Say Sankabalgan a Toon Nambilay ed Kapiganman

Kapitulo 51

Panagpatey Legan na Ponsia ed Agew-na-inkianak

Kayari na impangiter na bilibilin ed saray apostol to, imbaki nen Jesus ira ed teritorya a sanpaparis. Anganko et saray sanagin Pedro tan Andres so naniba, ontan met ed si Santiago tan si Juan, Felipe tan Bartolome, Tomas tan Mateo, Santiago tan Tadeo, tan Simon tan Judas Iscariote. Saray anemiran paris na ebanghelisador so mangiyabawag na maong a balita na Panarian tan manggawa na mamilagron panagpaabig inerman so laen da.

Kaleganan to, si Juan a Managbautismo so wala ni’d pangawan. Sikato so wadman a ngalngalin duay taon la natan. Nayarin nanonotan mo ni a si Juan so mapublikon angiyabawag a mauges parad si Herodes Antipas so pangala ed kinen Herodias, ya asawan bii na agi ton si Felipe, bilang asawa to. Lapud ibabaga nen Herodes Antipas a tutumboken toy Mosaikon Ganggan, manepeg lambengat ya iwalwal nen Juan iyan makaluguran a panamong. Kanian impaipangaw nen Herodes si Juan, nayarin diad pananogsog nen Herodias.

Amoria nen Herodes Antipas a si Juan so sakey a matunong a too tan ondedengel ni ingen ed sikato tekep na gayaga. Kanian, kuso-kuso si Herodes no anto so gawaen to ed saya. Diad biek a dapag, kagula nen Herodias si Juan tan lawas a manaanap na paraan pian sikatoy napapatey. Kaunoran, say pankanawnawa ya aalagden to so sinmabi.

Ag-abayag kayari na Paskua na 32 K.P., si Herodes so anguksoy na baleg a selebrasyon na agew-na-inkianak to. Atipon ed ponsia so amin ya atagey-ranggon opisyal tan opisyal na armada, ontan met ed saray manunan totoo na Galilea. Legan na pantutultuloy na labi, si Salome, say malangwer ya anak a bii nen Herodias ed datin asawa ton si Felipe, so imbakin onsayaw parad saray bisita. Saray lalakin manbabantay so nangayagan tuloy ed impansayaw to.

Si Herodes so apaliket a tuloy ed si Salome. “Kerew ka ed siak na antokaman a labay mo, et sikato’y iter ko ed sika,” inkuanto. Sikato ni ingen so nansamba: “Antokaman ya kerewen mo ed siak, iter ko’d sika, angan say kapaldua na panarian ko.”

Sakbay ya onebat, si Salome so pinmaway pian ipanon ed kinen ina to, “Antoy kerewen ko?” intepet to.

Sinmabin siansiay pankanawnawa! “Say olo nen Juan a Bautista,” so inyebat nen Herodias ya anggapoy suyat.

Tampol a si Salome so pinmawil ed kinen Herodes tan nanggawa na kerew: “Labay ko ya iter mo’d siak natan so olo nen Juan a Bautista ed sakey a lipong [bandihado, NW].”

Si Herodes so agonigon a tuloy. Ingen lapud ta arengel na saray bisita to so samba to, sikato so ambaing ya agmangiter ed satan, anggaman saya so mankabaliksan na pamatey ed sakey ya inosenten too. Sakey a manangidapo so tampol a minandaan ed pangawan tekep na masebeg iran bilin to. Ag-abayag et sikatoy pinmawil ya awit so ulo nen Juan ed sakey a bandihado, tan inter to ed kinen Salome. Sikato natan so angawit ed satan ed kinen ina to. Sanen arengelan na saray babangatan nen Juan so agawa, sikara so linma tan inekal so laman to tan inponpon itan, tan insan imbaga so pamaakaran ed kinen Jesus.

Saginonor, sanen nadngelan nen Herodes so pamapaabig ed totoo tan pamapapaway nen Jesus na saray demonyo, sikato so atalagnaw, natatakot ya ompan si Jesus so diad kapetegan et si Juan a pinaoli. Manlapud saman, pilalek ton tuloy so makapinengneng ed kinen Jesus, aliwan pian ondengel ed panagpulong to, noagta pian naamtaan no kasin walay rason odino anggapo so itakot to. Mateo 10:1-5; 11:1; 14:1-12; Marcos 6:14-29; Lucas 9:7-9.

▪ Akin a si Juan so walad pangawan, tan akin ya aglabay nen Herodes a sikatoy ipapatey?

▪ Panon a diad kaunoran et nipapatey nen Herodias si Juan?

▪ Kayari na impatey nen Juan, akin a labay nen Herodes a nanengneng si Jesus?