kayarian to, ag nayari a sikato so babangatan ko.” Satan a bengatla a saray karaklan ya ontutumbok ed sikato, tan, on, balang sakey a makakaaral ed Kristo, so nepeg ya akaparaan dan gawaen. Sikara so nepeg ya akaparaan a mangisakripisyo’d amin a bengatla a walad sikara​—amin a kayarian da, a pati say bilay mismo—​no magmaliw iran babangatan to. Kasin sika so akaparaan a manggawa ed saya?

“Maong a kagot so asin,” intuloy nen Jesus. Diad Sermon to ed Palandey, inkuan ton saray babangatan to so “asin na dalin,” a mankabaliksan a sikaray walaan na manangipreserban impluensya ed totoo, no panon a say literal ya asin so sakey a preserbatiba. “Ingen no angan say asin naandi taway to, anto ni napangasin? Ag onnepeg ed dalin tan ed sebekan,” sinampotan nen Jesus. “Sikato so ibantak ed paway. Say walaan na layag a pandengel, ondengel komon.”

Kanian ipapanengneng nen Jesus ya anggaman saramay nagmaliw lan babangatan to ed pigaran panaon so kaukolan ya ag-onkapoy ed determinasyon dan mantultuloy. No sikaray onkapoy, sikaray magmaliw ya andi-kakanaan, sakey a panludlureyan na sayan mundo tan agmanepeg ed arap na Dios, diad tua, sakey a kababaingan ed Dios. Sirin, singa say tinmabang, arutakan ya asin, sikara so ibantak ed paway, on, naderal. Lucas 14:25-35; Genesis 29:30-33; Mateo 5:13.

▪ Antoy labay ya ibaga na “gulaen” so kakanayon tan say inkasika?

▪ Anton duaran ilustrasyon so inter nen Jesus, tan anto so kabaliksan da?

▪ Anton punto ed pansaran komento nen Jesus nipaakar ed asin?