Kareenan ed Nonot ed Sosyedad a Walaay Kompetinsiaan
“NO SIOPAMAN a too [so] labay to’n sikato’y unaan,” sinimbawa nen Jesu-Kristo iray apostol to, “sikato so kaonoran naani ed amin, tan aripen na amin.” Saray apostol so nansasangsangan no siopa so sankabalgan ed limog da. Kabat da a kadimla nen Jesus so onman ya espiritu. Agton balot impanlalaslasan iray babangatan to bilang paraan pian iyalibansa so espiritual ya aligwas.—Marcos 9:33-37.
Sakbay a linma dia ed dalin, si Jesu-Kristo so akibiang ed panamalsa ed ununan sanasawa tan kabat to no panon so inkagawa ra. (Colosas 1:15, 16) Saray inmunan too so pinalsa a walaan na pakayarin onaligwas ya anggapoy pikokompetinsiaan ed arum. Agnakaukolan a manlalaban so katooan pian naamtaan no siopa so ulo ra, nisay sikara so milaslasan ed ayayep ed pipupuligesgesan para’d kililiktar.—Genesis 1:26; 2:20-24; 1 Corinto 11:3.
Say Lapuan na say Espiritu na Pikokompetinsiaan
Panon, sirin, a nagmaliw a manodominan puersa so andiay-panangasin espiritu na pikokompetinsiaan ed sosyedad na too? Say inmunan kaso na impamatey ed awaran na too so mangipapaumameng. Say espiritu na pikokompetinsiaan ed biang nen Cain, say sankapanguloanan ya anak a laki na inmunan sanasawa, so angitonton ed trahedya. Pinatey nen Cain so agi ton Abel lapud say bagat nen Abel so amaliket ed Dios, bangta say bagat nen Cain so andi. Tan ibabaga na Biblia a si Cain so “betang na maramsak, tan pinatey to so agi to.”—1 Juan 3:12; Genesis 4:4-8.
On, say marelmeng a sakey, si Satanas a Diablo, so nanlapuan tan promotor na espiritu na pikokompetinsiaan. Anggaman sikatoy sakey ya anghelikon anak na Dios a walaan na atagey a pribilihyo, nagkalalo ni so kaliktan to. (Ipareng so Ezequiel 28:14, 15.) Sanen pinalikdo to si Eva, impatnag to so dilin pilalek to. Inkuanton diad pangan ed isesebel a bunga et sikato so ‘[magmaliw] a singa Dios.’ (Genesis 3:4, 5) Diad tua, si Satanas so manlabay a magmaliw a singa Dios, ya akilaslasan ed si Jehova. Say espiritu na pikokompetinsiaan ed Dios so amakiwas ed sikaton manrebelde.—Santiago 1:14, 15.
Sayan espiritu so makaalis. Diad silong na impluensya nen Satanas, say inter-Dios a kareenan ed orihinal ya oksuyan na pamilya so naandi. (Genesis 3:6, 16) Nanlapulad impanrebelde to sumpad Dios, inuleyan la nen Satanas so katooan, ya iyaalibansa to so espiritu na kompetinsiaan, a mamapalikdo ni ingen ed saray lalaki tan bibii ed panisian say andiay-panangasin kompetinsiaan so tombok ed itatalona. Anggaman ontan, ipapaliwawa na Biblia: “No iner so kawalaan na imon tan panangibiig, diman so kawalaan na golo tan amin a marumsis a gawa.” (Santiago 3:14, 16) Diad ontan sasamsaman nen Satanas so too na liket tan kareenan ed nonot to.
Itatalona ya Anggapoy Kompetinsiaan
Miduma ed panatangguyor nen Satanas, say Biblia so mangiiter na saray alimbawa na intalona ya anggapoy kompetinsiaan. Say manunaan et say diad kinen Jesu-Kristo. Anggaman onkikiwas ed inka-Dios, agton balot ninonot a mipara ed Dios noagta inala to so nengneng na aripen tan linmeksab ed dalin. Nagkalalo ni ed satan, inpaabeba to so inkasikato tan nagmaliw a matulok anggad patey ed panamairapan a kiew. Sayan awawey na katutulok, ya andian na antokaman ya espiritu na pilalaslasan, so angitonton ed impakagamor to na madibinon abobon. “Kanian say Dios met sankatageyan so impangidayew to ed sikato, tan inter to ed sikato so ngaran ya analonggaring ed amiamin a ngaran.” (Filipos 2:5-9) Anton babaleg ya itatalona so nadampot na siopaman a pinalsa? Pinaliket to so Ama to ed laknab ya agnagawaan na arum a pinalsa, tan saya so ginawa to ya andian na antokaman ya espiritu na pilalaslasan odino kompetinsiaan.—Uliran 27:11.
Saray dakel a matoor ya anghel ed tawen so mangipapanengneng na sayan parehon awawey. Anggaman si Jesus, a manunaan na saray anghel, so nagmaliw a samet ya abebbeba nen say sikara sanen linma dia ed dalin, sikaray sibubulos a nanserbi ed saray pankaukolan to. Malinew, agda ninonot so panganamot ed kipapasen tan salien a sikatoy sandian bilang Arkanghel.—Mateo 4:11; 1 Tesalonica 4:16; Hebreos 2:7.
Say impangiwaklit da ed saray awawey na pikokompetinsiaan so nagkalalo nin mapatnag sano kunsideraen tayo so paraan na inkiwas da ed gagala na Dios pian itandoro so pigaran ag-ayadyarin too ed andiay-ipapatey ya espiritun bilay, a diad satan a kipapasen sikaray “mangukom ed saray anghel.” (1 Corinto 6:3, NW) Saray anghel so walaan na daakan ya eksperiensia ed panaglingkor ed si Jehova tan walaan na nagkalalon abilidad ed panggawa na maabig nen say ag-ayadyarin katooan. Siansia, saray anghel so malikeliket a manlilingkor ed saray alanaan ed dalin, ya agbalot mangiimon ed no anto so awaten na saraya. (Hebreos 1:14) Say maabig, andiay-pikokompetinsiaan ya awawey da so nanggawa ed sikaran mantultuloy a manlingkor ed arap na trono na Soberanon Katawan a Jehova.
Insan, isipen iray inmunan matoor ya ariripen na Dios a napaoli ed dalin. Si Abraham so matalonggaring ya alimbawa na pananisia tan tinawag ya “ama na amin day manisia.” (Roma 4:9, 11) Si Job so angipanengneng na sankaabigan ya alimbawa na panagsungdo. (Santiago 5:11) Si Moises, a “maoyamon toloy ed saray amin a lalaki ya wala ed tapew na dalin,” so angiwanwan ed nasyon na Israel ed kawayangan. (Numeros 12:3) Siopa ed limog na ag-ayadyarin totoo so angipanengneng na mas maabig ya alimbawa na pananisia, panagsungdo, tan kaoyamoan nen say sarayan lalaki? Anggaman ontan, sikaray akalinyan manawir bilang mangaraldalin a sakop na Panarian na Dios. (Mateo 25:34; Hebreos 11:13-16) Sikara, singa si Juan a Managbautismo, so ilinya ed silong na “kamelamelagan ed panariay tawen.” (Mateo 11:11) Kasin sikaray manreklamo, ya ipilit a say pananisia, panagsungdo, odino kaoyamoan da so mipara odino diad arum a kipapasen et alampasan da nira man so naikdan na bilay ed tawen? Seguradon andi! Sikaray magmaliw a maliket a mangaraldalin ya uuleyan na Panarian na Dios.
Anggan natan, met, saray totoon andiay mikokompetinsiaan ya awawey so makapaliket a nakaiba. Si Yasuo, ya asalambit ed inmunan artikulo, so nilereg ed utang lapud pipapalaran ed balitok tan naupot ya amin so kayarian to. Sikato’y inkaindan na “kakaaro” to. Lapud say asawa to so ginmapon manaral na Biblia ed saray Tasi nen Jehova, sikato so inmatendi ed saray miting da lapud pagbabawi ed intarok ton paniirap na pamilya to. Kaunoran, inwaklit to la so pikokompetinsiaan tan nagmaliw a sakey ed saray Tasi nen Jehova. Natan sikato so maliket a kalimog na Kristianon kakaaro, kakaaron mabulos ya ontulong ed sikato ed panaon na gonigon.
No Panon a Napansiansia so Kareenan ed Nonot
Aliwan lawas mainomay so pamasiansia na kareenan ed nonot ed sakey ya andiay-panangabagey, mikokompetinsiaan a sosyedad. Kabkabat tayo a kokondenaen na Biblia so “panbobosolan, pankokolkol, imon, sanok, pansesepakan, inkaapagapag, saray pamikpikewet ed pananisia, saray sibletan” bilang “gawa na laman” a manesebel ed totoo manlapud pakatawir na Panarian na Dios. Amin na sarayan kimey so kaantabay na espiritu’y pikokompetinsiaan. Agpankelawan si apostol Pablo so amaseseg ed saray taga Galacia: “Ag itayo komon mapaagum ed maapan dayew, a pasanoken so sakey tan sakey, a mansisibletan so sakey tan sakey.”—Galacia 5:19-21, 26.
Diad sayan konteksto, impanengneng na sulat nen Pablo so tombok ed panalona na makasarilin kompetinsiaan. Inkuanto: “Balet say bunga na Espiritu sikato so aro, liket, deen, kasungdoan, kaoyamoan, kaabigan, sisia, tayadno, dangka. Angapo so gangan ya onsumpa ed sarayan nengneng.” (Galacia 5:22, 23) Say bunga na espiritu so ontutulong ed sikatayo pian punasen ed kanonotan tayo so pilalaslasan. Kunsideraen, alimbawa, so kalidad ya aro. “Say aro manangitepel,” ipapaliwawa nen Pablo. “Say aro ag to ipasirayew so inkasikato, aliwa’n mapangta, aliwa’n mabanday so kagagawa to, ag to anapen so kien to, ag manpasnok.” (1 Corinto 13:4-7) Diad pamayubo na aro, naekal tayo so imon, say manamakiwas a puersa ed espiritu na kompetinsiaan. Say arum nin bunga na espiritu so ontutulong met ed sikatayo pian linisan so kapusoan tan kanonotan tayo manlapud saray natitilak a bakat na andiay-panangasi, espiritu na kompetinsiaan. Siempre, tekep na dangka, antokaman ya onlesan panpilalek a mikompetinsiaan sumpad arum pian manalo ed antokaman a paraan so magano lan naamper!—Uliran 17:27.
Anggaman ontan, pian nabayuboan irayan kalidad, nepeg tayon abuloyan a pakiwasen so espiritu na Dios ed sikatayo. Napaligsa tayo iyan mabunigas a kiwas na masanton espiritu diad pantultuloy a panpikasi tan ikerew na masanton espiritu na Dios pian natulongan itayo. (Lucas 11:13) Bilang ebat ed pikakasi tayo, anto so ipagamor na Dios ed sikatayo? Onebat so Biblia: “Ag kayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Cristo Jesus.”—Filipos 4:6, 7.
Saya so mapatnag ed kipapasen na saray apostol nen Jesus. Anggan kayari na impangigapo nen Jesus ed Pangdem na Katawan ed unor a labi a kaiba toray apostol, sikara nin siansia so mansasangsangan no siopa so magmaliw a sankabalgan. (Lucas 22:24-27) Pigaran danay met nen Jesus a sinali ton sikaray tulongan pian ipetek so kanonotan da, balet sayan awawey na pikokompetinsiaan so nigalet a tuloy ed sikara. (Marcos 9:34-37; 10:35-45; Juan 13:12-17) Anggaman ontan, bektaman ya inawat da so masanton espiritu ngalngali 50 ya agew kayari na saman a sangsangan, anguman so awawey da. Anggapo so sangsangan nipaakar ed no siopa so mangilaman ed sikara ed pansalita ed maupapet ya ulop a nantitipon ed saman ya agew na Pentecostes.—Gawa 2:14-21.
Anggapo so pasen para’d siopaman a mandomina ed Kristianon kongregasyon. Sanen kaukolan dan resolbien so sakey a problema nipaakar ed panag-galsim, si Santiago, ya ag-anggan sakey a babangatan ed saman a panaon na ipapatey nen Jesus, so angidaulo ed saman ya importantin miting. Anggapo so pakanengnengan a wala so sangsangan no siopa so mangidaulo ed saman a miting na mananguley ya ulop na Kristianon kongregasyon. Agaylan impanguman manlapud panaon sanen saray apostol so walaan ni matik na espiritu’y kompetinsiaan! Diad tulong na masanton espiritu, anonotan daray bangat nen Jesus tan ginmapon atalosan da so kabaliksan na saray leksyon to.—Juan 14:26.
Nayarin ontua met iya ed sikatayo. Diad tulong na masanton espiritu, natalonaan tayo so antokaman a natitilak a panpilalek a milaslasan ed arum anggaman makaderal basta onaligwas labat. Imbes, nagamoran tayo so kareenan ed nonot ya ontatalona ed amin a kanonotan. Ipapaseguro na Biblia ed sikatayo a say panlalapuan na andiay-panangasin kompetinsiaan, si Satanas a Diablo, so magano lan ibantak ed kaaralman, ya agla makakiwas. (Apocalipsis 20:1-3) Agla mabayag et naandi la so pilalaslasan ed baetan na saray kaabay. Kasin say resulta et sakey a sosyedad ya anggapoy antokaman ya aligwas? Andin balot! Saray totoo so onaligwas ed inkayadyari, ya aliwan diad antokaman a pikokompetinsiaan, noagta diad pangiyaplika ed sikara na dondon bagat nen Jesus.—1 Juan 2:1, 2.
Si Keinosuke, ya asalambit ed akauna, ya aminsan ya akaeksperiensia na dayew ed minumundon itatalona lapud impakalako na sankarakelan a bilang na kotse, so mabanabanal ed parehon mental tan pisikal, balet diad kaunoran inmekal ed trabaho to. “Natan, say bilay ko so napno na tuan gayaga,” kuanto. Naimano to no akin a say tuan itatalona so ananda ed bilay nen Jesus. Naiimano to natan so pakainawaan ed antokaman a gagawaen to ed loob na sankamundoan a kongregasyon na Dios. Sikato sirin so nipaparaan para’d balon mundo, ya anggapo la’y pikokompetinsiaan. Sika met so makanengneng ed sayan balon mundon sosyedad diad ibisita ed sakey ed saray Kingdom Hall ed lugar mo tan pilimog ed Tastasi nen Jehova.
[Litrato ed pahina 7]
Say kareenan tan pikokoopera so pangayagaan na sosyedad na too ed balon mundo na Dios