Balita na Saray Manangiyabawag ed Panarian

Benindisyonan nen Jehova So Mapekder a Talindeg da ed Ganggan To

DIAD sakey a bansa ed Pegley Bukig, sakey ya ama so mangaapiger ed goman kinmepes diad gilig na kalsada sanen binangga na sakey a kotse so manedad na apat-taon ya anak ton laki tan insan ababwes. Sankaakwal na ina to so asugatan ya ugaw, say ama so linma ed sankaasinggeran ya ospital a sikato lambengat so ginanggan ya onla ed sananey ya ospital ed 16 milyas ed kaarawi. Denisidi na doktor a say ugaw so manpaparala ed dalem tan nakaukolan to so operasyon tan panangiyalis na dala. Waloran arum a doktores so inmabuloy. Kabat da so ganggan na Dios a sumpad panangiyalis na dala, satan so agnilabay na saray ateng. “Walaan kayo lambengat na limaran minuton mandesidi odino andi et agmi diwiten so anak mo anggano sika so mipakna ed panangiyalis na dala,” so impanaktakot na doktor. Kaleganan to et say eges na ugaw so nantultuloy a linmarag tan nasasabi to la so maatap a kipapasen.

Say agin laki ed laman na ama, anggapo ed katuaan, so anesdes ed ama a mangiyabuloy ed panangiyalis na dala. Inkuanto ni: “Ipangasim pan ipasen iyan ugaw ya aliwan anak mo noagta anako. Lapud gogonigonen ka na konsiensiam, sakbaten ko la so responsabilidad, pati say gastos ed ospital, pian naikdan so ugaw na nakakaukolan a dala. Saya so alenleneg ya anak mo.” Say panangidesdes so mairap ya itepel, balet saray atateng so mapekder ed desisyon da.

Inala ra so ugaw tan tinmaynan, a mananap na sananey ya ospital, balet ta abalang ira. Diad inkibanbana et anengneng da so karatula na sananey ya ospital, tan sikara so linma anggamano aliwan saman so aanapen da. Kayari na impakanengneng ed ugaw, imbaga na doktor: “Say inlarag na eges na ugaw so nayari odino nayarin aliwan sakey a tanda na pampaparala ed dalem. Paulian so ugaw a naugip, tan nabuas et gawaen tayo so nakaukolan a pangusisa pian naamtaan.” Saray panangusisa so angipanengneng ya anggapo so panagparala, noagta say imbabag so nisesengeg ed aksidente. Anggapo so pankaukolan na pangopera. Diad tua, imbaga na doktor a say operasyon so nayarin maatap a tuloy. “Salamat ed si Jehova,” kuan na atateng, “diad kaligenan na anak mi tan diad impangiwanwan to ed sikami diad dugan ospital tan diad dugan doktor.”

Samploran taon ed saginonor, anto so nansumpalan na sayan kipapasen? Insalaysay na ama: “Say agik a laki ed laman ya anesdes ed siak diad ospital so angapresya ed talindeg mi tan anengneng to so panangidirihe nen Jehova ed sayan kaso. Saya so anagyat na interes to ed katuaan, a sikato so inawat to, tan sikato la natan so bautismado tan manlilingkor a bilang matatken ed kongregasyon. Say asawa to tan saray anak to so manlilingkor ed si Jehova a maseseg a kaiba to. Saray duara nin arum ya agagik a lalaki so wala met la ed katuaan a kaiba ra so pamilya ra, tan sakey ed sikara so manlilingkor a ministeryal ya aripen. Say amak tan inak so abautismoan ed agano anggaman matatken la ra. Sirin, anggamano saman so teriblen eksperiensia nen asawak tan siak, nisengeg ed satan et 30 nin membro na pamilyak so angawat ed katuaan; arum so bautismado la tan manlilingkor a mamatatken tan ministeryal ya ariripen. Arum so mamapaarap ed bautismo. Say anakon laki so manedad la natan na 14 anyos tan sikato so mabunigas, magunaet a manangipalapag, tan sikato la so mamapaarap ed bautismo. Agaylan misalsalamat so akulaw ko tan siak ed si Jehova diad impanulong to ed sikami a manggawa na dugan desisyon a mitukoyan ed ganggan to a nibalikas ed Gawa 15:29”!

[Litrato ed pahina 24]

“Mantultuloy ya onarawi ed saray bengatlan imbagat ed saray talintao tan manlapud dala”