Say Biblia​—Kasin Salita na Dios Odino Too?

Katuloyan na Kapitulo 8

Ag-akalingwan so Katooan

37, 38. Panon so pangipanengneng na sakey a sientista ya, unong ed ebidensya, say Delap so nayarin agawa, tan panon so pakaamta tayon agawa itan?

³⁷ Aminsan insulat nen propesor John McCampbell: “Say makanan pandurumaan na Biblikon desyang [say Delap] tan ebolusyonaryon panpapara so anggapo ed suston impormasyon na heolohya noagta diad impangipatalos ed sarayan impormasyon. Say lablabayen a panangipatalos so mandependin tuloy ed kaliberliber tan datin iilaloan na indibidual ya estudyante.”

³⁸ A say Delap so talagan agawa et nanengneng ed katuaan ya agbalot itan nalingwanan na katoaan. Diad interon mundo, walaray karaanan ya estorya nipaakar ed saya diad saray pasen a singa kaarawi na Alaska tan saray Isla ed Abalaten a Dayat. Say sakbay-Columbus iran sibilisasyon na Amerika, ontan met ed saray Aborigine na Australia, so amin et walaan na estorya nipaakar ed Delap. Anggaman arum iran salaysay so duma ed detalye, diad ngalngalin amin a bersyon et onleletaw so manunan katuaan a say dalin so adelap tan pigaran totoo lambengat so aliktar ed ginaway-toon luluganan. Say alenleneg a paliwawa ed ontanlan kasmak ya impangawat et lapud say Delap so maawaran ya ebento.a

39. Anton kaaruman a paneknek so anengneng tayo ed katuaan a say Biblia so Salita na Dios, aliwan too?

³⁹ Kanian, diad saray makanan kabiangan say Biblia so mitunosan ed modernon siensia. No wala so pansumlangan ed baetan dan dua, say ebidensya na saray sientista so napanduaruwaan. Sano mantunosan, say Biblia so mabetbet ya ontanlan susto a napanisiaan tayon say impormasyon to so nanlapud labas nen toon katudioan. On, say impantunosan na Biblia tan ed apruebaan a siensia so mangiter na kaaruman iran ebidensyan salita na Dios itan, ya aliwan too.

[Paimano ed leksab]