Katuloyan na Kapitulo 18
Say Liket na Manangibales To
12. (a) Siopa so apaneknekan a manangibulos ed kautibon totoo nen Jehova ed kadaanan a Babilonia, tan kasin sikato so tutukoyen na Salmo 137:8, 9 diad sankagnapan a pantalos? (b) Anto so ipapasakbay na sarayan bersikulo nipaakar ed manangibales na mangaraldalin a muyongan na Dios?
12 Inusar nen Jehova so Persianon manuley a si Ciro a mangibulos ed totoo to a manlapud kadaanan a pakayari na mundo a Babilonia. Balet diad sankanagnapan a pantalos, si Ciro so aliwan sakey ya atukoy ed saray manangisaran salita ed Salmo 137, a manutukoy ed Babilonia a Baleg, say sankamundoan ya imperyo na palson relihyon: “O anak a bii na Babilonia, sika a lilingkayen, maliket iman so manumang ed sika na unong ed dilin impangipasen mo ed sikami. Maliket iman so mangala tan mangibalsak ed saray angkekelag ya anak mo ed dampay.”—Salmo 137:8, 9.
13, 14. Akin a say “maliket” a sakey ed Salmo 137:8, 9 so agmanutukoy ed saray pulitikal a pakayari a maneral ed Babilonia a Baleg?
13 Siopa itan a “maliket” a sakey? Kasin say “maliket” a sakey so ontalindeg ed simbolikon “samploran saklor” a wala ed tapew na ulo na “atap ya ayep,” a diad beneg to et akakabayo so daan a balangkantis a sistema na relihyon ed abayaglan panaon? Andi, lapud saray mapulitikan managderal ed sankamundoan ya imperyo na palson relihyon so agmaneral ed satan a mangipalugar ed puron panagdayew diad tuan Dios. Satan so agda gawaen diad kigloriaan na Dios na Biblia. Panon, sirin, a saray ontan so peteg a “maliket” a sakey ya impasen na salmista?
14 Saray mapulitikan pakayari na sayan mundo so agmanggawa ed sayan sumpa-ed-relihyon a kimey nisesengeg ed aro diad saray managdayew ed si Jehova. Akin ya andi? Lapud saray Tasi nen Jehova so mangaamper diad pamawala ra na sakey a mundon sigpot ya andi-dios. Sirin saray mapulitikan pakayari so instrumento lambengat ya inusar na Dios na saray Tastasi a mangisumpal ed dilin gagala to.—Apocalipsis 17:17.
15. Siopa a peteg so mamapakiwas ed saray mapulitikan pakayari, tan diad panamegley na siopa?
15 Sirin, anggamano saray mapulitikan pakayari so nayarin direktan usaren diad panderal ed sankamundoan ya imperyo na palson relihyon, peteg a si Jehova a Dios so mamapakiwas ed sikara. Panon? Usaren to so naikdan na pakayarin maarin Anak to, say Babaleg a Ciro, si Jesu-Kristo. Sirin, si Jesu-Kristo ed pakayari na Panarian so “maliket” a sakey ya impasakbay na salmista!
16. Panon so paneral nen Jehova ed saray “anak” na Babilonia?
16 Bangta salimbengan nen Jehova iray matoor to, sikato so, diad piguratibon pantalos, so manunggab ed amin a relihyoson “anak” na singa-balangkantis a sistema na palson bangat tan buyaken toran misimisien diad singa “dampay”—say ag-onsukon Panarian nen Jehova a Dios ed panamegley nen Jesu-Kristo.
17. (a) Unong ed Isaias 61:1, 2, anto so iyabawag nen Jesus kayari na kalanaan to na espiritu na Dios? (b) Panon so kasumpal na panangiyabawag natan?
17 Sanen sikato so wadia ed dalin, si Jesus so alanaan na espiritu na madibinon Mananulong ya aliwa lambengat “ed pangiyabawag na taon na abig-linawa ed biang nen Jehova” noagta ontan met ed panangiyabawag “ed agew na panangibales ed biang na Dios tayo.” (Isaias 61:1, 2; Lucas 4:16-21) Diad panaon tayo, kaleganan “na kaunoran iran agew” na sayan sistema na bengabengatla, si Jehova so mangipapaibawag ed saray matoor ya ariripen to “ed agew na panangibales ed biang na Dios tayo” ed amin a panaayaman a dalin ya onkanan pasakbay ed amin a nasyones. Diad sayan panangiyabawag et say nakdaan so akikasakeyan na ondaraak a “baleg ya ulop” na malakarneron babangatan nen Jesu-Kristo, a singa nipasingawey ed Apocalipsis 7:9-17.
18. Diad anton liket so pibiangan na saray matoor na Dios?
18 Amin na saraya, say nakdaan tan say “baleg ya ulop,” so angunor ed anghelikon ganggan ed Apocalipsis 18:4. Sikara la so pinmaway ed Babilonia a Baleg. Akin a maganat so ontan a kiwas? Lapud sikara so nepeg ya ontaynan ed Babilonia a Baleg sakbay a saray relihyoson “anak” to so namisimisi tan nalinglingkay diad panamegley na “atap ya ayep” tan say “samploran saklor” to sakbay a tuloy na Armagedon. Sarayan matoor so mibiang ed liket na Babaleg a Ciro, si Jesu-Kristo. Sikara so mikasakey ed katawenan diad pangibabaga: “Idayew si Jah, sikayon totoo! Say kilalaban tan say gloria tan say biskeg so kayarian na Dios tayo, lapud saray panangukom to so tua tan matunong. Lapud indapo to so panangukom ed baleg a balangkantis a nandutak ed dalin diad pilalawanan to.”—Apocalipsis 19:1, 2; ipareng so Jeremias 51:8-11.
19. Anton liket so panggagayagaan natan na matoor a nakdaan, tan anton babaleg a liket so manatalaran ed sikara?
19 Nanlapulad 1919 et si Jehova so nanggawa na “baleg a bengatla” ed katooan to. (Salmo 126:1-3) Para ed sayan panangitandoro ed biskeg na panangibulos to, ya ipapanengneng ton sikato so “matoor a Dios,” say nibulos a nakdaan so siansia nin maliket ed puso. (Deuteronomio 7:9) Sikara so malikeliket a tuloy, balet wala so babaleg a liket a manatalaran ed sikara. Saya so sano makapikasakey ira ed liket na Babaleg a Ciro, say manuuley a Monarko, si Jesu-Kristo, diad panaon sano misimisien to so amin ya “anak” na diniriablon muyongan.
20. Siopa ni so mibiang ed liket na alanaan a nakdaan, tan akin?
20 Nilaksalaksa ed saray datin “kautibo” na Babilonia a Baleg so atulongan lan tinmaynan ed satan a nigana-ed-kadederal a relihyoson muyongan sakbay na maruksan kaderal to. Say nansumpalan et say “baleg ya ulop” na “arum a karnero.” Sikara natan so manbilang, diad sankadalinan, na masulok a 3,000,000, ya andian na getar ed bilang na niliktar diad kadederal na sankamundoan ya imperyo na palson relihyon. Diad katooran ed muyongan nen Jehova, ibibiang da so liket na nakdaan diad impikasakey ed sikara a mangiyaabawag ed agew na panangibales nen Jehova ed relihyoson Babilonia a Baleg.
21. Anto so nepeg ya awawey tayo ed Babilonia a Baleg tan diad saray kinautibo to?
21 Anggapo, sirin, so pikukumpromiso ed satan a sankamundoan ya imperyo na palson relihyon. Anggapo komon so ipawil ed sikato diad sarayan agew na inkagba to. Komon ta sikatayo so mantultuloy a manulong ed dakerakel nin kautibo ed Babilonia a Baleg no nayari ya ompaway ed satan a nigana-ed-kadederal a sistema sakbay a gamoran nen Babaleg a Ciro so makapaliket a pambiktorya to.