Say Sankabalgan a Toon Nambilay ed Kapiganman

Kapitulo 50

Panagparaan Pian Arapen so Panamasegsegang

Kayari na impanbilin ed saray apostol to ed paraan na panangipakurang na panagpulong a kimey, pinasakbayan nen Jesus ira manlapud saray sumusumpa. Inkuanto: “Nia, ibaki takayo a singa carnero ed nanleleetan na saray lobos . . . Et manlikas kayo ed saray totoo; ta isaklang da kayo naani ed saray concilio, tan leweten da kayo naani ed saray sinagogas da; On, tan niakar kayo naani ed arap na saray macaoley tan arari nisengeg ed siak.”

Anggaman ed graben panamasegsegang ya arapen na saray patumbok to, impaseguron insipan nen Jesus: “Ingen sano idongo da kayo, agkayo mapaga no panon ono anto’y salitaen yo: ta niiter naani ed sikayo so salitaen yo ed satan ya [oras]. Ta aliwa’n sikayo so mansalita, noag say Espiritu nen Ama yo so mansalita ed sikayo.”

“Et,” intuloy nen Jesus, “say agi yawa’to naani agi to ed ipapatey, tan say ama yawa’to so anak to: tan saray anak onsumpa ra ed saray kaatengan da, tan sikara so papatey da naani.” Inyarum to: “Gulaen da kayo naani na saray amin a katooan nisengeg ed ngaran ko: et bang say mansongdo ya anga ed kasampotan, sikato lanlamang naani so nilaban.”

Say panagpulong so walaan na manunan kaimportantian. Lapud saya et indanet nen Jesus so pankaukolan parad inkamakabat pian makapansiansian bulos a mangipakurang ed kimey. “Ingen sano usil-usilan da kayo ed saya a ciudad, onbatik kayo ed sananey,” inkuanto, “ta kuan ko ed sikayo, Agyo ni nakar [nakumpleto, NW] ya amin [so sirkito na, NW] ciudades na Israel, anga ed isabi Anak na too.”

Tua ya inter nen Jesus iyan bilin, pasakbay, tan panamaseseg ed saray 12 apostol, balet saraya met so ginagala parad saramay mibiang ed sankamundoan a panagpulong kayari na ipatey tan kioli to. Saya so ipapanengneng diad panamegley na pangibabaga to a saray babangatan to so ‘gulaen na amin a katooan,’ aliwan saray Israelita lambengat a saray apostol so angibakian a pulongan. Nagkalalo ni, mapatnag a saray apostol so agtinawag ed arap na saray gobernador tan arari sanen imbaki ira nen Jesus ed maganon panagpulong a kampanya ra. Niarum ni, saray mananisia so agpinatey ed saman na saray membro na pamilya ra.

Kanian diad pangibabagan saray babangatan to so agmakakumpleto ed sirkito ra a panpupulongan “anga ed isabi Anak na too,” si Jesus so mapropetikon mangibabaga ed sikatayo a saray babangatan to so agmakakumpleto ed sirkito ed interon panaayaman a dalin na panagpulong nipaakar ed niletneg lan Panarian na Dios sakbay a say niglorian Arin Jesu-Kristo so onsabi bilang manamatey ya opisyal nen Jehova ed Armagedon.

Diad pangitutuloy to ed saray bilibilin to ed panagpulong, inkuan nen Jesus: “Say sakey a babangatan aliwan atagey nen say managbanga’ to, tan say aripen ag met atagey nen say katawan to.” Kanian nepeg ya ilaloan na saray patumbok nen Jesus a makaawat na parehon panag-maltrato tan panamasegsegang a singa naawat to diad panangipulong na Panariay Dios. Ingen insimbawa to: “Agyo takotan so saray mamatey na laman, ya agda met nayarian a pateyen so kamarerwa: takotan yo ingen so samay makayarin mamatey na laman tan say kamarerwa ed infierno [Gehenna, NW].”

Si Jesus so mangiletneg na ehemplo ed sayan pamaakaran. Sikato so anggapoy takot a nansungdo ed ipapatey imbes ya ikompromiso so katooran to ed samay Sakey a walaan na amin a pakapanyari, si Jehova a Dios. On, si Jehova so makapangangga na “kamarerwa” na sakey (a kabaliksan na saya iray arapen ya ilalo na sakey bilang mabilay a kamarerwa) odino imbes et paoliey too pian pangayagaan so andi-anggaan a bilay. Agaylan maaro, maabagey a mangatatawen ya Ama si Jehova!

Ontumbok et pinaseseg nen Jesus iray babangatan to na sakey ya ilustrasyon a mangipapabitar na maaron panagtalima nen Jehova ed sikara. “Ag ta nalako so duaran anuyaw ed sakey a kuarta [sinsilyon melag so balor to, NW]?” intepet to. “Et ag napelag naani sakey ed sikara ed dalin no ag yabuloy nen Ama yo? Et angan saray buek na olo yo abilang ira ya amin. Ag kayo antakot sirin; ta mamabli kayo nen saray amayamay ya anuyaw.”

Say mensahe na Panarian ya inganggan nen Jesus ed saray babangatan to ya ipulong so mangapag-apag na sankaabungan, lapud arum a membro na pamilya so mangawat tan arum so mangipulisay ed satan. “Agyo isipen a linmaak dia’n mangiter na kareenan,” inkuanto. “[Siak so linma pian mangipasen na, aliwan kareenan,] no ag ingen sakey a kampilan.” Sirin, parad sakey a membro na pamilya a mangawat na katuaan na Biblia, satan so mankakaukolan na inkakpel. “Say mangaro ed ama ono ina ya nagkalalo nen say siak ag makana’d siak,” inkuan nen Jesus, “tan say mangaro ed anak a laki ono bii ya nagkalalo nen say siak ag makana ed siak.”

Diad pangisasampot ed bilibilin to, impaliwawa nen Jesus a saramay mangawat ed saray babangatan to so mangawat met ed sikato. “Tan siopaman a mamainum naani ed sakey ed sarayan ankekelankit ya ugugaw na san-vaso [lambengat] a danum ya ambetel, ed ngaran na sakey a babangatan, tua kuan ko’d sikayo, ya ag to naani nabalang so tumang to.” Mateo 10:16-42.

▪ Antoran pasakbay so inter nen Jesus ed saray babangatan to?

▪ Anton panamaseseg tan ligliwa so inter to ed sikara?

▪ Akin a saray bilin nen Jesus so onaplika met ed saray modernon-agew a Kristiano?

▪ Diad anton pamaakaran a say babangatan nen Jesus so agbabaleg nen say katawan to?