Say Sankabalgan a Toon Nambilay ed Kapiganman

Kapitulo 52

Mamilagron Pinakan nen Jesus so Nilibo

Saray 12 apostol so akapangayaga ed makatantandan panagbaroy a panangipulong ed interon Galilea. Natan, ag-abayag kayari na impamatey ed si Juan, sikaray pinmawil ed si Jesus pian idalatdat iray makapakelaw ya eksperiensia ra. Diad impakaimanon sikaray naksawan tan alay dakel na totoon onsasabi tan onaalis a sengegay agda pakaakan, kuan nen Jesus: ‘Onla itayo a sikatayo lambengat ed sakey a pasen a lawak a no iner a makapanpainawa kayo.’

Sikaray linmugan ed baloto ra, nayarin asingger ed Capernaum, tan amaarap ed sakey ya arawin pasen, a mapatnag a diad bukig na Jordan diad lampas ni na Betsaida. Anggaman kuan, dakel a totoo so akanengneng ed itataynan da, tan arum so akaamta nipaakar ed satan. Sarayan amin so binmatik ya inmuna a tinunton so gilig na dayat, tan sanen ginmilig so baloto, saray totoo so wadman pian abeten ira.

Diad inyepas ed baloto tan impakanengneng ed baleg ya ulop, si Jesus so apakiwas na panangabagey lapud saray totoo so singa saray karneron andian na pastol. Kanian pinaabig tora ed sakit da tan ginapoan toran binangatan na dakel a bengatla.

Maples so inlabas na oras, tan saray babangatan nen Jesus so inmasingger ed sikato tan inkuan: “Say pasen sikato’y lawak, et say agew onngangarem la. Ibakim la ra, pian onla ra ed uma tan ed saray aldeas ed kaliberliber, tan manaliw ira na nakan da.”

Anggaman kuan, diad ebat et inkuan nen Jesus: “Itdan yo ray nakan da.” Insan, lapud amta la nen Jesus no anto so gawaen to, sinubok to si Felipe diad panamegley na impanepet ed sikato: “Iner so panaliwan tayo na tinapay pian saraya mangan ira?”

Manlapud punto-de-bista nen Filipe say situasyon so imposibli. Agayla, wadman so ngalngali 5,000 a lalaki, tan nayarin tuloy ya onsulok nin 10,000 a totoo a katekep laray bibii tan ugugaw! Inmebat si Filipe a “say tinapay a petek na duan lasus a denarios [say sakey a denarius et anap ed sanagew ed saman a panaon] ag masarag ed sikara, pian balang sakey makapangan na daiset.”

Anganko diad pangipanengneng ya imposibli so pamakan ed onman a kinarakel si Andres so nanboluntaryo: “Wala so sakey ya ugaw dia, ya wala’y limara’n tinapay to a cebada, tan duara’n sira,” tan iyaarum, “balet anto so saraya ed ontan kinarakel?”

Lapud saman so panaon na primabera, sakbay a tuloy na Paskua na 32 K.P., mabuna iray dika. Kanian impaibaga nen Jesus ed babangatan to ed totoo ya onyurong ed karikaan a grinupo na san-50 tan san-100. Inala to so limaran tinapay tan duaran sira, tinmangay ed tawen, tan binendisyonan iman. Kayari to et ginapoan ton pinisagpisag so tinapay tan inaapag-apag iray sira. Inter toraya ed saray babangatan to, ya inbunog da met ed totoo. Makapakelaw, amin a totoo so akapangan anggad sikaray naksel!

Kayari to et imbaga nen Jesus ed saray babangatan to: “Dokdok yo ray pisagpisag a sulok, pian angapo’y nadarak.” Sanen ginawa ra, pinano ra so 12 basket na saramay kera manlapud kinan da! Mateo 14:13-21; Marcos 6:30-44; Lucas 9:10-17; Juan 6:1-13.

▪ Akin a nananap si Jesus na panbokbokoran parad saray apostol to?

▪ Iner so angawitan nen Jesus ed saray babangatan to, tan akin a sinmaew so pankaukolan da na panpainawa?

▪ Sanen mansirunget la, anto so insuheri na saray babangatan a gawaen, balet panon ya inasikaso nen Jesus so totoo?