Kapitulo 13
Say “Prinsipe na Kareenan” So Onarap ed Saraman So Walad Paway na Balon Sipanan
1. Akin ya agnipulisay na saray Judios natan a say Mosaicon sipanan ya agawa ed saray atateng da so manampot la?
Saray Judios ed laman natan, saramay silalaman a kapolian nen patriarkan Abraham, so agmakapangipulisay a say Mosaicon Ganggan a sipanan so sandian na sakey a balo tan magmaong a sipan. Agda nayarian ya ekalen ed saray manuskrito ra ed Hebreon Kasulatan iray salita na Dios ed Jeremias 31:31: “‘Nia! Walaray agew ya onsabi,’ kuan nen Jehova, ‘tan siak so manggawa ed abung na Israel tan ed abung na Juda na sakey a balon sipanan.’”
2. Panon a say tepet ed no siopa so magmaliw a Manamegley na balon sipanan so diad kaunoran et niparungtal?
2 No siopa so manamegley ed satan a balon sipanan so ag-impasakbay nen Jeremias. Balet diad samay labi na Nisan 14, 33 K.P., sanen inyawat nen Jesu-Kristo so kopa na Paskuan alak ed saray babangatan to, impanengneng to a sikato so satan a Manamegley. (Lucas 22:20) Diad Hebreos 7:22 et nibaga ed sikatayo a sikato so “sipan,” seguro, odino garantiya, na ontan a balo tan “magmaong a sipanan.”
3. Anton arum ya inkabetang ed Dios so binembenan nen Jesu-Kristo, tan kasin diad panamegley na linya na kapolian?
3 Diad panamegley na bagat to a nisesengeg ed balon sipanan, si Jesus so nagmaliw ya Atagey a Saserdote nen Jehova. Sikato so agnagmaliw ya ontan diad panamegley na silalaman a polin nanlapud si Aaron, say inmunan atagey a saserdote na Israel. Sikato so impansamba ed inkabetang na Atagey a Saserdote diad panamegley na samba na Sankatageyan a Dios, si Jehova, say Managgawa-na-Saserdote. Saray salita ed Salmo 110:4 so onaplika ed si Jesus: “Sinambaan nen Jehova (tan agto pagbabawian): ‘Sika so sakey a saserdote ed andi-geter a panaon unong ed nengneng nen Melkizedek!’”—Hebreos 7:20, 21.
4. (a) Diad anton nengneng na “Israel” a si Jehova so angisipan na balon sipanan, tan akin? (b) Saramay niloob ed balon sipanan so magmaliw ya ananak na antoran atateng?
4 Nilikud ed melag a nakdaan, say nasyon na silalaman ya Israel so angipulisay ed si Jesu-Kristo a bilang Manamegley na balon sipanan. Sirin “say abung na Israel” ya angipasakbay na Dios na balon sipanan so nansumpal a sakey ya espiritual ya Israel, “say Israel na Dios.” (Galacia 6:16) Satan ya espiritual ya Israel so nianak ed agew na Pentecostes, 33 K.P. Lapud espiritual, nayarian ton akuen ed pibabaley to iray mananisian aliwan-Judios, odino Hentiles. (Gawa 15:14) Satan so imbaga nen Pedro a bilang “sakey ya apilin rasa, maarin inkasaserdote, masanton nasyon, totoo a para ed nikabiig a kayarian.” (1 Pedro 2:9) Sayan “masanton nasyon” so tinibukel na saray espiritual ya anak na Babaleg ya Abraham, si Jehova, say Managgawa tan Mananumpal ed Abrahamicon sipanan. Sirin, sikara met so “ananak” na pinagkaasawa-biin mangatatawen a muyongan nen Jehova, ya inretrato nen Sara, say asawa nen Abraham. Agnapaliisan, say balon sipanan na Babaleg ya Abraham so angimano ed satan a mangatatawen a muyongan a bilang say ina na insipan a “bini,” ya inyanino nen Isaac.
Nisakup So “Arum a Karnero” ed Sakey a Pulok
5. Anto so kakaukolan na balon sipanan dia ed dalin?
5 Satan a balon sipanan so nankaukolan ed saray aktibon ministros diad dalin, tan saray membro na alanaan a nakdaan so nanlingkor a bilang manepenepeg iran kualipikadon “ministros na sakey a balon sipanan” a sinmandi ed daan a Mosaicon Ganggan a sipanan. (2 Corinto 3:6) Sikara so aliwan klerikon ministros ed dalem na saray nilasuslasus a relihyoson sekta na Kakristianoan, say matalonan kabiangan na modernon-agew a Babilonia a Baleg. Inimano ra so manangiganggan a tawag na Apocalipsis 18:4 tan pinmaway ira ed satan a sankamundoan ya imperyo na palson relihyon.
6. (a) Say bilang na saray ministros na balon sipanan so agetaran ed panon karakel? (b) Panoy pakaamta tayo a say Maabig a Pastol so mangiyarap na imano to ed saraman so walad paway na balon sipanan?
6 Say bilang na saray ministros na satan a balon sipanan so agetaran ed 144,000. (Apocalipsis 7:1-8; 14:1-5) Sirin say panaon so onsabi sano say Maabig a Pastol so mangiyarap na imano to ed labas na saray ministros na balon sipanan. Saya so anengneng lan akauna na Primo Ministro nen Jehova tan saya so tinukoy to sanen inkuanto, diad Juan 10:16, a sikato so walaan na “arum a karnero,” ya anggapo ed “melag a pulok” na 144,000.—Lucas 12:32.
7. (a) Akin a saray membro na “arum a karnero” a klase so aliwa ran ministros na balon sipanan? (b) Panon a say nakdaan na saraman so wala ed balon sipanan so nagmaliw lan sakey a bendisyon ed saray pamilya tan nasyones na dalin?
7 Manwarin say “arum a karnero” so anggapo ed “melag a pulok,” sikara so ministros na Dios, met, balet aliwa ran ministros na balon sipanan. Tan say katuaan a saramay wala ed “arum a karnero” so magmaliw a “sakey a pulok” ed nakdaan na saramay “ministros na sakey a balon sipanan” so mangipatnag na bengatlan sankarakpan. Anto? Saya: Sakbay a nigloria ed mangatatawen a Panarian, say nakdaan so personal a milimog ed “arum a karnero” ed dalin. Diad onia et say nakdaan na espiritual a bini nen Abraham so onggapon magmaliw a bendisyon ed amin a pamilya tan nasyones sakbay “na bakal na baleg ya agew na Dios a Makapanyarin-amin” ed Armagedon tan sakbay ya onggapo so Milenyo.—Galacia 3:29; Apocalipsis 16:14, 16.
8. Kapigan so impangiyarap na Maabig a Pastol na imano to ed saraman so wala ed paway na balon sipanan, tan anton akadkaunan kundang so inala na sarayan “arum a karnero”?
8 Peteg ya onia so kipapasen, nagkalautan la nanlapulad 1935. Nanlapulad saman, nilaksalaksa ed saramay “arum a karnero” so akilimog ed saray pigamplon libon kongregasyon na saray Tasi nen Jehova ed interon globo tan indedika ra so inkasikara ed Supremon Pastol, si Jehova a Dios. Sikara sirin so naawat ed “sakey a pulok” na Maabig a Pastol, si Jesu-Kristo.
9. Kasin say panamaawang na imano na Manamegley na balon sipanan et kabaliksan ton say ministeryo na balon sipanan so angangga la ed dalin?
9 Kasin say katuaan a say Manamegley na balon sipanan, nanlapulad saman, so mamapaawang na imano to ya isakup met so “arum a karnero” et kabaliksan ton say ministeryo na balon sipanan so angangga la nen 1935? Andi, lapud wala ni so nakdaan na saray ministros na balon sipanan ed dalin, tan nakaukolan da nin sumpalen itan a ministeryo.
10. Siopa natan so mangugungguna ed ministeryo na balon sipanan a singa insaklang na saray waloran managsulat na Kristianon Griegon Kasulatan?
10 Natan, namparan say nakdaan na “melag a pulok” tan say ondadaak a “baleg ya ulop” na “arum a karnero” na Maabig a Pastol so mangugungguna a manlapud ministeryo na arum ya akauna nen sikara, a singa si apostol Pablo. Diad impanumpal to ed ministeryo to ed balon sipanan a sitotoor ya anggad impatey to ed Roma ed samay sakbay na inkaderal na Jerusalem nen 70 K.P., apuyanan si Pablo a mangisulat ed 14 ed saray 27 libro na Kristianon Griegon Kasulatan. Agaylan misalsalamat so alanaan a nakdaan tan say “baleg ya ulop” na “arum a karnero” a saray matoor a lalaki nen inmunan siglo, a singa si apostol Pablo tan saray pitoran arum nin managsulat na Kristianon Griegon Kasulatan, so anumpal na ministeryo ra ed balon sipanan ya anggad kasampotan na mangaraldalin a bilay da! Tan diad panaon tayo, nilaksalaksa ed “arum a karnero” so mangugungguna la ed ministeryo na balon sipanan, a singa insaklang na alanaan a nakdaan ed leksab na Manamegley, si Jesu-Kristo. Say “Prinsipe na Kareenan” so angiyarap la na imano to ed sarayan pinabpablin “arum a karnero,” a say bilang da so maples ya ondarakel.
11. (a) Panon kabayag so iyiipekto la na balon sipanan, tan anto so ipatnag na saya? (b) Say nakdaan na saray ministros na balon sipanan so manlingkor ed anton kapasidad natan?
11 Anggaman kuan, say panaon so talagan nanaupot la! Say balon sipanan so inmipekto la ed 1,950 taotaon, 400 taotaon a mas andukey nen say Mosaicon Ganggan a sipanan a sinandian to, tan say bilang na saray ministros na balon sipanan so mandaiset unong a saray membro so nanaandi ed mangaraldalin ya eksena diad patey. Balet say nakdaan natan na saratan a ministros so mantutultuloy a manlilingkor a bilang “say matoor tan makabat ya aripen” a tinuro na Katawan, si Jesu-Kristo, a “mangasikaso ed amin a kayarian to.”—Mateo 24:45-47.
Inatnat so Imbitasyon: “Gala!”
12. Unong ed Apocalipsis 22:17, anton imbitasyon so inanatnat na “nobyan” klase, tan diad siopa?
12 Agaylan maaro so serbisyon isasaklang na saratan a ministros na balon sipanan! Alimbawa, diad Apocalipsis 22:17 et nabasa tayo: “Say espiritu tan say nobya so mantutultuloy a mangibabaga: ‘Gala!’ Tan siopaman a makadngel so mangikuan: ‘Gala!’ Tan siopaman a napgaan so ondago; siopaman a mankaliktan so mangala ed danum na bilay ya anggapoy bayar.” Say “nobyan” klase, a tekep na aktibon puersa nen Jehova, odino espiritu, so manginanatnat ed satan ya imbitasyon ed saraman so walad paway na balon sipanan. Say imbitasyon so ninatnat, aliwan diad saraman so inatey la ed saray pakanodnonotan a lubok a nabendisyonan na kikioli a manlapud saray inaatey, noagta diad saray totoo natan a manbibilay, a walad kaatapan na kaderal ed Armagedon balet ta walaan na saray layag ya ondengel.
13. (a) Kasin say imbitasyon ya innatnat na “nobyan” klase so maapa? Ipaliwawa. (b) Anto la so gagawaen na saraman so angawat na imbitasyon diad katutulok ed Apocalipsis 22:17? (c) Anto so nepeg a kipapasen no nipaakar ed nakekeraan a panaon diad pananginatnat ed imbitasyon?
13 Aliwan kaapaan so inkinatnat na sayan maaron imbitasyon ed sankamundoan nagkalautla nanlapulad 1935. Masulok a taloran milyon la so kinmiwas ed magayagan imbitasyon ya ondago tan oninum. No nipaakar ed saramay manamablin dinmengel, sikara so situtulok a mangibabaga ed siansia nin dakel a minilmilyon a napgaan a para ed andi-anggaan a bilay ed paraison dalin, “Gala!” Balet say panaon ed pananginatnat ed sayan magayagan imbitasyon ed “arum a karnero” so limitado. Kayari na masulok a kapalduan siglo na inkinatnat, say panaon a nakekeraan ed satan so antiktikey lan tuloy, unong a say bakal na Dios ed Armagedon so mamaypayong lan sankapatnagan ed “sayan kailalakan” na katooan.—Mateo 24:34.
14. Nipaakar ed anto so nepeg a pangiteran tayo ed si Jehova na pisasalamat tan dayew?
14 Sirin, natan, misalamat ed si Jehova ta intarya to so makayarin Manamegley a matalonan manusumpal ed gagala na balon sipanan diad impamawala na sakey a katooan, 144,000 a mabiskeg, a para ed ngaran To! Dayew, met, ed si Jehova a say Manamegley to a bilang Maabig a Pastol so mangitatarok la ed saray ondaraak a nilaksalaksan “arum a karnero” diad “sakey a pulok,” a sikara la so linmoob ed masasakbay a gunggunan onaagus ed katooan a manlapud balon sipanan!