Say Sankabalgan a Toon Nambilay ed Kapiganman

Kapitulo 47

Saray Lua so Nagmaliw a Baleg a Liket

Sanen anengneng nen Jairo imay bii ya apaabig ed panpaparala, say talek to ed mamilagron pakapanyari nen Jesus so anggapoy duaruwan apabiskeg. Asasakbay ed saman ya agew, kinerew nen Jairo ed si Jesus ya onla tan tulongan so inadaro ton anak a biin mantaon na 12, a ngalngali lan ompatey. Natan, anggaman ontan, say tatakotan a tuloy nen Jairo so agawa. Legan a si Jesus so mitotongtong ni ed samay bii, pigaran lalaki so sinmabi tan makalkalnan angibaga ed kinen Jairo: “Say anak mon bii inatey la. Akin et sagpoten mo ni Managbangat?”

Agaylan makapasinagem a balita iman! Isipen labat: Sayan laki, a rerespetoen a tuloy ed komunidad, so natan et sigpot lan pakaskasi legan a nakakabatan toy impatey na anak ton bii. Anggaman ontan, nadngel nen Jesus so tongtongan. Kanian, diad iyaarap ed kinen Jairo, makapaseseg ya inkuanto: “Ag ka antakot, manisia ka labat.”

Inulop nen Jesus imay toon naeermenan a papawil ed abung to. Sanen sikaray akasabi, nalmoan day baleg ya ungol na pannanangis tan pandadageyem. Sakey ya ulop na totoo so nantitipon, tan dadapmegen day inkasikara lapud kaermenan. Sanen akaloob si Jesus, intepet to: “Akin et mangawa kayo na ungol, tan manangis kayo? Say ugaw ag inatey, balet naugip.”

Diad impakadngel ed saya, saray totoo so ginmapon manludlurey a panelekan si Jesus lapud amta ra a samay ugaw so peteg lan inatey. Anggaman ontan, imbaga nen Jesus a sikatoy nanaugip lambengat. Diad panguusar to na inter-Dios a pakapanyari, ipanengneng to a saray totoo so napaoli a singa kainomay na panbangon ed sikara manlapud maidlep ya ugip.

Pinapaway nen Jesus natan so amin a wadman likud di Pedro, Santiago, Juan, tan say ina tan ama na inatey ya ugaw. Sarayan lima natan so impila to ed pandukdukolan na ugaw. Eegnaan ed lima to, inkuan nen Jesus: “Talʹi·tha cuʹmi,” a nipatalos a kabaliksan toy: “Marikit, kuan ko ed sika, Onalagey ka.” Tan tampol a samay ugaw a bii so binmangon tan ginmapon manakar! Diad impakanengneng ed saman et ngalngalin naandi’d kanonotan iray ateng to lapud baleg a liket.

Kayari na impangibilin a say ugaw so naikdan na naakan, inganggan nen Jesus ed kinen Jairo tan say asawa to ya ag-ibaga ed siopaman so agawa. Balet anggaman ed imbaga nen Jesus, say balita nipaakar ed satan so kinmayat ed interon rehyon. Saya so komaduan impamaoli a ginawa nen Jesus. Mateo 9:18-26; Marcos 5:35-43; Lucas 8:41-56.

▪ Anton balita so naawat nen Jairo, tan panon a sikatoy pinaseseg nen Jesus?

▪ Anto so kipapasen sanen akasabi ra ed abung nen Jairo?

▪ Akin ya imbaga nen Jesus a samay inatey ya ugaw so nanaugip lambengat?

▪ Siopa iramay limara a kaiba nen Jesus ya akatasi ed impamaoli?