Say Sankabalgan a Toon Nambilay ed Kapiganman

Kapitulo 83

Inabrasa na Sakey a Pariseo

Si Jesus so siansia nin wala ed abung na sakey a prominentin Pariseo tan kapkapamaabig to ed lakin manpapalarag. Legan ya iimatonan to so kakaiban bisita a mamipili na prominentin paspasen diad panangan, sikatoy angibangat na sakey a leksion ed inkamapaabeba.

“No sika so bagaan na siopaman ed sakey a bansal,” salaysay nen Jesus, “ag ka onyorong ed manonaan a yorongan; ompan wala’y sakey a too a mapagalang nen sika a binagaan to, Et say nanbaga ed sika tan ed sikato ondago ra ed sika tan kuan to ed sika. Itdan mo so saya a too na pasen; et saman la ongapo ka a sibabaing a mangala na kaonoran a yorongan.”

Kanian insimbawa nen Jesus: “Sano nabagaan ka, onla ka tan onyorong ka ed kaonoran a pasen; ta no onsabi nanbaga ed sika, kuan to ed sika, Kaaro, ompasen ka ed atagtagey: saman la nawalaan ka na galang ed arap na saray amin ya akirongo ed sika ed pananganan.” Diad impanampot, inkuan nen Jesus: “Ta amin a mamaatagey ed sikato a dili napaabeba naani; et say manpaabeba ed sikaton dili napaatagey naani.”

Sinmublay, kinatongtong nen Jesus so Pariseo ya angimbita ed sikato tan dineskribe no panon so pangitarok na sakey a panangan a walaan na peteg a merito ed Dios. “No mangawa ka na kanen ono pangdeman, agmo tawagen so saray kakaarom, angan saray agagim angan saray kakanayon mo, angan saray kaababay mo a mayaman; ompan lamang no bagaan da ka met, et sakey a gunguna so nagawa ed sika. Balet no mangawa ka na doypoan, bagaan mo so saray duruka, saray pokol, saray piley, saray bulag: Et mapalar ka naani; ta angapoy nitumang da ed sika.”

Say pangitarok na ontan a panangan parad saray duruka so mamaliket ed manangitarok ed satan lapud, singa ipapaliwawa nen Jesus ed managsankaili ed sikato, “Natumangan ka ed kioli ed bilay na saray matunong.” Say pangililitrato nen Jesus ed sayan makapatumang a panangan so angipamoria ed sakey a kaiban bisita na sananey a klasen panangan. “Mapalar naani mangan na tinapay dia ed panaria’y Dios,” inkuan na sayan bisita. Ingen, aliwan amin so peteg a mamapabli ed satan a maliket ya ilalo, a singa intuloy ya impanengneng nen Jesus ed sakey ya ilustrasyon.

“Sakey a too nangawa na baleg a pangdeman; et nanbaga ed saray dakel: Et . . . inbaki to so aripen to a mankuan ed saray binagaan, Dago kayo; ta ami bengabengatla nitaria la natan. Et sikara ya amin ginmapora a nangawa na baraan a nanbabansag, Say inmuna inkuan to ed sikato, Analiw ak na sakey ya uma, et kaukolan ko so ompaway tan sikato so nengnengen ko: Pikasik ed sika ya itepel mo ak. Et say sakey inkuanto, Analiwak na limara’n katupag a vaca, et onla ak a salien ko ra: Pikasik ed sika ya itepel mo ak. Et say sakey inkuanto, Kapangkasal ko, et kanian ag ko nayarian so ondago.”

Agaylan ataptapew a baraan! Say sakey ya uma odino ayayep so gendagendat a bibistaen sakbay a saliwen, kanian anggapo lay peteg a pankaganatan iran bistaen ni kayari to. Mipadpara, say impangasawa na sakey so agnepeg a mangamper ed sikato manlapud pangawat ed ontan ya importanten imbitasyon. Kanian diad impakadngel ed sarayan baraan, say katawan so asanokan tan ginanggan to’y aripen to:

“Ompaway ka a maganganat ed saray polong tan ed saray leet na ciudad, et yakar mo dia so saray duruka tan pokol tan bulag tan piley. Et say aripen inkuan to, Katawan, say ingangan mo agawa, et wala ni pasen. Et inkuan na Katawan ed aripen, Ompaway ka ed saray dalan tan ed saray alar, et sikara so pasooten mo ya onloob, pian napano so abung ko. . . . Angapo ed saray totoo ya binagaan so makataway na pandeman ko.”

Anton kipapasen so didiskribien na ilustrasyon? Bueno, say “katawan” a mangitatarya ed panangan so mangilalaman ed si Jehova a Dios; say “aripen” a manginanatnat na imbitasyon, si Jesu-Kristo; tan say ‘baleg a pangdem,’ say pankanawnawan napidasig parad Panarian na katawenan.

Saramay unona komon a makaawat na imbitasyon pian onlan midasig parad Panarian so, manuna ed amin, say Judion relihyoso iran pangulo ed agew nen Jesus. Anggaman ontan, impulisay da so imbitasyon. Kanian, ginmapo nagkalautla nen Pentecostes 33 K.P., sakey a komaduan imbitasyon so innatnat ed saramay lalamesen tan abeba a totoo ed nasyon na Judio. Balet agmagenap so kinmiwas pian nakompleto so 144,000 iran lugar ed mangatatawen a Panarian na Dios. Kanian nen 36 K.P., talora tan kapalduan taon ed saginonor, say komatlo tan kaunoran ya imbitasyon so innatnat ed saray ag-agalsiman ya aliwan-Judio, tan say panitipon ed saratan so nantultuloy angga ed agew tayo. Lucas 14:1-24.

▪ Anton leksion ed inkamapaabeba so imbangat nen Jesus?

▪ Panon a say sakey a managsankaili so makapangitarya na panangan a walaan na merito ed Dios, tan akin a mangitarok ed sikato na liket?

▪ Akin a saray baraan na inimbitaan iran bisita so ataptapew?

▪ Anto so ilalaman na ilustrasyon nen Jesus ed ‘baleg a pangdem’?