“Saray Lamot ya Agnayarin Bagoten”

SAKEY ed sankabalegan tan sankadaanan a manbibilay a bengabengatla ed mundo et saray kiew a sequoia ed California. Sarayan makapakelaw ya higante so walaay katagey a 90 metro sano matatken la tan makapanbilay na masulok a 3,000 tao-taon.

Anggaman makapakelkelaw so pakanengneng ed sakey a sequoia, say agnanengneng a panaglamot to so makapandinayew met. Say sequoia so walaan na alapirlapir a lamot a nayarin ompanat ed sakey a pasen a walay laknab na 1.2 anggad 1.6 ya ektarya. Say agaylay kalaknab na panaglamot to so mangiiter na biskeg ondelap man odino ombagyo. Posibli ni ingen ya agnaapektoan na sakey a mabiskeg a yegyeg so sakey a sequoia.

Pinili nen Arin Solomon so mabiskeg a panaglamot na sakey a kiew bilang sakey a metapora ed sakey ed saray proverbio to. “Anggapoy toon akatalindeg diad panamegley na karelmengan,” inkuanto, “balet saray maong a totoo so walaan na saray lamot ya agnayarin bagoten.” (Uliran 12:3, The New English Bible) On, saray marelmeng so walad makapasigensigen a kipapasen. Antokaman ya itatalona ra so singano agamoran da so agmanbayag, lapud insipan nen Jehova a “say ilalo na matunong sikato naani kagayagaan; balet say panalagar na marelmeng natawtaw.”​—Uliran 10:28.

Saya so sakey a pasakbay ed saramay mankuan a Kristiano, ta imbaga nen Jesus ya arum so “angapo’y lamut” ed inkasikaran dili tan nagapol. (Mateo 13:21) Niarum ni, nansulat si Pablo nipaakar ed totoon ‘nipalpalig dia tan diman tan nitektekiab ed antokaman a dagem na bangat, onong ed saray kasiliban na totoo.’ (Efeso 4:14) Panon a saya so naamper?

Singa saray lamot na sequoia ya onlalaknab a dugaruga ed mataban dalin, saray kanonotan tan kapusoan tayo so abuloyan tayon mansukimat na susto ed Salita na Dios tan mangamor manlapud ditan na manangiter-bilay a danum. Saya so ontulong ed sikatayo pian paaligwasen so sakey a pananisian linmamot a tuloy. Siempre, nalikas tayoray epekto na mabagyon subsubok. Ompan sikatayo ni ingen so natenyeg, a singa ed sakey a kiew, ed arap na saray kairapan. Balet no say pananisia tayo so nilamot a maong, napaneknekan tayo a nawalaan na “saray lamot ya agnayarin bagoten.”​—Ipareng so Hebreos 6:19.