Sano Manabetan so Bukig tan Sagur
“OH, SAY Bukig et Bukig, tan say Sagur et Sagur, tan saratan a dua so agbalot makapanpakna.” Sarayan salita na manag-anlong a si Rudyard Kipling a taga Britanya so mangipanonot ed sikatayo ed pandurumaan a tuloy na kultura a mangaapag-apag ed katooan, a sengegay panggugulaan na tribu, rasa, tan nasyon a nagagawa ed interon kaliber-liber tayo natan. Dakel so manetepet, Anggapo ta so bengatlan nagawaan na Dios nipaakar ed sayan kipapasen? On, wala so nagawaan to! Tan anggan natan et sikato so manggagawa la ed satan! Diad ontumbok a linya na anlong nen Kipling et atukoy iya. Panon kabayag so pansian na Bukig tan Sagur? Inkuan na manag-anlong: “Anggad say Dalin tan Katawenan so ontalindeg ed baleg a Yurongan na Panangukom na Dios, ed asingger ya arapen.”
Inter na Dios ed Anak to, si Jesu-Kristo, so responsabilidad ed panangukom. (Juan 5:22-24, 30) Balet kapigan so igapo na satan a panaon na panangukom? Sioparay naukom, tan ed anton pansumpalan? Si Jesus so aneskribi ed propesiya na saray bakal ed mundo tan katekep iran gonigon a ginmapon mamairap ed katooan nanlapulad taon 1914. Inkuan to a saraya so “tanda” na agnanengneng a ‘kiwawala [to] tan ed konklusyon na sistema na bengabengatla.’—Mateo 24:3-8, NW.
Diad kapantokan na sayan baleg a propesiya, ipapaamta nen Jesus a say kaplesan a panaon tayo et panaon na panangukom, ya ibabaga to so nipaakar ed inkasikato: “Sano onsabi so Anak na too ed gloria to, tan kaolop to ray amin ya angeles, saman la onyorong ed trono na gloria to. Tan natipon naani ed arap to so saray amin a nacion, tan panbibiiganen to ra naani sakey tan sakey, a singa say pastol ibiig to so saray kanding. Tan ipasen to ’ray carnero ed nikawanan a lima to, balet saray kanding ed nikawigi.” Diad piguratibon panangibaga, amin a totoo ed dalin so natitipon natan ed arap na Ukom tan sikara so walaay eebatan ed paraan na ikiwas da ed mensahe na kilalaban to. Sano say panangukom so magano lan ondapo diad baleg a kairapan, say matungangan kinmanding a totoo so “onla ra naani ed dusa ya andi angaan, bang ira balet so matunong dia ed bilay ya andi angaan.”—Mateo 25:31-33, 46; Apocalipsis 16:14-16.
‘Manlapud Ibubutay tan Manlapud Leletakan’
Say panangukom ed sayan mundo so aktual a ginmapo legan na marawal iran taon na Guerra Mundial I. Diad satan a panaon, say klero na Kakristianoan so sigpot-puson anuporta ed manbabakal a dapag. Saya so angipatnag ed sikara a bilang kabiangan na abulok a mundo a makanepegan ed ‘sanok na Dios.’ (Juan 3:36) Ingen komusta met iray maaro-ed-kareenan a Kristianos a manaagamil na pananisia ed Dios? Ginmapo ed taon 1919, saraya so ginmapon tinipon ed dapag na Ari, si Kristo Jesus.
Manlapud amin a parte na mundo so nanlapuan da, ununa saray nakekeraan ed 144,000 ya alanaan, ya apili manlapulad apalabas a nilasus taon na Kristianon panaon. Saraya so “mitatawir ed Cristo” diad mangatatawen a Panarian to. (Roma 8:17) Diad saraya et inkuan na propeta na Dios: “Agka antakot; ta walaak ed sika. Yakar ko naani so bukel mo a manlapu ed bokig tan tiponen ta ka naani a manlapu ed sagur; ikuan ko naani ed amianen, Ikbanan mo; tan ed abalaten, Agmo pokpokan; yakar mo so saray anak mo a lalaki a manlapu ed arawi, tan saray anak mo a bibii a manlapu ed sampot na dalin; balang sakey a natumangan ed ngaran ko, tan sikato so pinalsak a nipaakar ed gloriak, sikato a tinibukel ko, on a ginawak.”—Isaias 43:5-7.
Balet aliwan satan labat! Nagkalautla manlapulad saray taon na 1930, sakey a baleg ya ulop, a natan et manbilang na nilaksa, so ginmapon natitipon. Saraya so “carnero” a tinukoy nen Jesus diad Mateo 25:31-46. Singa say alanaan a nakdaan a walad unaan da, saraya so awalaan na ‘pananisia’ ed samay Sakey a mangibabagan: ‘Sikayo so tasik, et siak so Dios.’ (Isaias 43:10-12) Say katitipon ed sayan baleg ya ulop so mantutultuloy met ‘manlapu ed ibubutay tan leletakan, manlapu ed amianen tan abalaten, tan manlapud kasampotan na dalin.’
Sarayan maaro-ed-kareenan a karnero so pankakasakeyen ed sakey ya internasyonal ya inpanaagi. Sikara so mansasalita na dakel a nanduruman lenguahe ed 231 a daldalin a panaayaman da. Ingen sikaray mankakasakey ed espiritual diad panaaral ed “malinis a pansasalita [puron lenguahe, NW]” na Panarian a mensahe na Biblia, “pian sikara ya amin tawagan da komon so ngaran nen Jehova, pian manlingkor ira ed sikato a benebenek.” (Sofonias 3:9) Say pankakasakey da ed pananisia, gagala, tan kiwas so mangitatarok na makapakelaw a pantasi a tuan nanabetan la so Bukig tan Sagur, tan saray totoo manlapud arum nin pasen, diad serbisyo tan ed kidayewan na Soberanon Katawan a Jehova.
Diad arum a daldalin sayan panitipon so nagagawa ed silong na makatantandan tuloy iran sirkumstansya, a singa ipanengneng na ontumbok iran report.