Say Palson Relihyon So Onkikiwas a Balangkantis
1. Panon so impanmoria na dakel ed panagbalangkantis?
SIKATO so tinawag na arum a say sankadaanan a propesyon—balangkantis, patutot, odino marutak a bii. A singa kaslakan a nausar, amin na sarayan salita so walaan na parehon kabaliksan, a tutukoyen to so sakey a biin imoral a mangilalako ed kausar na laman to diad lalaki. Ingen, wala so sakey a panaon sanen saya so impasen a bilang magalang a pananawag!
2, 3. Panoy piduma na papel ya inkasaserdotesa a kinmiwas ed kadaanan a Babilonia diad ganggan nen Jehova ed Israel nipaakar ed panagbalangkantis na laki tan bii?
2 Sasalitaen to so kadaanan ya inkasaserdote na Babilonia, si Propesor S. H. Hooke, sakey ya autoridad ed Biblikon arkeologo, so angikuan: “Say inkasaserdote so agniyapasakey ed lalaki, noagta saray bibii so anibukel na kabiangan na ulop na saray angkabaleg a templo. Impasen a kagalangan so pibiang ed inkasaserdotesa, tan narerengel tayo so pigaran arari ya angitalaga ed saray anak dan bibii ed tawag na inkasaserdote. . . . Say sankaimportantian a kiwas da et say panlingkor bilang sagradon balangkantis diad baleg iran panapanaon a piesta. . . . Say templo nen Ishtar [say diosa na inkamabuna tan bakal], siempre, so nankarga na baleg ya ulop na ontan iran bibii.”
3 Saya so miduman mabitar ed panagdayew ya insaklang ed si Jehova a Dios na nasyon na Israel. Malinlinew ya imbaga na Ganggan: “Anggapo ed saray anak a bibii na Israel so magmaliw a balangkantis ed templo, nisay anggan siopaman ed saray anak a lalaki na Israel so magmaliw a balangkantis ed templo [mangagamil na homoseksualidad]. Agmo nepeg ya itatarok so pangabang ed sakey a balangkantis odino say bili na sakey ya aso dia ed abung nen Jehova a Dios mo ed anggan anton sipan, lapud sikara so bengatlan makapadimla ed si Jehova a Dios mo.” (Deuteronomio 23:17, 18) Sirin, say bayar ed balangkantis so ag-awaten a bilang kontribusyon diad santuaryo na Dios. Anggan say inkabalangkantis ya anggapo so anggan relihyoson kaisipan so makapabaing. Niganggan ed saray Israelitas: “Agmo momudmoraen so bii ya anak mo a gawaen a balangkantis, ta pian say dalin so agkomon manggawa na panagbalangkantis tan say dalin so peteg a napano na karutakan.” Saray ganggan a sumpad panagbalangkantis tan homoseksualidad, ya adeskriben “sakey a makapadimlan bengatla,” so sakey a salimbeng ed nasyon, namparan diad espiritual tan pisikal.—Levitico 19:29; 20:13.
Espiritual ya Inkabalangkantis a Lalon Sankaugesan
4. Anto so sankaugesan a porma na panagbalangkantis?
4 Manlapud punto de bista na Dios, anggaman kuan, wala so sankaugesan a porma na panagpatutot—espiritual a panagbalangkantis, odino say pangibabagan pandadayew ed tuan Dios bangta diad tua ed mangiiter na panagdayew tan panangaro ed arum a dirios. Say kadaanan a Jerusalem so nagkalalon nambalangkantis. Sikato so angiter na regalo ed saramay nasyones ya akilawanan ed sikato diad espiritual, a dinutakan da so tuan panagdayew.—Ezequiel 16:34.
5, 6. Sioparay manggagawa na espiritual a panagbalangkantis ed sayan koma-20 siglo, a mangipaarap ed antoran tepet?
5 Anggan diad sayan koma-20 siglo, say espiritual a panagbalangkantis so kaslakan ed relihyoson sistema na mundo. Say Kakristianoan so sankaprominentian a kabiangan na satan a sistema—sakey a sisteman tinawag na Biblia a “Babilonia a Baleg, say ina na saray balangkantis tan ed saray makapadimlan bengatla ed dalin.”—Apocalipsis 17:5.
6 Balet anto so ultimon destino na Babilonia a Baleg? Tan panon a satan a pansumpalan so mangapekta ed sika tan ed saray inad-arom? No mabiskeg ya inukom na Dios iray balangkantis ed kadaanan ya Israel, anto so gawaen to ed modernon espiritual a panagbalangkantis? Saray onggendan iran artikulo so mangusisa ed saratan a tepet tan saray miulibayan.