Say Sankabalgan a Toon Nambilay ed Kapiganman

Kapitulo 48

Itataynan ed Abung nen Jairo tan Idadalaw lamet ed Nasaret

Say agew so nagmaliw ya okupado parad kinen Jesus​—sakey ya inpambaroy ed dayat manlapud Decapolis, say impamaabig ed biin manpaparala, tan impamaoli ed anak a bii nen Jairo. Balet say agew so agni asumpal. Mapatnag a legan na itataynan nen Jesus ed abung nen Jairo, duaran bulag a lalaki so manuptumbok ed beneg, ya onkekelyaw: “Kasian mo kami, sika Anak nen David.”

Diad panatawag ed kinen Jesus bilang “Anak nen David,” sarayan lalaki so diad ontan et mangibabalikas na pananisia a si Jesus et mananawir ed trono nen David, sirin et sikato imay insipan a Mesias. Anggaman ontan, si Jesus so singa mangibabaliwala ed saray nangis da parad tulong, nayarin pian suboken so inkagunaet da. Balet saray lalaki so agsinmuko. Sikara so tinmumbok ed kinen Jesus ed tutuloyan to, tan sanen sikatoy akaloob ed abung, sikatoy tinumbok da ed loob.

Diman et intepet nen Jesus: “Sisiaen yo a saya nayarian ko’n gawaen?”

“On, Katawan,” mataletalek ya inyebat da.

Kanian, diad panidiwit ed saray mata ra, inkuan nen Jesus: “Onong na pananisia yo nagawa ed sikayo.” Tamtampol sikara la so makanengneng! Insan mapeget ya imbilin to ed sikara: “Nengnengen yo ya angapo’y makapikabat a too.” Balet napno na gayaga, imbaliwala ra so ganggan nen Jesus tan nansalita na nipaakar ed sikato ed interon baley.

Kaleganay itataynan na sarayan lalaki, saray totoo so angiyakar na sakey a lakin aselepan na demonyo a pinaemel na saman a demonyo. Pinapaway nen Jesus imay demonyo, tan tampol a ginmapon nansalita imay too. Mankelaw iray ulop ed sarayan milagro, a kuanda: “Ag balot anengneng so onia dia ed Israel.”

Wadman met iray Pariseo. Agda nibaliwala iray milagro, balet diad marelmeng ya agda panisia et inulit day pamapalsa ra no iner so lapuan na saray makapanyarin kimey nen Jesus, ya ikuakuan: “Papawayen to so saray demonios lapu’d pakayari na makaoley na saray demonios.”

Ag-abayag kayari na sarayan agawa, si Jesus so pinmawil ed niyanakan ton baley a Nasaret, a natan et kaiba iray babangatan to. Ngalngalin sakey taon ed asasakbay, sikato so binmisita ed sinagoga tan nanbangat diman. Anggaman saray totoo diad inmuna et mankelaw ed makaingganyo iran salita to, diad saginonor et sikara so naopendi ed saray bangat to tan sinali ran sikatoy pateyen. Natan, tekep na panangasi, sinali lamet nen Jesus a tulongan iray datin kakaabay to.

Bangta diad arum a lugar et momongkogen na totoo si Jesus, dia et mapatnag ya andi. Kanian, diad Sabaton, sikato so linma ed sinagoga pian manbangat. Maslak ed saramay akarengel ed sikato so mankelaw. “[Iner] so angalaan na sayan too na kakabatan, tan saraya’n makapanyari a gawa?” tepet da. “Aliwa ta’n saya man so anak na panday [karpentero, NW]? Say ina to ag ta manngaran na Maria? tan, saray agi to Santiago, tan Jose tan Simon tan Judas? Tan saray agi to a bibii andi ta ra dia ya amin ed sikatayo? [Iner] sirin so angalaan na saya’n too ed sarayan amin a bengatla?”

‘Si Jesus so sakey lambengat a taga dia a kapara tayo,’ ikakatunongan da. ‘Anengneng min sikatoy binmaleg, tan kabat mi so pamilya to. Panon a magmaliw a sikato imay Mesias?’ Kanian anggaman ed amin ya ebidensya​—say baleg a kakabatan tan saray milagro to—​sikatoy impulisay da. Lapud maapit a pikakabat da, anggan saray mismon kakanayon to so agapol ed sikato, a sengegay impangibaga nen Jesus a: “Say profeta aliwa’n angapo so galang to, noag dia ed baley to’n dili tan dia ed abung to’n dili.”

On, pankelawan nen Jesus so kakulangay pananisia ra. Kanian sikatoy agnanggawa na antokaman iran milagro diman likud ed pangitapew na saray lima to ed pigaran mansasakit a totoo tan paabigen ira. Mateo 9:27-34; 13:54-58: Marcos 6:1-6; Isaias 9:7.

▪ Diad panatawag ed si Jesus bilang “anak nen David,” anto so ipapanengneng na saramay bulag a lalaki a panisiaan da?

▪ Anton salaysay parad saray milagro nen Jesus so nanmedmeran na saray Pariseo?

▪ Akin a mapangasin tuloy parad kinen Jesus so ipawil pian tulongan iramay walad Nasaret?

▪ Anton panangawat so aresibi nen Jesus ed Nasaret, tan akin?