Kapitulo 7
Panamalinew na Kuentaan diad Panangusar ed Saray Pundo nen Kristo
1. Anton gobierno so andian na anggan anton problema ed ekonomya, tan siopa natan so nakaukolan a mipalinewan ed sayan gobierno?
1 Nilikud so sakey, anggapo so gobierno ya andian na saray problema ed ekonomya. Maslak a gobierno so nikutep ed utang. Say sakey a gobiernon nilikud et say niyabawag a malaknab natan a “panarian na katawenan.” (Mateo 25:1) Wala niran siansia ed dalin iraman so prospektibon membro na satan a mangatatawen a Panarian a wala ed serbisyo diad satan a gobierno. Legan na sayan sankaatapan a panaon ed amin ya awaran na too, sarayan ariripen “na panarian na katawenan” so natawag a mikuentaan. Nakaukolan a sikara so mipalinewan ed gobierno ed no panon so impangusar da ed saray mablin bengatlan nimatalek ed sikara.
2. Akin a sikatayo so interesadon tuloy ed sakey a parabolo ya imbaga na “Prinsipe na Kareenan”?
2 Diad pangiyilustra ed sayan pamaakaran, say bantog a representante na satan a “panarian na katawenan” so abayaglan nidalatdat ed sakey a parabolo, odino sakey ya ilustrasyon. Saya so managyat ed sikatayo natan, lapud say “Prinsipe na Kareenan” so nisakup ed satan diad andukey-dampoten a propesiya to nipaakar “ed tanda” a mananda ed “kiwawala” to ed Panarian a tekep na sigpot a pakauley. (Mateo 24:3) Sikatayo natan so alanlanor ya ataker ed saray nansumpalan a tinmumbok ed kasumpalan na mapropetikon parabolo, lapud say mantultuloy a kiwawala tayo, say mismon bilay tayo so nalalanor. Sirin nia natan so dalan ya angibagaan na “Prinsipe na Kareenan” ed parabolo diad saray apostoles to ed pigaran agew sakbay na sakripisyon impatey to ed Calbaryo.
Say Parabolo na Saray Talento
3. Panon a saray ariripen ya angawat na saray talento a nanlapud katawan sakbay na intaynan to so mangasikaso ed saratan legan na inkaandi to?
3 “Mantultuloy a manbantay, sirin, lapud agyo kabat so agew nisay oras. Ta sikato so singa sano say sakey a too, a manbiahe ed arawi, et tawagen toray ariripen to tan ipudir to ed sikara iray kayarian to. Tan diad sakey et inter to so limaran talento,a diad sananey et duara, diad sananey ni et sakey, diad balang sakey unong ed dilin pakayari to, tan sikato so nambiahe ed arawi. Tampol et say sakey ya angawat na limaran talento so linma ed dalan to tan sikara so inyanap to tan akatubo na limara ni. Ontan met ed sakey ya angawat na duara so akatubo na duara ni. Balet say sakey ya angawat lambengat na sakey so linma, tan inkutkot to ed dalin tan inyamot to so pilak a kuarta na katawan to.
4. Anto so ibaga na katawan ed saraman ya ariripen ya amadaak ed bilang na saray talento?
4 “Kayari na andukey a panaon et say katawan na saraman ya ariripen so sinmabi tan akipalinewan na saray kuentaan ed sikara. Sirin say angawat na limaran talento so sinmingger tan intarok to so limaran kaaruman a talento, a kuanto, ‘Katawan, impudir mo ed siak so limaran talento; nia, siak so anubo na limaran talento ni.’ Inkuan na katawan ed sikato, ‘Maabig, maong tan matoor ya aripen! Sika so matoor ed saray daiset a bengatla. Sika so turoen ko a mangasikaso ed saray dakel a bengatla. Onloob ka ed gayaga na katawan mo.’ Ontumbok et say sakey ya angawat na duaran talento so sinmingger tan inkuanto, ‘Katawan, impudir mo ed siak so duaran talento; nia, siak so anubo na duaran talento ni.’ Inkuan na katawan to ed sikato, ‘Maabig, maong tan matoor ya aripen! Sika so matoor ed saray daiset a bengatla. Sika so turoen ko a mangasikaso ed saray dakel a bengatla.’
5, 6. Anton baraan so inter na komatlon aripen diad impangiyamot to ed talento, tan anto so imbagan gawaen na katawan ed sikato?
5 “Kaunoran et say sakey ya angawat na sakey a talento so sinmingger tan inkuanto, ‘Katawan, kabat ko a sika so sakey a toon anawet, ya anien mo so agmo intanem tan tiponen mo so agmo nansiboan. Sirin siak so tinmakot tan tinmaynan ak tan inyamot ko so talentom ed dalin. Nia alam so kayarian mo.’ Diad ebat et inkuan na katawan to ed sikato, ‘Marelmeng tan mangiras ya aripen, kabat mo, agta ontan, a siak so nanani ed agko intanem tan nantipon ed agko insibo? Bueno, sirin, nepeg mo komon ya indeposito so pilak a kuartak ed saray managbanko, tan diad insabik et awaten ko so kayarian ko a tekep na munat.
6 “‘Sirin ala yo so talento ed sikato tan iter yo ed saman so walaan na samploran talento. Ta diad siopaman a walaan, lalon dakel so niiter tan nawalaan na daakan; balet no nipaakar ed sikato ya andian, anggan saman so wala ed sikato so naala. Tan ibantak yo so andi-kakanaan ya aripen ed kabilungetan ed paway. Ditan so kawalaan na paningel tan panngalatenget na ngipen.’”—Mateo 25:13-30.
7. Anto so inrepresenta na saray talento?
7 Diad sayan parabolo, anto so inrepresenta na saray talento? Bengatlan mablin tuloy, aliwan kuarta noagta diad espiritual a pantalos. Saray talento so mangirepresenta ed kimey a manggawa na babangatan nen Kristo. Tekep na sayan kimey et wadtan so apribilehyoan a tuloy a pankanawnawan onkiwas a bilang embahadores nen Kristo, say Ari, a mangirepresenta ed Panarian ed amin a nasyones na mundo.—Efeso 6:19, 20; 2 Corinto 5:20.
8. (a) Diad anton kabilungetan so nibantakan na “mangiras” ya aripen a klase legan na sayan “konklusyon na sistema na bengabengatla”? (b) Akin a say mundo na katooan so agmanggagayaga ed liwawa na pabor tan bendisyon na Dios?
8 Agbalot nasuppiat, sikatayo natan so akasabi ed pantok na kasumpalan na sayan propetikon parabolo! Wadtan a dinmapo ed sayan kapolian so sankabilungetan a panaon ed amin ya awaran na too! Peteg, wala so matukotukoy a kabilungetan ed paway na nanengneng a kabiangan na muyongan nen Jehova ya akapangibantakan ed “mangiras” tan “andi-kakanaan” ya aripen a klase diad impangiganggan na Katawan. Say ontan a “kabilungetan ed paway” so mangiretrato ed abilungetan a kipapasen na mundo na katooan, nagkalautla ed relihyoson pantalos. Say mundo na katooan so agmanggagayaga ed liwawa na pabor tan bendisyon na Dios. Sikato so anggapo ed liwawa na pikakabat ed Panarian na Dios. Sikato so wala ed leksab “na dios na sayan sistema na bengabengatla,” ya “amulag ed kaisipan na saray agmananisia, pian say silew na maglorian maong a balita nipaakar ed Kristo, a sikato so talintao na Dios, so agkomon onsinag.”—2 Corinto 4:4.
Sankamundoan a Kaligenan diad Leksab na “Prinsipe na Kareenan”
9. (a) Diad kasumpalan na parabolo, siopa so inretrato na samay “laki,” tan panon kaarawi so nambaroyan to? (b) Anto so ebidensyan mangipanengneng ed ipawil to?
9 Natan say ebidensya so abalbaleg a say sakey ya inretrato na “laki,” a walaan na waloran talenton pilak, so pinmawil a nanlapud impanbaroy to ed biek-taew. Saman a “laki” et si Kristo Jesus. Say impanbaroy to ed biek-taew so angiyakar ed sikato diad arapan na Manamalsa na agew, bulan, tan bibitewen ed talba tayo. Diad pananda ed impawil to, duaran bakal ed sankamundoan a kalaknab, ya inulop natan na dakel nin arum a memelag iran bakal, a nanleteb na dala ed dalin. A singa nipasakbay, saraya so ulopen na saray eras, sakisakit, tan yegyegyeg, tan diad idaak na kaugsan tan say panangipulong ed “sayan maong a balita na panarian” ed amin a panaayaman a dalin. Saya so anumpal ed saray detalye na imbaga nen Jesus a “say tanda na kiwawala [to] tan ed kasampotan na sistema na bengabengatla.”—Mateo 24:3-15.
10. (a) Akin a say laki so nambaroy ed biek-taew? (b) Akin a say mundo na katooan so ag-akanengneng ed sikato a peteg diad impawil to?
10 Anggaman aliwan espesipikon nipanengneng ed parabolo nen Jesus, say lakin nambaroy ed biek-taew, a naandi ed andukey a panaon, so peteg a nanggawa ed biahe to pian nagamoran to “so panarian na katawenan,” ya asasakbay ya atukoy ed Mateo 25:1. Anggaman ed interak na Guerra Mundial I, si Jehova a Dios, a say panarian to ed Israel so agalpong nen 607 K.K.P., so angitrono ed makanepegan a Mananawir na Panarian nen 1914 K.P., diad samay nigeter a panaon ed kapatunda na kigatin-gatin. Andi, saray Hentil a nasyones so ag-akanengneng ed dilin mata ra diad inkitrono na samay Sakey a tinawag nen David na “Katawan ko.” (Salmo 110:1) Agda nanengneng lapud say laki ed parabolo, si Jesu-Kristo, so angikuan ed saray babangatan to, sakbay na impanbaroy to ed biek-taew: “Wala ni daiset tan say mundo et agtoak la nanengneng.”—Juan 14:19.
11. (a) Anto so kabiangan na tandan mananda ed ipawil tan kiwawala to? (b) Kapigan so inkagawa na saya?
11 Lapud say insabi nen Kristo ed mangatatawen a pakayari na Panarian so agnanengneng na saray mata na too, nakaukolan ton ipatnag so kiwawala to ed mangatatawen a Panarian diad panamegley na tanda a kinerew na saray apostoles to ed sikato ed samay taloran agew sakbay na impatey to. Kabiangan na saman a makakumbinsin tanda et say laki so ompawil a manlapud biek-taew tan mipalinewan ed saray ariripen to ya angimatalkan to ed saray mabmablin tuloy a talento. Diad onian kipapasen, say pipalinewan ed saraman so apalaboan na panangusar ed saray talento so nigeter a nagawa ed kayari na 1914.
12. (a) Diad siopa so angipasakbatan na obligasyon diad pangipangulo ed panangiter na panagtasi ed Panarian? (b) Say ultimon kilalaban da so mandepende ed anto?
12 Kabaliksan na saya so pipalinewan ed saraman so mananawir “na panarian na katawenan.” Saya so mananda na pipalinewan ed nakdaan na saman a Kristianon ulop, ya inilalak na espiritu na Dios nanlapulad samay agew na Pentecostes nen taon 33 K.P. (Gawa, kapitulo 2) Wala so nakdaan na saraya ed dalin legan na sayan “kasampotan na sistema na bengabengatla” nanlapulad 1914 a manpatuloy. Saraya so nipasakbatan na obligasyon a mangipangulo ed kasumpalan na propesiya nen Jesus ed satan a panaon: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14; Marcos 13:10) Diad sikara so nipasakbatan na responsabilidad diad pagmaliw a matoor ya anggad anggaan, ta pian niliktar ya onloob ed Panarian na katawenan. (Mateo 24:13) Lapud pakakanengneng ed unor a kilalaban da, say Makapanyarin-amin a Dios so amabiskeg ed sikaran mansungdo ya anggad natan, anggaman ed sankamundoan a panamasegsegang. Sayan katuaan so mangiter na ebidensya ed panangabobon to ed sikara!
Palson Panangayarian ed Saray Talento
13. (a) Siopa so mangibabagan angawat ed saray talento? (b) Ed anton panangukom ed sikato so nasabi tayo?
13 Ibabaga na Kakristianoan a sikara so magalgalang ya akapangimatalkan ed saray talento na mayaman a laki ed parabolo nen Jesus. Balet sano usisaen tayo so kurang na kiwas to nanlapulad 1914, diad anton panangukom so nasabi tayo? Saya: Sikato so agnambilay a tukoy ed saray ibabaga to. Aliwan matoor ed samay laki ed parabolo, indapag to so inkasikato ed saray panarian na sayan mundo; saray pulitiko na saratan a minumundon gobierno so kainarowan to. Siansia nin sikato so manusuporta ed Nasyones Unidas, say sandi na naandi lan Liga na Nasyones.
14. Iner so pakaromogan tayo ed Kakristianoan natan?
14 Sikato so ag-anggan mipetekan ed samay sakey-talenton aripen, ya apaneknekan a mangiras tan agto pinadaak so kayarian na katawan to. Sirin diad sayan peryodo nanlapulad pantok na Guerra Mundial I nen 1918, say Kakristianoan so pihon niwalwal a naynay a wala ed kabilungetan ed paway na maliwliwawan abung na Katawan. Diad ag-onkitakitaw a labi ed paway diad mundo a ditan, piguratibon panagsalita, so kawalaan na pannangis tan panngalatenget na ngipen to so ginmapo lan nagawa. Lalo ni so nagawa sano saray mapulitikon kainarowan to so ombuelta tan manlabos ed sikato a bilang sankaugesan a kabiangan na amin a Babilonia a Baleg, say sankamundoan ya imperyo na palson relihyon.
Nibantak So “Mauges ya Aripen” a Klase
15. Siopa so anumpal ed retrato na mangiras ya aripen, tan iner so akaromogan da ed inkasikara natan?
15 Saramay peteg a nagmaliw a kabiangan na alanaan-na-espiritun nakdaan tan angimatalkan ed saray mablin kayarian na Panarian, balet ta sikara so tinmundan manbabanikel a mamadaak ed saray intereses na pinmawil a Katawan, so nibantak a manlapud maarin serbisyo na Katawan. (Mateo 24:48-51) Agtayo la naromog so mangiras a “mauges ya aripen” a klase a mangipupulong ed “sayan maong a balita na panarian.” Noag ingen, gagawaen da so personal a kilalaban da imbes a diad saray intereses na Panarian na Dios. Naromog da natan so inkasikara “diad kabilungetan ed paway,” a ditan so kawalaan na mundo na katooan. Say simbolikon talento ra so inekal ed sikara tan niiter ed klase ya angipanengneng na inkamabulos a mangusar ed satan a talento legan na nakekeraan a kabiangan na sayan “kasampotan na sistema na bengabengatla.”
16. (a) Diad anton usar na saray piguratibon talento so sankapatnagan a panaon? (b) Anton obligasyon so nipasakbat natan ed “baleg ya ulop” na “arum a karnero”?
16 Anggapon balot so sakey a panaon a nagkalalon mabitar ed kiyaabawag na “maong a balita na panarian” diad panamegley na panangusar ed “talento,” salanti, say nikadkaduman pribilehyo, say pankanawnawa, ed ikiwas a bilang “embahadores a kasandi nen Kristo,” say manuuley ya Ari, tan manggagawa na babangatan to. (2 Corinto 5:20) Tan legan a manasingger so anggaan, nakaukolan ed “baleg ya ulop” na “arum a karnero” so panulong ed saraman so nakekeraan a nailalak-ed-espiritun embahadores legan a magunaet ya uusaren dan nagnap so mablin “talento” a nimatalek ed sikara.
[Paimano ed Leksab]
a Say sakey a Griegon talento a pilak so manbelat na 654 onsa troy (20.4 kg).