Say Sankabalgan a Toon Nambilay ed Kapiganman

Kapitulo 82

Amaarap Lamet si Jesus ed Jerusalem

Ag-abayag et si Jesus so wala lamet ed dalan, a manbabangat ed syudades tan saray purok. Maseguro a sikato so wala ed distrito na Perea, diad nibaliw na Ilog Jordan manlapud Judea. Balet say destinasyon to et diad Jerusalem.

Say Judion pilosopiya a mangibabagan walay ageteran lambengat a bilang na nilaban so nayarin anagdag ed sakey a laki ya ontepet: “Katawan, daise’ ta so saray nilaban?” Diad ebat to, pinilit nen Jesus iray totoo a mannonot ed no anto so nakakaukolan parad kilalaban: “Panpilitan [salanti, mipuligesgesan, odino panbanikelan] yo so onloob ed pinto a mainget.”

Say ontan a magunaet a sagpot so maganat “[lapud] dakel,” intuloy nen Jesus, “so saray manseet ya onloob, et ag da nayarian.” Akin et agda nayarian? Impaliwawa to a ‘sano say unabong so inmalagey la, tan inkapot to so pinto tan onggapo iray totoon manalagey ed paway tan ontoktok ed pinto, a kuan da, “Katawan, lukasan mo kami,” ikuan to ed sikara: Ag ta kayo kabat no taga iner kayo. Onarawi kayo ed siak, amin kayo a managgawa’y mauges!”’

Saramay akapotan so mapatnag a sinmabi ed panaon a kombeniente ed sikara. Balet diad satan et say puerta na pankanawnawa so inkapot tan inkandado la. Pian makaloob, sinmabi ira komon ya asasakbay, anggaman nayarin agkombeniente so panggawa ed satan. On, sakey a maermen a pansumpalan so manaalagar ed saramay mangipupulisay a manggawa’d panagdayew ed si Jehova a manunan gagala ra ed bilay!

Saray Judion angibakian ed kinen Jesus so, diad inkalapagan, ag-anganamot ed makapakelaw a pankanawnawa ran mangawat na probisyon na Dios parad kilalaban. Kanian imbaga nen Jesus a sikaray onnangis tan manngalatenget so kangipenan da sano sikaray nibantak ed paway. Diad biek a dapag, saray totoon manlapud “bukig tan sagur, tan manlapu ed amianen tan abalaten,” on, manlapud amin a nasyon, so “ontameg ed dulang na panarian na Dios, NW.”

Intuloy nen Jesus: “Walara so onor [pabpabandayen ya aliwan-Judio, ontan met ed lalamesen iran Judio] a sikara so onona, et walara so onaan [saray apaboran ed materyal tan ed relihyon a Judio] a naonor ira.” Say pagmamaliw dan onor et kabaliksan to a saray ontan a mangiras, anggapoy otang a linawan totoo et anggapon balot so pasen da ed Panarian na Dios.

Saray Pariseo natan so linma ed kinen Jesus tan inkuan da: “Ompaway ka, et ontainan ka dia; ta si Herodes [Antipas] labay to ka a pateyen.” Anganko ta si Herodes a mismo so angigapo ed sayan balbalita pian patakyasen si Jesus manlapud teritorya. Nayarin si Herodes so natatakot ed kilanlanor ed ipapatey na sakey lamet a propeta na Dios a singa ed say impamatey ed kinen Juan a Managbautismo. Balet imbaga nen Jesus ed saray Pariseo: “Lakayo et kuan yo ed saman a zorra, Nia, papawayen ko so saray demonio tan manambalak natan tan nabuas, et dia ed komatlo’n agew nayadyari ak.”

Kayarin sinumpal iray kimey to diman, intuloy nen Jesus so baroy to ya amaarap ed Jerusalem lapud, singa ipapaliwawa to, “ag nayari a say sakey a propeta ompatey ed paway na Jerusalem.” Akin a nepeg ya ilaloan a si Jesus so pateyen ed Jerusalem? Lapud say Jerusalem so kabiseran syudad, a kawalaan na 71-membron Sanhedrin ya atagey a korte tan pangiyaapayan na saray bagat ya ayep. Kanian, agnayari parad “Cordero’y Dios” a pateyen ed inerman noagta diad Jerusalem.

“O Jerusalem, O Jerusalem, a pateyen to so saray profeta, tan topaken to so saray nibaki ed sikato,” tagleey nen Jesus, “aminpiga a kinaliktan ko a tiponen komon so saray anak mo, onong na nganak a tiponen to so saray siwsiw to ed silong na payak to, et agmo nilabay! Nia, say abung yo natainan ed kaingewan.” Lapud pangipupulisay ed Anak na Dios, say nasyon so naukom!

Legan na pamapaarap nen Jesus ed Jerusalem, sikato so naimbitaan ed abung na sakey a manuley na saray Pariseo. Saman so Sabaton, tan sikatoy babantayan a tuloy na saray totoo, lapud wadman so sakey a lakin manpapalarag, nayarin natitipoy danum ed saray taklay tan bitking to. Tinepetan nen Jesus iramay wadman a Pariseo tan onsiano ed Ganggan, a kuanto: “Matunong kasi manambal ed agew na sabaton, ono andi?”

Anggapoy siopaman ya inmesel. Kanian pinaabig nen Jesus so laki tan sikatoy pinataynan to. Insan intepet to: “Siopa ed sikayo so walaan na asno ono vaca a naplag ed bobon, et ag to agwaten a tampol ed agew na sabaton?” Lamet, anggapoy siopaman ya inmebat. Lucas 13:22–14:6; Juan 1:29.

▪ Anto so impanengneng nen Jesus a nakaukolan parad kililiktar, tan akin a dakel so akapotan ed paway?

▪ Siopara so “onor” a magmaliw ya unaan, tan “onaan” a magmaliw ya onor?

▪ Nayarin akin ya imbaga a labay nen Herodes a pateyen si Jesus?

▪ Akin ya agmanepeg parad sakey a propeta a pateyen ed paway na Jerusalem?