Espiritismo​—Panon So Impanmoria na Dios ed Satan?

“SAY panlabay tan agpanlabay so parehon bengatla, saya so manggawa na mabiskeg a pankakaaro,” so inkuan nen Sallust a Romanon historyador. Peteg, say sakey a kaaro so sakey ya onwala ed sika a kaslakan, sakey a toon napanmatalkan mo. Ontan met, say Dios so onnengneng ed sikatayo a bilang kakaaro tan abuloyan to itayon onasingger ed sikato no labay tayo tan aglabay iray parehon bengatla ya agto labay. Kabaliksan na saya a sikatayo so nasagyat ed ontan iran kalidad na Dios a singa say aro, deen, panangasi, tan kaabigan, tan manggawa na magunaet a sagpot diad pangalig ed sarayan ugali ed bilay tayo.​—Galacia 5:22, 23.

Pian naromogan no say espiritismo so abobonan na Dios, nayarin usisaen tayon ununa iray bunga to. (Mateo 7:17, 18) Kasin satan so ontulong ed sikatayon mamayubo ed sarayan makasagyat a maridios a kalidad? Pian naromogan, onnengneng itayo ed duaran peteg-ed-bilay ya eksperiensia.

Dibinasyon, Panamairap, tan Patey

Si Asamaja Amelia, sakey a kapegleyan-ed-edad a bii ed Suriname, so manedad na 17 taon sanen sikato so inmunan alanlanor ed dibinasyon, sakey a porma na espiritismo. Lapud saray pasakbay to so tinmua tan saray manag-usisa so agunggunaan ed serbisyo to, sikato so pinagalangan a maong ed komunidad to. (Ipareng so Gawa 16:16.) Balet sakey a bengatla so angonigon ed sikato.

“Saray espiritun nansalita ed panamegley ko so mapangasi ed saraman so onkerew na tulong da,” kuanto, “balet ontan met a ginawa ra so bilay ko a miserabli. Kayari na kada sesyon, naliknak a siak so pepekpeken tan ngalngalin agmakagalaw. No nasabi labi, ilaloan ko so manpainawa, ingen saray espiritu so agmanaynan ed siak. Sikara so pirmin mangogonigon ed siak, a mitongtong ed siak tan pansiansiaen da ak ya aliing. Tan diad saray bengatlan imbaga ra!” Sikato so maningas na aralem tan onyuko, iwegweg to so ulo to diad gonigon. “Labalabay dan tongtongen so nipaakar ed sekso tan ipilit da so pirelasyonan ed siak. Saman so makapakebbiew. Siak so walaan na asawa. Agko labay a siak so magmaliw a malamang tan imbagak so ontan ed sikara. Ag-akatulong. Aminsan et sakey ya agnanengneng a puersa so analona ed siak, diniwit tan niyegyeg to so laman ko, tan kinabil toak ni ingen. Aliknak a siak so naaponan.”

‘Saray espiritun mangipapaseseg na seksual ya imoralidad? Arawin tuloy!’ nayarin ikuan yo. Kasin saratan ya espiritu so ontan lan peteg ya inkarutak?

“Lalo nin mauge-uges!” kuan nen Izaak, ya asaglawin akauna. “Sakey a labi et tinawag kami ya ontulong ed sakey a biin mansasakit a ginulo na sakey ya espiritu. Say pangulo na grupo​—say medyum na sakey a mabibiskeg ya espiritu​—so analin mangablog ed espiritu. Diad interon sanagew et impikasi mi so tulong na espiritu to. Sikami so nansasayaw tan nantatambol, tan nankalkalna et say bii so inmaligwas. Ingganggan ton ompaway so espiritu to, tan saya so agawa. ‘Agamoran mi so impambiktorya,’ so inyimis na pangulo. Insan sikami so yinmurong tan nanrelaks.”

Saray manandawes a taklay nen Izaak so nampainawan magano legan a sikato so nanumameng a makabaliksan. Insan intuloy to: “Diad agano et amin so singa nengneng to so maong, balet kabekta et wala so eyag ya amuyak ed kareenan. Binmatik kami ed abung a nanlapuan to tan anengneng mi so asawan bii na lider. Sikato so maneyag a manakis. Diad loob na abung, aromog mi so anak ton bii a melag​—say ulo to so apuliwes ed beneg! Arum a puersa so amuliwes ed beklew, a pinatey ton singa sakey a manok​—mapatnag, saman so bales na pinapaway ya espiritu. Makapasinagem! Saraman ya espiritu so sadistikon managpatey.”

Espiritismo tan “saray Gawa na Laman”

Karutakan, seksual ya imoralidad, tan panagpatey​—a singa naabet ed sarayan duaran eksperiensia ed espiritismo​—so ugugalin direktan sumpa ed personalidad na Dios. Tan satan so ontulong a mamidbir ed no siopa a peteg iratan ya espiritu. Nayarin sikara so mankunkuanan a mensahero na Dios, balet saray imoral tan panagpatey a gawa ra so mamaneknek ya umaalig ed kabusol na Dios tan inmunan managpatey ed awaran, si Satanas a Diablo. (Juan 8:44) Sikato so pangulo ra. Sikara so katulongan to​—marelmeng iran angheles, odino dedemonyo.​—Lucas 11:15-20.

Balet nayarin itepet yo: ‘Kasin sarayan satanikon ugugali so ompanengneng lambengat ed espiritismo diad saray nikadkaduman okasyon? Kasin say espiritismo a bilang totontonen so mangipasen ed siak diad pitalosan ed saray maabig ya espiritun ontulong a mangitarok ed siak ya onapit ed Dios?’ Andi, inlista na Biblia so “panag-agamil ed espiritismo” a kaiba na arum a “gawa na laman” a sikara so direktan sumpa ed saray Kristianon kalidad.​—Galacia 5:19-21.

Diad Apocalipsis 21:8 “saraman so mangaagamil na espiritismo” (“saraman so mitongtong ed saray dedemonyo,” The Living Bible) so nipasen ed parehon kategorya a singa “saraman so andian na pananisia tan saraman so makapadimla ed karutakan da tan managpatey tan managlawan . . . tan saray managtalintao tan amin a matitila.” Panon so pangipasen nen Jehova ed saray managgagalan matitila, managlawan, managpatey, tan manag-agamil na espiritismo? Gulaen toray gawa ra!​—Uliran 6:16-19.

Say pangusisa ed espiritismo, sirin, so mansumpal diad pangaro ed saman so gugulaen nen Jehova a Dios. Sikato so singa panangipulisay ed si Jehova, ya ompasen ed kampo nen Satanas, tan ondapag ed manunan-kabusol na Dios tan saray katulongan to. Natan et saya pa so isipen: Kasin labay mo so onapit ed sakey a toon ondadapag ed saray kakabusol mo? Siempre andi. Imbes, sika so mansiansian onarawi ed satan a sakey. Mapatnag, sirin, nailaloan tayo so parehon kiwas a manlapud si Jehova a Dios. Ibabaga na Uliran 15:29, “si Jehova so arawi a manlapud saray marelmeng.”​—Nengnengen met so Salmo 5:4.

Say Espiritismo So Mangitonton ed Patey

Say piuumen ed espiritismo so mangyan met ed bilay diad kaatapan. Satan so impasen na Dios a bilang sakey a sengegan na dusan patey diad limog na totoo to ed kadaanan ya Israel. (Levitico 20:27; Deuteronomio 18:9-12) Sirin onsabin agpankelawan a saray manag-agamil na espiritismo so “agmakatawir ed panarian na Dios.” (Galacia 5:20, 21) Noag ingen, “say betang da so diad dayat a mandarlang ed apuy,” a kabaliksan to “so komaduan ipapatey,” odino maandon kadederal. (Apocalipsis 21:8) Tua, natan et arum ed saray iglesia na Kakristianoan so nayarin mangiyabuloy ed espiritismo, balet say punto de bista na Biblia so ag-anguman.

Anto no ginawa yo la so ununan kundang diad dalan a mamaarap ed espiritismo? Sirin maabig no sikayo so ontundan tampol tan ompuliktar. Tumboken so madibinon apuyanan a simbawan inter nen propeta na Dios a si Isaias ed saray Israelitas nensaman. Say kipapasen da so miulibay ed saray totoo natan ya akibiang ed marutak iran gawagawa balet ta iisipen dan sikara so mandadayew ed Dios met. Sirin, walaray makanan leksion ed eksperiensia ra. Antoran leksion?

Imanoen So Pasakbay nen Isaias

Say inengneng ed ununan kapitulo na Isaias so mangipanengneng a saray Israelitas so “anaynan ed si Jehova” tan “binmeneg.” (Bersikulo 4) Anggaman sikara so sinmuawi, sikara so nantultuloy ya angipresenta na saray bagbagat, a gagawaen daray relihyoson susumpalen, tan mangiyaapay na saray pikakasi. Balet kaapaan! Lapud sikara so kulang na akindalem a pilalek a mamaliket ed Amalsa ra, imbaga nen Jehova: “Iyamot ko so matak ed sikayo. Anggamano sikayo so manggawa na dakel a pikakasi, agak ontalineng.” Saraman ya Israelitas so inmalsa a sumpad sikato diad impanggawa ra na marutak, anggan diad punton ‘pinano ra so kalimaan da ed dala.’​—Bersikulo 11-15.

Diad silong na antoran sirkumstansya a sikara lamet so awaten nen Jehova? Imanoen iray nakakaukolan a nidatak ed Isaias 1:16. Inkuanto: “Manuras kayo; manlinis kayo.” Sirin no satan a simbawa so awaten tayo a seryoso, itunda tayo odino ompaliis a manlapud saray gawan marutak, a pati say espiritismo, sakey ed “saray gawa na laman.” Lapud amta tayo a say mauges a nonot ed benegan na espiritismo et si Satanas a Diablo, bayuboan tayo so panggula ed satan.

Sirin nepeg tayon ekalen so amin iran kagawaan a misiglaotan ed espiritismo. Ontan so ginawa nen Izaak. Inkuanto: “Sakey ya agew et tinipon ko so amin ya espiritistikon kagawaan ko diad arapan na abung ko, inalak so wasay, tan sikara so nilalatakan kon minisimisi. Kinmelyaw so kaabay ko a siak kono so magbabawi ed ginawak. Legan a sikato so maneyag, inkalbok so gasolina ed saray pirapiraso tan sikaran amin so pinuulan ko. Anggapo so atilak.”

Saman so 28 taon lan linmabas. Kasin nagbabawian nen Izaak so ginawa to? Diad kasuniyan. Natan, sikato so manlilingkor ed si Jehova a malikeliket bilang sakey a Kristianon ministro ed sakey ed saray kongregasyon na saray Tasi nen Jehova.

Say Isaias 1:17 so mangiter ed sayan malaknab a simbawa: “Aralen a gawaen so maong.” Satan so mankakaukolan na panagaral ed Salita nen Jehova, say Biblia, ta pian naromog no anto so “maong tan makapaliket tan ayadyarin linawa na Dios.” (Roma 12:2) Tan say pangiyaplika ed satan a balobalon aromog a pikakabat so mangitonton ed saray makarepreskon bendisyon. Ontan so aromogan nen Asamaja.

Anggaman ed ampait ya isusumpa a manlapud saray kakanayon tan kakaabay, si Asamaja so sitetepel a nanaral ed Biblia diad saray Tasi nen Jehova tan agnambayag kayari na saman et sikato so linmukpos ed espiritismo. Insan indedika to so bilay to ed si Jehova a Dios tan abautismoan legan na sakey ya asamblea. Natan, 12 taon la ed saginonor, inkuanton misalsalamat: “Nanlapulad inkabautismoan ko, siak so agla ginonigon na saray espiritu.” Tan nanonotan to a manim-imis: “Diad samay labi ed kayari na inkabautismoan ko, say ugip ko so maitlep tan ag-adisturbo a siak so atrasadon binmangon a para ed ontumbok a programa na asamblea ed kabuasan.”

Magnayon Iran Gungguna

Natan, si Izaak tan si Asamaja so malikeliket a mangibaga na singa inkuan nen salmista Asap: “Say iyaasingger ed Dios so maabig ed siak.” (Salmo 73:28) Peteg, say iyaasingger ed si Jehova so angitarok ed sikara na pisikal tan emosyonal iran gungguna. Balet manuna ed amin, angiter ed sikara na akindalem a kareenan tan maapit a relasyon ed si Jehova.

Saray ontan a bendisyon so manalonan tuloy ed ot-ot tan banikel a nakakaukolan diad pangekal ed pako na espiritismo. Say ilukpos ed satan, anggaman kuan, so nayarin mairap.

[Litrato ed pahina 5]

Isasalaysay nen Asamaja Amelia: “Saray espiritu . . . so nanggawa ed bilay ko a miserabli. . . . Tan saray bengatla ya imbaga ra!”