Kasin Walaan Kayo na Pananisia a Singa si Elias?

SAY sosyedad na too natan so mangibaliwala ed pananisia. Saray matudio so manludlurey ed kiwawala na Dios. Saray relihyoson mansimpisimpitan so manludlurey ed Dios. Tan say sekular a mundo so onkikiwas a kuanmono ag-importante so Dios. Balanglan sarayan awawey so manaktakot ed sakey a too, o manismaya ed sikato, o manggawad sikaton agmananginenen, diad antokaman a kipapasen say resulta so pareho: Say pananisia to so niyanor. Agpankelawan a si apostol Pablo so anawag ed kakulangan na pananisia a “kasalanan ya akaliktob a sankainomayan ed sikatayo”!​—Hebreos 12:1.

Angangko ta atan so rason a nanggawa na nikadkaduman gunaet si Pablo ya angipaarap na imano tayo ed saray bilay na lalaki tan bibii na mabiskeg a pananisia. (Hebreos, kapitulo 11) Saratan ya alimbawa so mamayubo ed sikatayo tan mamabiskeg ed pananisia tayo. Alimbawa, kunsideraen tayo si propetan Elias, diad pangiyapasakey lambengat ed asakbay a kabiangan na andukey tan napnon mapropetikon karera to. Sikato so nambilay legan na uley nen Arin Acab tan say paganon asawa to, si Reyna Jezebel, diad panaon sanen, say pananisia ed tuan Dios so walad panaon na ikekesay, a singa ed natan.

Say Abulok a Samploran-Tribun Panarian

Agaylan mankabagay ira! Si Acab so komapiton ari na samploran-tribun Panarian na Israel. Anggaman mauges iray anemiran sinublayan to, si Acab so sankaugsan. Agto lambengat pinasiansia so abulok a panagdayew ed kilaw a baka ed dalin noagta inasawa to so sankailin prinsipen Jezebel, sirin mangipaparungtal na mabibiskeg a porma na panagdayew ed palson dios a si Baal a labas nen akabatan na dalin.​—1 Arari 16:30-33.

Si Jezebel so nimedmer ed Baalismo nanlapulad inkaugaw. Say ama to, si Etbaal, a saserdote nen Astoret (asawa nen Baal), et pinatey toray arum ta pian magmaliw ya ari na Sidon, say panarian a walad amianen na Israel. Inimpluensyaan nen Jezebel so maletey ed moral ya asawa to pian iletneg so Baalismo ed Israel. Ag-abayag, walaray 450 propeta na saman a palson dios tan 400 iran propeta na diosan Ashera diad dalin, amin et ondodongo ed maarin lamisaan. Agaylan makapadimla so nengneng na panagdayew da ed arap na tuan Dios, si Jehova! Simbolo na saray organo na sekso, saray seremonya ed inkamabuna, saray balangkantis ed templo (lalaki tan bibii), anggan say panagbagat ed ananak​—saratan so pakabidbiran na sayan makapadimlan relihyon. Tekep na panamendisyon nen Acab, linmaknab itan ya andi-amper ed panamegley na panarian.

Nilaksalaksan Israelitas so akalingwan ed si Jehova, say Amalsa na dalin tan sikulo na danum to. Parad sikara si Baal so amendisyon ed dalin tekep na uran ed sampot na tiagew. Kada taon sikara so maniilalo ed sayan ‘Manangiter na Uran,’ say inkuan a dios na inkamabuna tan panaon na uran, pian panganggaen so tiagew. Tinaon, ya onsasabi so uran. Tinaon, a napapagalangan si Baal.

Inyabawag nen Elias so sakey a Kelang

Nayarin diad sampot na andukey, andian-na-uran a tiagew​—sanen saray totoo so ongagapo labat a manilalo ed si Baal a mangipelag na manangiter-bilay ya uran​—a si Elias et niparungtal ed sikatayo na salaysay na Biblia.a Sikato so tampol a niparungtal ed kurit na Biblia a singa karol. Daiset so nibaga ed sikatayo nipaakar ed abenegan to, anggapo no nipaakar ed atateng to. Balet aliwan singa karol, si Elias so aliwan manangipakabat na bagyo. Inyabawag to ed si Acab: “Unong a si Jehova a Dios na Israel et mabilay a dia ed arap to manalalagey ak, anggapo naani linaew nisay uran ed sarayan taon, noag unong na salitak!”​—1 Arari 17:1.

Iretrato pa ed nonot iyan too, akawesan ed probinsyanon bago ya aysing. Sikato so tubo ed mabaton pukdol na Gilead, nayarin pinabaleg ed limog na mauyamo iran pastol na saray pulok. Sikato so pinmarungtal ed mabiskeg ya arin Acab, nayarin diad mismon balbaleg a palasyo to, tekep na bantog ya abung a garing, say makapasagyat a nikadkaduman dekorasyon tan makapaayayat iran idolo to. Ditan, ed okupadon abakuran a syudad na Samaria, no iner a say panagdayew ed si Jehova so ngalngali lan alingwanan, ibabaga to ed si Acab a sayan dios to, sayan Baal, so andian na pakayari, sakey ya anggapo. Diad sayan taon tan ed taotaon ya onsabi, inyabawag nen Elias, ya anggapoy uran nisay linaew!

Iner so angalaan to na ontan a pananisia? Agto kasi ataktakot, ya akatalindeg ed arap na sayan mapangta, apostatan ari? Angangko. Masulok a sanlibon taon ed saginonor, say agi nen Jesus ed ina a si Santiago so amaseguro ed sikatayo a si Elias so “lakin walaan na liknaan a singa sikatayo.” (Santiago 5:17) Balet imanoen iray salita nen Elias: “Unong a si Jehova a Dios na Israel et mabilay a dia manalalagey ak ed arap to.” Sinononot si Elias a bilang aripen nen Jehova, sikato so akatalindeg ed arap na mas atagtagey a trono nen Acab​—say trono na Soberanon Katawan na talba! Sikato so representante, sakey ya ibabaki, na atan a trono. Tekep na sayan pangilaman, anto so katakotan to ed si Acab, sakey a maletey a manuley ya akabalang ed bendisyon nen Jehova?

Aliwan kibanbana a si Jehova so ontanlan peteg ed si Elias. Say propeta so maseguron nanaral ed kurit na saray impedeneng na Dios ed totoo To. Walan impasakbay nen Jehova ed saray Judios a dusaen tora na kelang tan eras no sikaray mandayew ed palson dirios. (Deuteronomio 11:16, 17) Sitatalek a lawas sumpalen nen Jehova so salita to, si Elias so “nampikasi ya ag-unuran.”​—Santiago 5:17.

Pananisian Nibalikas diad Itumbok ed Panangiwanwan

Anggaman ontan, ed sayan bekta, say proklamasyon nen Elias so angipasen ed sikato ed kaatapan na patey. Panaon sanen sananey a nengneng na pananisia so nakakaukolan. Ta pian mansiansian mabilay, kaukolan a sikato so matoor ed itumbok ed bilibilin nen Jehova: “Ompikal ka dia, tan ompawil ka ed dapit bukig tan onamot ka ed kulos na Carit a wala ed arap na Jordan. Et nagawa naani ya oninom ka ed kolos et iganggan ko so saray wawak a taganoen da kad’man.​—1 Arari 17:3, 4.

Tampol a tinmulok si Elias. No labay to so makaliktar ed kelang tan eras a sinmabi ed dalin to, kaukolan a sikato so onsaral ed antokaman iran probisyon a ginawa nen Jehova parad sikato. Saya so agmainomay. Mankabaliksay pangiyamot to ed inkasikato, manbilay a sigpot a nisian ed loob na pigaran bulan ya andi tunda. Kabaliksan to so pangan na karne tan tinapay ya iter ed sikato na saray wawak​—manangay-bangkay iran manok a mabitar a marutak ed Mosaikon Ganggan​—tan manmatalek ed si Jehova a saratan a karne so aliwan makapadimla noagta karnen pinaralaan unong ed ganggan. Kanian agnayarin sayan milagro so ompatnag ed arum iran komentarista na Biblia ya isusuheri ran say orihinal a salita dia et mankabaliksan ya “Arabo” aliwan “saray wawak.” Balet saray wawak so pili. Anggapo so manginap a sarayan abebbeba, marutak iran manok a mantektekkiab ed kalawakan tekep na saray keran tagano et peteg a manatagano ed si Elias, ya aanapen nen Acab tan Jezebel ed liber na interon panarian!​—1 Arari 18:3, 4, 10.

Legan ya onlelele so kelang, nayarin si Elias so pinmaga ed suplay na danum to diad kulos na Carit. Kaslakan ed saray kulos na Israel so naekatan diad panaon na kelang, tan “diad sampot na pigaran agew,” ontan met so agawa. Naisip yo ta iray liknaan nen Elias legan a kankaninot ya ondaraiset so tedter na danum tan say danum so onkakati ed inagew-agew? Maseguron nononoten to no anto so nagawa sano naandi so danum. Anggaman ontan, si Elias so sitotoor a nansiansia. Agnambayag a diad inyekat na kulos ya inter nen Jehova ed sikato iray ontumbok a dagup na bilibilin. Onla ka ed Sarepta, so inbaga ed propeta. Ditan naromog to so katagano ed abung na sakey a balo.​—1 Arari 17:7-9.

Sarepta! Say baley a kayarian na syudad na Sidon, a nanlapuan nen Jezebel tan no iner a nanuleyan na dilin ama to bilang ari! Kasin maligen ditan? Nayarin manduaruwa si Elias. Balet “sikato so inmalagey tan linma.”​—1 Arari 17:10.

Mangitarok si Jehova na Tagano tan Bilay

Ag-abayag say katutulok to so atumangan. Sikato so akiabet ed balo unong a nipasakbay, tan aromog to ed sikato so nengneng na pananisia ya ontanlan anggapo ed limog na kabaleyan to. Sayan dukan balo so walaan lambengat na dugarugan arena ta larak a panluto ed sakey a panangan parad sikato tan ed tobonbalon laki ya anak to. Ingen, anggan diad kapilitan a pankaukolan to, sikato so mabulos a manggaway tinapay parad si Elias, a manmamatalek ed sipan to a si Jehova so mansiansian mamano ed buyog na larak to tan ed buyog na tapong leleg a wala so pankaukolan. Agpankelawan ya anonotan nen Jesu-Kristo so matoor ya ehemplo na sayan balo sanen binaat toray andian na pananisian Israelitas ed mismon agew to!​—1 Arari 17:13-16; Lucas 4:25, 26.

Anggaman ed sayan milagro, namparan say pananisia na balo tan si Elias so agmanbayag et asingger lan nidunget ed mairap a subok. Say anak to so inatey. Maermen a tuloy, say balo so manpalbeng a sayan biglan inkagawa so mikonektaan ed si Elias, say “too na tuan Dios.” Iisipen ton sikato so nadudusa nisengeg ed apalabas iran kasalanan. Ingen inala nen Elias so andian-na-bilay ya anak to ed saray taklay to tan inawit to ed atagey a silir. Kabat to a si Jehova so makapangitarok na nagkalalon katagano. Si Jehova so mismon lapuan na bilay! Kanian si Elias so nampikasin siseseet tan naolit-olit pian ombilay so ugaw.

Si Elias so aliwan sankaunaan ya awalaan na ontan a pananisia ed say kioli, balet diad kurit na Biblia, sikato so inmunan nausar a manggawa na ontan. Say ugaw a laki “so inmoli”! Say gayaga na ina to so bengatlan maabig a nengnengen legan ya itatarok nen Elias ed sikato so anak ton laki ed saray simplin salitan: “Nengneng mo! Say anak mo so mabilay.” Andi duaruwan akanangis, inkuanto: “Natan, amtak a sika so laki na Dios, tan say salita nen Jehova ed sangim so tua.”​—1 Arari 17:17-24.

“Si Jehova so Dios Ko”

Agaylan makapasagyat, tan agaylan matukoy, a say kabaliksan na ngaran nen Elias et “Si Jehova so Dios Ko!” Diad panaon na kelang tan eras, sikato so initdan nen Jehova na tagano tan inumen; diad panaon na moral a gutgutan; sikato so initdan nen Jehova na maabig a giya; diad panaon na patey, sikato so inusar nen Jehova a mangipawil na bilay. Tan ompatnag a kada panaon a si Elias so kinaukolan a mangagamil na pananisia to ed Dios to​—diad panmatalek ed Sikaton mangitarya, diad panumbok ed saray panangiwanwan To, diad isaral ed Sikaton mangalangon ed ngaran To​—sikato so atumangan a tekep na nagkalo nin katunongan a manisia ed si Jehova. Sayan padron so apaneknekan legan a sikato so nantultuloy ya angawat na mairap tan makapataktakot ni ingen iran asainmin manlapud Dios to, si Jehova; diad tua, arum ed sankamakapakelawan iran milagro so wala ni ed arapen to.​—Nengnengen so 1 Arari, kapitulo 18.

Mipadaparan tuloy itan ed saray ariripen nen Jehova natan. Nayarin agtayo mamilagron napakan odino nausar a mamaoli; aliwan saya so panaon na saratan a milagro. Anggaman ontan, si Jehova a mismo so agbalot anguman nanlapulad panaon nen Elias.​—1 Corinto 13:8; Santiago 1:17.

Sikatayo met so nayarin makaawat na arum iran makapadismayan asainmin, arum et saray teritoryan mairap tan makapataktakot a sabien na inter-Dios mensahe tayo. Nayarin nidunget itayo ed panamasegsegang. Nayarin naerasan itayo ni ingen. Balet parad saray matoor ya indibidual tan ed organisasyon to ed inkalapagan, naolit-olit a pinaneknekan nen Jehova a siansian iwawanwan tan sasalimbengan toray ariripen to. Siansian iitdan tora na pakayarin manggawa na antokaman iran kimey ya impabtang to ed sikara. Tan siansian tutulongan toran sungdoan so antokaman iran subok a nayarin onsabi ed sikara ed sayan nagogonigon a mundo.​—Salmo 55:22.

[Paimano ed leksab]

[Litrato ed pahina 22]

Kasin sikayo, so singa si Elias, a walaan na pananisia ya asikasoen nen Jehova iray pankaukolan na ariripen to?