Kapitulo 6
Manbantay Legan “na Konklusyon na Sistema na Bengabengatla”
1. Akin a nakaukolan tayo so mantultuloy a manbantay?
1 Wala itayo la ed kaaralman “na konklusyon na sistema na bengabengatla,” balet “agtayo kabat so agew nisay oras” sano mangangga so panaon na manangiliktar-bilay a pakaliwawaan. Sikato no akin ya imbaga nen Jesus: “Mantultuloy a manbantay, sirin, lapud agyo kabat so agew nisay oras.”—Mateo 24:3; 25:13.
2. Anton makapadismayan eksperiensia so paliisan?
2 Peteg a makapadismaya ed sakey a too no sikato so onsabin atrasado ed pasen na piesta na kasal tan naromog ton akakaput so puerta. Ingen ontan so niganan pansumpalan na karaklan a mangibabagan Kristianos ed asingger ya arapen. Say “Prinsipe na Kareenan” so angiyilustra ed sarayan salita: “Kayari to et saray arum a mamarikit so sinmabi met, a kuan da, ‘Katawan, katawan, lukasan mo kami!’ Diad ebat et inkuanto, ‘Ibagak ed sikayo so katuaan, agtakayo kabat.’”—Mateo 25:11, 12.
3. (a) Say taon a 1919 so apaneknekan a sakey a taon ed anto? (b) Kasin saray relihyonistas ed Kakristianoan so akayarin mangiter na nakakaukolan ya espiritual a larak?
3 Nanlapulad 1919 et say espiritual a panliliwawa na saray makabat diad tulong na “larak” na Salita nen Jehova tan masanton espiritu to so akatarya, balet saray makulangkulang so manalin manaliw na espiritual a larak a manlapud saraman so wala ed Kakristianoan a mangibabagan mangilalako ed satan. (Mateo 25:9) Saray relihyonistas na Kakristianoan, anggaman kuan, so andian na dugan nengneng na larak. Sikara so agmakayarin mangiter na liwawa nipaakar ed kiwawala nen Jesu-Kristo a bilang say mangatatawen a Nobyo. Iilaloan da a sano sikara so ompatey et sikara so onla ed tawen a tampol tan miabet ed sikato, ya agla mibiang ed kimey na panagliwawa legan na sayan “konklusyon na sistema na bengabengatla.”
4. Anggad sayan petsa, anto so sinmaew a gawaen na saraman so inretrato na makulangkulang a mamarikit, tan akin?
4 Diad biek a dapag, wala raman so, singa saray espiritual a mamarikit, amaneknek a walaan na reserban “larak” na masanton espiritu tan Salita na Dios a para ed kayari-bakal a kimey ed sankamundoan a panagliwawa nipaakar “ed panarian.” (Mateo 24:14) Saramay inretrato ed parabolo nen Jesus a bilang makulangkulang a mamarikit so agmibibiang ed satan diad pangisisindag na liwawa ed sayan maong a balita na internasyonal a kakanaan. Sikara so andian na “larak” na managliwawan Salita na Dios tan masanton espiritu to, tan say Nobyon Ukom ed espiritual a templo so akatebek ed sayan insaew da. Saray kapusoan da so agnansumpal a wala ed kayari-bakal a kimey a ginawan tampol nen 1919 na saray Kristianon mamarikit a makabat diad impakatebek ed panaon tan kimey.
5. Diad anto so sinaewan na saray makulangkulang a mamarikit a pibiangan a makanakana ed kipapasen dan nikasakey ed Nobyon Ari?
5 Diad insian a manlapud saramay panusuporta ed nanengneng a muyongan nen Jehova, saray makulangkulang so onsasaew a mibibiang ed sankamundoan a panagtasi ed Panarian. Sikara ed kaunoran so akagamor na “larak” na relihyoson pakaliwawaan, balet aliwan samay dugan nengneng na larak. Agmangiter na pakaliwawaan diad suston nagagawa ed suston panaon. Sirin sikara so agmangipupulong ed mensahe na Panarian tan “say agew na panangibales ed biang na Dios tayo.” (Isaias 61:1-3) Sikara so agmangitatandoro ed Nobyon Ari a singa gagawaen na alanaan a nakdaan na mamarikit a klase.
Epekto na Silewan ed Pegley-labi
6, 7. (a) Anto so agawa ed kapegleyan-na-1930’s ya angisuhirin walaray magenap a mamarikit a mangumpleto ed pimemembro diad nobyan klase? (b) Nitawag so imano ed anton klase a nakaukolan natan a natipon?
6 Diad kapegleyan-na-1930’s, agawa so bengatlan makabkabaliksan. Say agawa so angisuhiri a say pimemembro ed espiritual a nobya nen Kristo so napno la, a wala ra ed dalin so magenap a nailalak-ed-espiritun babangatan na Nobyo a manibukel ed nagnap a bilang na mangatatawen a nobya to.
7 Diad saman a panaon, nen 1935, ginmapon nitawag so imano ed sananey a klase na malakarneron babangatan nen Jesus. Saya so klase a nitawag ed imano na publiko legan na inmunan guerra mundial. Saman so nen Pebrero 24, 1918, a nipaliwawa so teman “Nilaksalaksa La Natan a Manbibilay So Nayarin Aglan Balot Ompatey” so nipaliwawa ed sakey a mausisa, nayarin apusek-na-panduaruwa, a dumerengel. Diad samay 1935 a kumbension na saray Tasi nen Jehova ed Washington D.C., niparungtal so bengatlan positibo nipaakar ed katipon na sarayan nilaksalaksan “arum a karnero” nen Jesu-Kristo diad apankakasakey a “pulok” ed leksab nen Kristo a bilang say “sakey a pastol.” (Juan 10:16) Say pakabidbiran ed sayan kabiangan na “arum a karnero” a singa nipasakbay ed Apocalipsis 7:9-17 so nipabitar.
8. Diad silong na anton obligasyon so sinabian na saray makabat a mamarikit nen 1935, ya agda atalaranan?
8 Say nakdaan na “melag a pulok” so sinmabi natan ed leksab na obligasyon na pangigapo ed panagtipon ed sayan “baleg ya ulop” na “arum a karnero.” (Lucas 12:32) Saya so lapud say bilang na makabat a mamarikit a nakaukolan a mangumpleto ed nobya nen Jesus so apano la natan. Balet saratan a mamarikit so agtampol naawit ed tawen. Sikara ni so naawat ya onloob ed mangatatawen a pampipiestaan a kuarto sano nasumpal da so mangaraldalin a kurang da bilang manamemben-katooran a tastasi na Dios da, si Jehova. Lapud matoor a kimey da a panagliwawa ya anggad 1935, sikara so napaloob ed sakey a nikadkaduman pribilehyo ya agdan balot inilaloan sakbay na kapegleyan-na-1930’s.
9. Diad anton bilang so anguman ya anggad sayan petsa ed nakekeraan na makabat a mamarikit?
9 Masulok a kapalduan siglo so linmabas nanlapulad 1935, tan kaleganan na sarayan taon et say bilang na saray makabat a mamarikit a klase so ondaraiset. Diad biek a dapag, say kimey na panagtasi so ninmatnat ed sankamundoan a kalaknab, on, diad pangisakup ed masulok a 200 iran daldalin. Kaplesan, saray mamarikit a klase so dinmaiset ed ngalngalin 9,000 ed bilang.
Matulong Iran Kakaiba na Manag-awit na Silewan
10. Nisesengeg ed kalaknab na kimey, kasin say nakdaan na makabat a mamarikit so makayarin misukat ed pankaukolan ed komikimey?
10 Say alanaan a nakdaan na piguratibon mamarikit so ngalngalin asakuloban na masulok a taloran milyon a manangipalapag na Panarian ed masulok a 52,000 a kongregasyon na saray Tasi nen Jehova ed interon globo. Panon so pakaasikaso na melag a bilang na alanaan a nakdaan ed kimey na panagtasi ed masulok a 200 a daldalin a kawalaan na saratan a nilibulibon kongregasyon? Agda nayarian.
11. (a) Say pakabidbiran ed “matoor tan makabat ya aripen” so nansengegan na anton nagawa ed limog na saraman so mangibabagan mamarikit? (b) Anto so ag-ayarian a tebeken na saratan a “mauges ya aripen” a klase lapud kakulangan na magenap ya espiritual a pakaliwawaan?
11 Nagawaan da, siempre, so manserbin Makasulatan diad nipasakbay a posisyon na “matoor tan makabat ya aripen” ya aromog na Nobyon Katawan diad insabi to ed templo a para ed panangukom. Insan say inkaapag so ginmapon nagawa ed baetan na saray makabat a mamarikit tan saray makulangkulang ed piguratibon mamarikit a klase. Saraman so nibilang a “satan a mauges ya aripen” a klase so andian na larak na managliwawan Salita na Dios tan say masanton espiritu to diad saray kargaan da a manliwawa ed saray silewan da. Sirin sikara so andian na magenap ya espiritual a panliwawa diad panebek ed “baleg ya ulop” na “arum a karnero,” a sikara la so atipon nanlapulad 1935 a bilang kabiangan na “sakey a pulok.”—Mateo 24:45-51.
12. Siopa so nagmaliw ya agnaaknit a kakaiba na nakdaan na nobyan klase?
12 Nanlapulad Guerra Mundial II, say kasumpalan na propesiya nen Jesus ed “konklusyon na sistema na bengabengatla” so malaknab a nisesengeg ed betang a gagawaen na “baleg ya ulop” na “arum a karnero.” Say pakaliwawaan a manlapud saray aselselen a silewan na nakdaan so amasinag ed saray mata na kapusoan da, tan sikara so atulongan a mangisindag ed liwawa diad saray arum ni a nakekeraan ed kabilungetan na sayan mundo. (Ipareng so Efeso 1:18.) Atulongan daray minilmilyon a manaayam ed sayan dalin a makatebek ed kiwawala na Nobyon Ari legan a say agew na kasal to ed kumpleton nobyan klase so manasingger. Sikara so nagmaliw ya agnasian a kakaiba na nakdaan na nobyan klase.
13, 14. (a) Anton makapaliket a kipapasen no nipaakar ed saray kakaiba na nakdaan so piguratibon nidatak ed Apocalipsis 7:9, 10? (b) Anto so tampol a kiwas diad paliwawa ed satan a propesiya?
13 Nanlapulad 1935 et say betang na sarayan kakaiba na nakdaan na nobyan klase so makapalikliket. Sikara so manliliket ed aliwa lambengat ed saray engranden pribilehyo a nilooban la na nakdaan noagta ontan met ed saray mabenditon pribilehyo a gagawaen dan mismo diad panamegley na nakdaan na nobyan klase.
14 Sakey a tekston makapaliket so nilukas ed pakatalos na saray totoo nen Jehova diad kumbension nen 1935, ed Washington, D. C., tan impasakbay to so makapalikliket a kipapasen a para ed “baleg ya ulop,” saray kakaiba na alanaan. Nengnengen yo ra, “manalalagey ed arap na trono [nen Jehova a Dios] tan ed arap na Kordero, ya akakawes na saray amputin kawes; tan wala [so] sangasanga na palmas ed saray kalimaan da”! Ontalineng ed maksil ya ikekelyaw da a narengel na amin a lapag: “Say kilalaban so utang mi ed Dios tayo, a manyudyurong ed trono, tan ed Kordero”! (Apocalipsis 7:9, 10) Sikara la so angagamil na pananisia ed “Kordero na Dios a mangekal na kasalanan na mundo,” tan diad panamegley to et indedika ra so inkasikara ed si Jehova a Dios tan abautismoan diad simbolo na satan a dedikasyon. (Juan 1:29) Akin, 840 ed sikara so abautismoan ed samay agew ed kayari na impakadngel da ed paliwawa na Apocalipsis 7:9-17 nen Biernes, Mayo 31, 1935.
15. Nanlapulad saman, panon karakel so abautismoan, tan panon so inkiretrato ra ed Apocalipsis 7:14-17?
15 Masulok a taloran milyon so nanggawa met na ontan nanlapulad saman a kumbension ed Washington nen 1935. Sirin sikara so niretrato a bilang akakawes na saray amputin kawes nisengeg ed inkaurasan da ed managlinis a dala na Kordero. Tan sikara so walaan na ilalo diad pakaliktar ed baleg a kairapan a wala ed arapen na amin a mundo na katooan, unong a walaan na madibinon pananalimbeng a makalabas ed satan a kairapan. (Mateo 24:21, 22) Sirin, sikara so nidrama a bilang wala ed espiritual a templo nen Jehova tan ditan et dadayewen da a kaiba ra so nakdaan na mamarikit a klase.—Apocalipsis 7:14-17.
16. Diad siopa, sirin, so kiyapayan na daakan a pisasalamat diad biang da a misiglaotan ed kasumpalan na Mateo 24:14?
16 Salamat na baleg, sirin, ed internasyonal, dakel-a-pansasalitan “baleg ya ulop” nisengeg ed abalbaleg a biang a ginawa ra diad kasumpalan na propesiya na Nobyo ed Mateo 24:14!
“Tan say Puerta So Akaputan”
17. (a) Kapigan so kakaputan na puerta ed piesta na kasal? (b) Anto so nakaukolan ed saray nakdaan na mamarikit a klase tan say “baleg ya ulop” a kakaiba ra a gawaen natan?
17 Eksakton no kapigan so inloob na nakdaan na saray mamarikit a klase ed saray seremonya na piesta na kasal, tan say puerta so akaputan, so agkabat. Balet agnasuppiat a lalon asingger nen say nensaman, tan say panaon so nanaupot la! Matukotukoy, sirin, impanampot nen Jesus so parabolo ed saray mamarikit diad saray manamasakbay a salita: “Mantultuloy a manbantay, sirin, lapud agyo kabat so agew nisay oras.”—Mateo 25:13.
18. (a) Diad siopa so angipabidbiran na saray makulangkulang a mamarikit natan ed inkasikara? (b) Anton kabiangan na parabolo nen Jesus so maganon nasagmak da?
18 Nisengeg ed saya et saray makulangkulang a mamarikit so nabiglaan ya ag-akabantay. Diad insian da ed saray makabat a mamarikit, sikara so nagmaliw a kabiangan na sayan nigana-ed-kadederal a mundo tan indasig da so inkasikara ed amin nin arum a relihyonistas diad ompapalalon makdel a kabilungetan ed sankadalinan. Sirin sikara so niganan managmak ed samay inretrato na Nobyon Jesu-Kristo ed sarayan salita ed parabolo: “Kayari to et arum ed saray mamarikit so sinmabi met, a kuan da, ‘Katawan, katawan, lukasan mo kami!’ Diad ebat et inkuanto, ‘Ibagak ed sikayo so katuaan, agtakayo kabat.’”—Mateo 25:10-12.
19. Siopa sirin so iretrato na makulangkulang a mamarikit, tan akin a sikara so nidasig ed Babilonia a Baleg?
19 Sirin say puerta ya onarap ed piesta so agnilukas ed saraman a makulangkulang a mamarikit. Inretrato ran maong iraman so diad kaleganan “na konklusyon na sistema na bengabengatla” et sinmaew a makaloob “ed panarian na katawenan.” (Mateo 24:3; 25:1) Lapud impeket da ed pinili ran porma na relihyon, a singa impanengneng na inyakar da ed tiendaan a manaliw na arum a larak, sikara so nidasig ed Babilonia a Baleg.
20. (a) Sano nanengneng na saray makulangkulang a mamarikit so “samploran saklor” na “atap ya ayep” ya onggapon ompuliktar a sumpad Babilonia a Baleg, diad siopa so apeloan da tan diad anton ibabaga? (b) Akin a siansian nasagmak da so kadederal?
20 Kanian sirin, sano say simbolikon “atap ya ayep,” a kinabayoan na relihyoson balangkantis, so ompuliktar a sumpad sikato diad saray “samploran saklor” to, sikara so mibiang ed makapasinagem a pansumpalan to. (Apocalipsis 17:16) Sano saratan a relihyonistas, ya inretrato na limaran makulangkulang a mamarikit, so makanengneng ed sayan gapowan ed kipulisay na Binababilonian relihyon na saray mabiskeg a puersa na mapulitikan elemento, sikara so onarap ed Nobyon Ari, ya ibaga ran sikara so kabiangan “na panarian na katawenan” a klase tan manepeg ya onloob ed espiritual a piesta na kasal a kaiba na makabat a mamarikit. Makapakigtot, say sakey a pangibabagaan da na “Katawan,” say Nobyon Jesu-Kristo, so agmamidbir ed sikara a bilang manepeg ed kaawat diad mangatatawen a Panarian. Tan sikara so andian na pibibiang ed anggan anton ilalo ed maandon bilay ed dalin a kaiba na “baleg ya ulop.” Sirin anggapo so natitilak a para ed sarayan makulangkulang a relihyonistas noagta kadederal a kaiba na sankamundoan ya imperyo na palson relihyon, say Babilonia a Baleg!
21. (a) Nisengeg ed makapakigtot ya iilaloan, anton kurang so tutumboken na saray makabat a mamarikit tan saray kakaiba ra? (b) Antoran pribilehyo na serbisyo so iilaloan a panggayagaan na saray membro na “baleg ya ulop”?
21 Agaylan makapakigtot ya ilaloan da! Diad pikakabat ed saya, say nakdaan tan say ulop na saray kakaiba ra so pirmin mangiimano ed simbawa nen Jesus a “matultuloy a manbantay.” Sikaran naynay so napno na masanton espiritu na Dios tan pasisindagen da so liwawa ra ya andi-takot diad gloria nen Jehova a Dios tan si Jesu-Kristo. Makatumang, say inkagayaga so nipaseguron apag da! Tan saray maprinsipen posisyon ed “balon dalin” so manaalagar ed saray membro na “baleg ya ulop,” a singa indesigna na nankasal a Nobyon Ari.—Isaias 32:1; ipareng so Salmo 45:16.
22. (a) Say kasumpalan na parabolo ed mamarikit so manserbi a bilang pamekder ed anton katuaan? (b) Siopa so manliket ed sayan kasal na Nobyon Ari tan say marikit a nobya to?
22 Sirin sayan ninatnat a kasumpalan na parabolo na samploran mamarikit so manserbin sakey a panamekder ed katuaan a sikatayo so manbibilay “ed konklusyon na sistema na bengabengatla.” Agaylan sikatayo so misalsalamat a sikatayo so aliwawaan a makanengneng ed sayan ebidensya ed inkaasingger na kasal nen Jesu-Kristo ed kumpleton nobyan klase to! Diad sayan mangatatawen a kasal, namparan diad tawen tan say matunong a “balon dalin” so manliket ed nibalikas a gayaga.—Apocalipsis 19:6-9.