Kasin Naromog Yo So Suston Relihyon?

SI Ronald​—ya abitla ed akaunan artikulo​—so nanisip ya isuko to la so panagsukimat to ed sakey a relihyon a makapangiter ed sikato na praktikal a tulong tan panangiwanwan. Ingen ta denisidi ton ikdan to so inkasikato na ultimon pankanawnawa. “No peteg a wala so sakey a Dios, labay kon naamtaan to a siak so simamatuan manaanap ed sikato,” so inkuanto. Kanian si Ronald so nampikasi ed sakey a labi: “No sika so peteg a sakey a maaron Dios, siak so naromog mo lapud diad dakel a taon ed sika so inanap ko tan agko aromog.”

Pigaran agew ed saginonor diad trabaho to, si Ronald so apabtangan a mantrabahon kasublayan na sakey ed saray Tasi nen Jehova. Say Tasin bii so ginapoan ton tinepetan na saray tepet ed Biblia. Saray ebat so anelsel na inkamausisa to. Agnambayag et ginapoan ton aralen so Biblia a maparanay. Sikato met so linma ed miting na lokal a kongregasyon na saray Tasi nen Jehova.

Anem bulan ed saginonor et si Ronald so akumbinse ya aromog to so sakey a relihyon ya angiter ed sikato na gunaet a mamasimbalo ed bilay to diad sankapraktikalan a dalan. Kayari na taloy taon ya impilimog to ed saray Tasi nen Jehova, impaliwawa to ed sakey a sulat ed magasin a Watchtower so arum a gunggunan agamoran to a manlapud sayan pililimog.

Naandi So “Liknaan a Mamatey”

Insulat nen Ronald: “Say inmunan gungguna ed impanaral na katuaan [say bangat na Biblia] et say impagmaliw a makayarin magmaong a mangontrol ed liknaan ko. Diad andukey a panaon et siak so nipaglet ed martial arts. . . . Siak so manpapasal a manlapud anemira ya anggad waloran oras ed sakey ya agew, tan naynay a nipaslep ed siak so liknaan a mamatey.”

Say pilalaban tan panagpatey so aliwa ran epektibon dalan a panresolbe ed saray balingaan ed kaparan too. Sirin, say makanan relihyon so sakey a puersa a para ed kareenan. Ibabaga na Biblia ed Roma 12:18: “Mikareenan ed amin a totoo.” Saray Tasi nen Jehova so agmangipapasal na laman da a para ed pibakal, nisay anapen dan salimbengan so inkasikara diad panaral a mamemben ed saray paltog. Sikara so kabkabat ed interon globo nipaakar ed mareen, neutral a talindeg da ed panaon na bakal.

Diad impakanengneng ed praktikal a puersa odino pakayari na ontan a relihyon, insulat na sakey a Romano Katolikon madre diad sakey a magasin na simbaan ed Italya: “Agaylan duma so mundo no amin tayo so ombangon ed sakey a kabuasan a desididon mapekder ya agla lamet mangegna na armas, . . . a singa saray Tasi nen Jehova!”

Sayan mareen ya awawey ed limog na saray Tastasi so tinmulong diad inkaporma na sankamundoan ya impanaagi na masulok a taloran milyon a totoo ed 208 daldalin. Tatratoen da so balang sakey a singa tuan kakaaro, antokaman so nasyonalidad da, rasa, odino sosyal a talindeg. Saya so sankapraktikalan ed sakey a mundon managbusol, nagkalautla sano say tulong so nakaukolan. Si Eva, sakey a biin walad kalangweran a Sweko a sakey ed saray Tasi nen Jehova, so akaeksperiensia ed saya.

Legan ya ombibisita ed Gresya, si Eva so adapoan na meninhitis. Mankalinatey, tan asamalan so dala tan manpaparala ed loob, sikato so imbatik ed sakey ya ospital ed Atenas, ya anggapo so kabat to. Say ama to ed Sweden so pinakabatan ed panamegley na telepono. Tinawagan to so sakey a matatken ed lokal a kongregasyon na saray Tasi nen Jehova. Sayan matatken so tinmawag ed saray Tasin kabat to ed Atenas. Si Eva so tampol a dinalaw na saray Griegon kapananisiaan ya agto nin balot nabet nensaman.

Saya so mangipanonot ed sakey ya ilustrasyon ya inusar nen Pablo, a mangipapanengneng no panon a say inkasaksakey tan panangabagey so mankatambayan. Inkuanto ed 1 Corinto 12:25, 26: “Anggapo komon so inkaapag-apag ed laman, balet . . . saray kabiangan to so nepeg a walaan na parehon panangasikaso ed balang sinansakey. Tan no say sakey a kabiangan so manirap, amin nin arum a kabiangan so manirap a kaiba to.”

Saya so naeksperiensia nen Eva ed Gresya. Diad ngalngalin taloran simba et saray balon kakaaro to so ag-anaynan ed sikato ya ag-inasikaso. Sikato so inmabig tan anempet ed abung to. Inkuanto: “Peteg a naeksperiensiak so gungguna na maaron impanaagi.”

Agpilaleken “Itan a Kaaruman a Dolyar”

Ompawil itayo ed sulat nen Ronald. Kayari na impangibaga to no panon a say balon pananisia to so tinmulong ed sikaton mangontrol na liknaan to, akapaliis ed satan a “liknaan a mamatey,” tan nagmaliw a lalon mareen, inkuanto a say bangat na Biblia so angiter ed sikato na asimbang a panmoria ed trabaho tan kuarta. “Siak so numero unon operator na komputer na amok,” so inkuan nen Ronald, “tan siak so mabetbet ya anggapo ed pamilyak tan kakaaro pian manobertaim ed trabaho. Siak so nantrabaho ed saray labi diad masulok a pitoran taon. Labay kon naynay itan a kaaruman a dolyar.”

Say ontan a pilalek ed “satan a kaaruman a dolyar” so, diad pambayag, so makaderal, makapatey. “Diad arum, say kuarta et kabaliksan to so kaligenan. Diad arum et kabaliksan to so pakayari. Diad arum et kabaliksan to so pakayari lambengat a manaliw na aro, tan diad komapat a grupo et kabaliksan to so laslasan tan pananalo ed galaw,” so inkuan nen sikiatristan Jay Rohrlich, a saray kliente to so kaslakan et ehekutibo na pinansyal ed distrito na New York’s Wall Street.

Nankomento ed sayan balikas, sakey a report ed magasin a Science Digest so angikuan: “Say pananisian say kuarta so makapawala ed sarayan bengatla . . . so mabetbet a mangitonton ed ikapuy, agpakaugip, kaataki ed puso tan saray problema ed asawa odino ananak.” Say simbawa na Biblia so: “Komon say nengneng na bilay yo so bulos ed aro ed kuarta.” Satan so naaralan nen Ronald tan inyaplika to. Satan so aromog ton makagunggunan tuloy.​—Hebreos 13:5.

Manepeg a Panmoria ed Trabaho

Say pampilalek ed kuarta so mabetbet a managyat ed totoon mangipuersa na inkasikara diad takayan na karera. Saya so nayarin mangiter ed saray mabunigas a totoo na ansakit a pakadetdetan tan emosyonal a gonigon​—angga ed punto na pambitkel. “Sakey a laki, a mantatrabaho ed sakey a kabuasan so akaromog a say lamisaan to so indere, sinmegep ed tuktok na bilding tan tinmabuy.” Inkuan nen Dr. Douglas LaBier ed sakey ya interbio na U.S.News & World Report nipaakar ed siglaotan na karera tan emosyonal a problema.

“Say nakakaukolan,” kuan nen Dr. LaBier, “et say lalon abayuboan a bilay, sakey ya agnisentron tuloy ed liber na sakey a karera. Niarum ed ontan iran bengatla a singa say magenap a panangan, painawa tan ehersisyo, ed saray totoon malabay na lalon asimbang a bilay so nakaukolan a manisip nipaakar ed panggawa na lalo ed saray pamilya tan pamayubo na saray aliwan-kareran kagnapan a mangiter ed sikara na liket.”

Nanaaralan na saray Tasi nen Jehova ed Biblia so pagmaliw ya asimbang no nipaakar ed trabaho tan kuarta. Sasalitaen na Eclesiastes 4:4, 6 so nipaakar ed impasyan kimey a manasaglawi ed “panlalaslasan ed balang sinansakey” tan kuanto: “Magmaong so sankaakup a painawa nen say duaran kaakup na impasyan kimey tan panguusil ed dagem.” Saya so aromog nen Ronald a praktikal a kakabatan. Binawasan to so sekular a trabaho to ta pian nawalaan na malaem a panaon diad saray espiritual ya intereses to tan nipaakar ed pamilya tan kakaaro to.

Sakey a Malikliket a Bilay na Pamilya

Insan imbaga nen Ronald ed sulat a say simbawa na Biblia ed panangasawa tan bilay na pamilya so tinmulong ed sikaton mideneng a lalon makabat ed saray situasyon na pamilya. Saya so nakaukolan natan sano say bilay na pamilya so singa napapaulian ed dakel iran pasen. Saray industrialisadon bansa so mangirereport na mandaiset a pankakasal, lalon dakel a diborsyo, tan nagegeban karakel na ninianak.

Sayan kalareker so makapakigtot lapud say sirkulo na pamilya so kapepenekan na sankamanunaan iran nakakaukolan na too. Diad sakey ya impanusisa, say Australianon Sydney Morning Herald so anepet ed 2,000 totoo no dinan ed saray onggendan so angiter ed sikara na sankabalgan a kapenek: trabaho, pamilya, kakaaro, saray panagrelaks, kaykayarian, odino relihyon. Say abalbaleg a bilang et inikdan da so “pamilya” na ununan lugar.

Saray Tasi nen Jehova so interesado diad pamasiansian mabiskeg ed saray pamilya ra. Alimbawa, diad apalabas lambengat a limaran taon, saray duaran magasin da a The Watchtower tan Awake! (nantekep na sirkulasyon na 22 milyon a kopya ed masulok a 100 lenguahe) so angitarok na 60 praktikal ya artikulo nipaakar ed panamemben ed nanduruman kipapasen ed bilay na pamilya. Andi-duaruwa, say niletneg-ed-Biblian relihyon ya ontutulong ed totoon mangasikaso ed pamilya ra ed makabat tan maaron dalan so praktikal.

Naebatan So Baleg ya “Akin?”

Sinampotan nen Ronald so sulat to a kuanto: “Wala so sakey a bengatlan mabetbet a nanonotan sano basaen ko so peryodiko, manbantay ed balita, mitongtong ed saray katrabahowan, odino ibaga ed arum so nipaakar ed pananisia. A say impagmaliw kon sakey ed saray Tasi nen Jehova so angiter ed siak na ebat ed sakey ed saray sankalaknaban a nitetepet iran tepet ed mundo​—‘Akin?’ Akin ya onia lan amin a krimen, karawalan, bakal, imoralidad, sakit, gulo, nilikud ed amin ya inagew-agew a problema? Diad pikabat a sayan sistema tan saray problema to so temporaryo lambengat so amalemew ed ambelat a detdet diad saray takeb ko.”

Ipaparungtal na Biblia no anto so wala ed benegan na saray magonigon a kipapasen natan ed mundo. Ipapaliwawa to no akin a say orihinal a gagala na Amalsa a panggawa ed sayan dalin a sakey a paraison ayaman a para ed totoo so agnagmaliw a petepeteg. Ipapaliwawa to no panon so pangekal na Dios ed amin na saray makadisturbon impluensya ed dalin tan iletneg so permanentin paraiso a panggayagaan na totoo ed ando lan ando.​—2 Pedro 3:9-13.

Pian say relihyon so walaan na praktikal a kablian, nepeg a mamawala na maabig a bunga. Nepeg a mamawala na magmaong a totoo. Nepeg a nayarian ton ipaliwawa no akin a saray bengatla so wala ed ontan diad dalin natan. Tan nepeg a mangipaslep na maseguron ilalo a para ed arapen diad kanonotan tan puso na totoo. Sinukimat nen Ronald so ontan a relihyon, tan aromog to. Say parehon pankanawnawa so siansia nin lukas ed sikayo.​—Mateo 7:17-20.

[Litrato ed pahina 5]

Tatratoen na saray peteg a Kristianos so balang sakey a bilang tuan kakaaro