Espiritismo—Akin ya Ontan lan Ombabaleg ya Interes?
SI Frans so sakey a seklang na iglesia na Protestante ed lokal. No wala so kimey a gawaen ed simbaan, sikato so ununan mangiter na tulong. Si Wilhelmina so matakot ed Dios met. “Nakaukolan a sika so onla ed simbaan,” kuanto, tan sikato so onla. Si Ester so onaatendi met a maparanay ed simbaan tan agto papalabasen so sakey ya agew ya agmandasal. Amin dan talo so walaan na masulok nen sakey a bengatlan pampaparaan: Sikara met so espiritun medyum.
Sarayan taloran manaayam ed Suriname so agda bukbukor. Sankamundoan, wala so onlalaganap ya interes ed espiritismo. Imanoen: Diad Estados Unidos lambengat et ngalngalin 30 magasin a walaan na nantetekep a sirkulasyon a masulok a 10,000,000 so nideboto ed nanduruman lawak na psychic phenomena. Sakey a kinalkulon 2,000,000 a totoo ed Inglatera so interesado ed parehon tema. Sakey ya agano nin impanusisa ed Netherlands so angipanengneng a saray mananisia ed mabiskeg-nen-natural a nagawgawa so naromog ed limog na saray manaayam ed angkabaleg-a-syudad, saray edukadon tuloy a totoo, tan saray walad kalangweran a totoo. Nagkalalo ni, a singa natasian na saray manaayam ed Africa, Asia, tan Latin America, ed dakel iran daldalin a say espiritismo so nagmaliw a kabiangan na inagew-agew a panagbilay. Agpankelawan a saray autor a si John Weldon tan si Clifford Wilson so angisara ed libro ran Occult Shock and Psychic Forces: “Sakey a malaknab a panduruma na saray komentarista so singa manliknan sikatayo so wala ed sakey a panaon na ag-atalaran a kipawil na okulto.”
On, say espiritismo tan say okulto—ed saray porma na astrolohya, hipnotismo, parasikolohya, extrasensory perception, mahika, panangipatalos ed saray kugip, tan arum nira—so mangaatraka ed saray totoo ed amin a kurang na bilay. Akin?
Nipaakar ed sakey a bengatla, arum ed saray iglesia na Kakristianoan so akinunong tan angitangguyor ni ingen ed espiritismo. Isusuhiri ra a say pitatalosan ed saray espiritu so sananey lambengat a paraan na pakaasingger ed Dios.
Singa sakey ya alimbawa, si Izaak Amelo, manedad na 70 taon a negosyante ed Suriname. Diad pitoran taon et sikato so pinagalangan a membro na konsilyo na iglesia tan sakey a bantog ya espiritun medyum met. Nanonotan to: “Kada Sabado et say interon konsilyo na iglesia mi so mantitipon ed paway na baryo pian ompanon ed saray espiritu. Mantultuloy kami ed interon labi. Sano onsabi so ontumbok a kabuasan, say diakono so manbantay ed relo to, tan diad ngalngalin alasinko, sikami so sinyasan ton ontunda. Diad satan et sikami so manames, manpales, tan mamaarap ed simbaan—a dugaruga a para ed panagdayew ed kabuasan na Simba. Amin na saraman a taon et say pastor so agbalot angibaga na anggan aminsan ya agpanangabobon a salita.”
Kayari na impanaral ed siglaotan na espiritismo tan saray iglesia ed Suriname, pinekderan nen Propesor R. van Lier a Dutch a dakel so manmorian say espiritismo so sakey a “suplementaryon relihyon.” Diad sakey ya impanaral ya agano nin impalapag na Leiden University, naimano to met a say espiritismo so binidbir a bilang “kabiangan na malaknab a relihyoson konstitusyon ya ontalindeg a kaampar na Inkakristiano.”
Balet nayarin morekdeken yo, ‘Kasin say pangawat ed espiritismo na saray iglesia na Kakristianoan so paseguro a satan so inabobonan na Dios? Kasin say pitalosan ed saray espiritu so mamaasingger ed sika ed sikato? Anto so peteg ya ibabaga na Biblia nipaakar ed espiritismo?’
[Litrato ed pahina 3]
Anonotan nen Izaak Amelo so impibiang to ed sakey ya interon konsilyo na iglesia ed saray espiritistikon sesyon