Say Lapuan na Ag-onsaew a Pakpel

“SAKEY a manonin tanol so biglan amatunda ed sikami. Insan, manlapud sakey a tanamanan ed nikawigi mi et duaran manok ya akabuskag iray payak da so binmatik a mamaarap ed sikami. Diad arap mi et wadman so duaran iknol ed sakey a melag a kotkot. Saray manok so angamper ed sikami pian agmi nagatinan so obong da. Kada salien miy onasingger pian retratoen so makaroyroyo iran iknol a batekan na kolor-de-kape, uuliten na saray manok so pamapagyaw da. ‘Agaylay pakpel da,’ so naisip mi.”

Saman so eksperiensia na apatiran susto la’d edad diad iyaasingger ed obong na batekan a dikkop. Sakey a mas melag a manok et say blacksmith plover. Diad libron Everyone’s Guide to South African Birds, onia so salaysay na saray ornitologon Sinclair tan Mendelsohn: “Saray mangiiknol iran paris so magunaet a manalimbeng ed obong tan saray sisiw da tan magmaliw ya agresibon tuloy ed iyasingger na siopaman ya onsalta. Sikaray agnatatakot ed kabaleg na onsalta tan sikaray ontektekkiab a paatagey a manonin masebeg, andi takot ya ontaboy anggan diad totoo ed gunaet a pasakbayan ira.”

Arum so nanbantay ed ankakabaleg ya elepanti ya agsigagalan nanakar a mamaarap ed obong na sakey a blacksmith plover, a sengegay pamasakbay na manok. Gendagendat a saray elepanti so naobligan ombaling ed sananey a direksyon.

Iner so akalaan na saray manok na ontan a pakpel? Satan so manlalapud Sakey ya amalsa ed sikara. Inikdan nen Jehova a Dios irayan ankelag a palsa na nisipor a mekanismo pian saray babaleg ya ayep so naamper a maneral ed saray obong da odino siwsiw da.

Sakey a Leksion Parad Kristianos

Makaaral iray Kristiano na sakey a leksion manlapud saya, anggaman labay dan palampasan so nisipor a pakpel da. Sikaray nakekerew a mangalig ed Katawan da, si Jesu-Kristo, ya andi-takot a tinmulok ed saray ganggan na Dios. (Hebreos 12:1-3) Kokondenaen na Biblia iray matakot ya onsener ed panlingkor ed Dios. (Hebreos 10:39; Apocalipsis 21:8) Diad parehon bekta, natatalosan nen Jehova so ag-ayadyarin inkatibukel tayo tan amta to a nayarin no maminsan et sikatayo so mankasalanan odino onkulang ed nakaukolan a pakpel pian gawaen a sigpot so linawa to. (Salmo 103:12-14) Anto so nagawaan na sakey a too no say takot so pansesengegan na itunda to ed panggawa na maptek?

Say sakey a Kristiano so nepeg a sipipikasin onbaling ed Dios parad biskeg pian naarap iray subok tan pian makapantultuloy a manggawa ed madibinon linawa. Walad Biblia iyan nailaloan a sipan ya itulong nen Jehova: “Sikato mangiter na pakayari ed makapuy; et saman so andian na pakapanyari sikato so parakelan to na biskeg. Angan saray ugugaw onkapuy ira tan nakesawan ira, tan saray tobonbalo parokol ira naani a sigpot; balet saray manalagar ed Jehova pasimbaloen to so biskeg da. Mamaatagey ira naani ya akapayak a singa say aguila. Ombatik ira naani, tan ag ira nakesawan; manakar ira naani, tan ag ira onkapuy.” (Isaias 40:29-31) Dakel ya ag-ayadyarin totoo so makakaeksperiensia ed katuaan na sarayan salita tan ‘akalara na biskeg ed kakapuyan da.” (Hebreos 11:34) Sakey a maabig ya alimbawa et say Kristianon apostol a si Pablo, a nansulat: “Say Katawan akisanawat [nantanyareg, NW] ed siak, tan pinabiskeg to ak; pian dia ed panamegley ko, say panagpulong nagawa komon a maabig, tan pian dengelen na saray amin a Gentil.”​—2 Timoteo 4:17.

Anggan saray balo-balo nin interesado a malabay a magmaliw a patumbok nen Jesu-Kristo so makakaeksperiensia na ontan a tulong na panamabiskeg. Konsideraen pa so sakey a laki ed Abalaten ya Aprika a manngaran na Henry, a tresurero na iglesia to tan manaayam ed kaabay na ayaman na pastor to. Si Henry so manaanap ed katuaan. Anggaman ed siglaotan to ed iglesia, sakey ya agew et inawat to so opresin libren panangiyaral na Biblia ed ayaman a kaibay Tastasi nen Jehova. Asabi panaon, imbalikas to so pilalek ton magmaliw a sakey a Tasi tan intepet to no antoray kundang a nepeg ton dampoten parad satan a kalat. Nisalaysay ya unona et kaukolan toy onekal manlapud relihyon to. (Apocalipsis 18:4) Lapud say pastor so kaabay tan kaaro to, liknaen nen Henry ya aglabat basta mansulat na itaynan to balet kaukolan ton isalaysay so pamaakaran ya arap-arapan. Saya so sipapakpel a ginawa to.

Abigla so pastor tan diad ag-abayag et intagar so moderator tan arum niran membro na iglesia pian bisitaen si Henry. Labay dan amtaen no akin a tinaynan to so relihyon da pian magmaliw a membro na sakey a relihyon ya, unong ed sikara et andian na masanton espiritu na Dios. “Diad inmuna et siak so natatakot ya onebat ed sikara,” so insalaysay nen Henry, “lapud sikaray naynay a walaan na baleg ya impluensya ed siak. Balet nampikasi ak ed si Jehova parad tulong, tan ginawa ton niparungtal ko iyan panangidepensa: ‘Diad amin ya internasyonal iran relihyon, siopa lambengat so manguusar na ngaran na Dios, a Jehova? Agta saray Tasi nen Jehova? Kasin isipen yo a paulyanan ira na Dios a mangakbibit ed ngaran to tan diad ontan et agto ra ikdan na masanton espiritu to?’” Saray opisyal na iglesia so ag-akasuppiat ed ontan a panagkatunongan. Lapud pisadsalamat ed pikakabat tan biskeg ya itatarok na Dios, si Henry la natan so sipapakpel a mibibiang ed Tastasi nen Jehova ed pankabkaabungan a ministeryo.

On, say pagmaliw a tuan Kristiano et kakaukolanen to so pakpel. Legan a sayan mundo so manasingger ed anggaan to, ondaak iray subok ed pananisia. Labay nen Satanas ya ekalen so makapakelaw ya ilalo na ariripen na Dios ya andi-anggaan a bilay diad panggugunaet a buyaken so katooran da ed si Jehova. (Ipareng so Apocalipsis 2:10.) Balet nepeg ya agtayo onsuko. Anggan sikatayo so manirap ed temporaryon patit lapud takot, sikatayo so natulongan nen Jehova pian makainawa. Mantultuloy a manilalo ed sikato parad biskeg pian makapansiansian manggawa ed linawa to. Tandaan, sikato ya amalsa ed andi-takot iran manok so Lapuan na ag-onsaew a pakpel. On, saray tuan Kristiano so nepeg “ya ibaga a mataletalek: Say Katawan [Jehova, NW] sikato so mananulong ko; agak naani ontakot: Anto so nayarin gawaen ed siak na too?”​—Hebreos 13:6.