Kapitulo 18
Kasin Sika So Matoor ed Balon Ari na Dalin?
1. Sanen nipresenta si Jesus a bilang Ari nen 33 K.P., panon so inkiwas na ulop?
1 Nen Nisan 9 na 33 K.P., impresenta nen Jesu-Kristo so inkasikato ed saray Judios a bilang Ari ra, say nisipan a Mesias. Sanen sikato so linmeksab ed Palandey na Olivo a mamaarap ed Jerusalem, say ulop na babangatan so nanliket tan indayew da so Dios lapud saray makapanyarin gawa nen Jesus. (Lucas 19:37, 38; Zacarias 9:9) Balet kasin paneknekan da so inkasikara a matoor ed saman a Sakey ya inlugay da a bilang Ari? Say katooran da so agnambayag et niiyan ed subok.
2. (a) Panon so ikikiwas natan na dakel a totoo ed anunsyo a si Kristo so balon Ari na dalin? (b) Balet antoran tepet so mankanepegan na seryoson panangimano?
2 Nanlapulad 1914 say niglorian Jesu-Kristo ya aktibon manuuley ed tawen so nipresenta ed amin a katooan a bilang balon Ari na dalin. Say ilalo ed bilay diad leksab na gobiernon wala ed lima nen Kristo, a tekep na peteg a solusyon ed saray problema na katooan, so anagdag ed saray totoo ed amin a nasyones a manliket. Balet paneknekan da kasin sikara so matoor? Anto so nipaakar ed sikatayo a bilang sinansakey?
Say Dilin Rekord na Katooran na Ari
3. (a) Akin a si Jesus so atukoy a bilang “matoor a sakey” nen Jehova? (b) Anto so katooran?
3 Si Jesu-Kristo so angiter na daakan ya ebidensya a say dilin katooran to ed si Jehova, say Sankatalbaan a Soberano, so agnagiing. Sikato so matukotukoy ya atukoy ed Kasulatan a bilang “matoor a sakey” nen Jehova. (Salmo 16:10; Gawa 2:24-27) Say Hebreon salita a para ed “katooran” a nausar dia so nankarga na kaisipan ed pagmaliw a maaron mapangasi. Aliwan bengatlan ambetel, a nibase lambengat ed ganggan o inkahustisya, noagta pinakiwas met na aro tan apresasyon.—Ipareng so Salmo 40:8; Juan 14:31.
4, 5. (a) Panon a say katooran nen Jesus so nipanengneng ed tawen, kayari na intunganga nen Satanas? (b) Panon so inkipanengneng na satan a katooran met diad dalin?
4 Diad tawen, sanen inggapo nen Satanas ya anapen ed inkasikato so galang a kayarian lambengat na Dios tan sanen arum ed saray angheles so anaynan ed manepeg a pasen da ed mangatatawen a muyongan nen Jehova, say panguloan ya Anak na Dios so ag-angalig ed espiritu ra. Agto inisip a gawaen so ontan! Say wala ed sikato et say dilin-sakripisyon debosyon a, diad pananumpal ed linawa na Ama to, sayan matoor ya Anak so anaynan ed mangatatawen a gloria to, nagmaliw a sakey a too tan insuko to ni so inkasikato ed patey diad panamairapan a kiew. Simamaaro, seniguro to ya, anggad mandepende ed inkasikato, anggapo so detalye ed Kasulatan a nidatak ed sikato ya ag-asumpal.—Filipos 2:5-8; Lucas 24:44-48.
5 Legan a wadia ed dalin si Jesus, indapo nen Satanas so baleg a pananeldet ed sikato pian pabenegen to ed kimey ya inter na Dios ed sikato a gawaen—no nayari, ayaten ton manggawa na bengatlan mansumpal ed pangipulisay na Dios a mismo ed Anak to. Dinagdag to si Jesus a manggawa ed saray bengatlan nayarin mansumpal ed inkaprominente tan pakayari—balet bilang kabiangan na mundo a si Satanas so manuley. Saman so impulisay nen Jesus, a nanaon ed Sagradon Kasulatan a bilang giya to. (Mateo 4:1-10) Si Jesus so walaan na saray matalonan abilidad tan saratan so inusar ton maong, balet naynay a mitukoyan ed linawa nen Ama to. Sikato so okupadon nagnap diad panaggawa ed kimey ya angibakian na Dios ed sikato a gawaen. (Juan 7:16-18; 8:28, 29; 14:10) Agaylan maabig ya ehemplo na katooran!
6. Diad anton dalan a say tumang a niiter ed si Jesus so mankaukolan na katooran ed sikatayo?
6 Lapud apaneknekan a katooran nen Jesus, sikato so pinaoli nen Jehova a nanlapud saray inaatey, “intandoro to ed sankatageyan a betang tan sipapangasin inter to ed sikato so ngaran a wala ed tagey na amin nin arum a ngaran, ta pian diad ngaran a Jesus et amin a pueg so ontalimukor . . . tan amin a dila so silulukas a mamidbir a si Jesu-Kristo so Katawan diad kigloriaan na Dios ya Ama.” (Filipos 2:9-11) Sayan “ngaran a wala ed tagey na amin nin arum a ngaran” so mangirepresenta na pakayari tan pakauley a nipabtang ed si Jesus ta pian nasumpal to so linawa nen Jehova. Say ‘italimukor na pueg’ ed sikato et kabaliksan to so panamidbir ed posisyon to tan isusuko ed autoridad to. Sasakupen to so pagmaliw a matoor ya uuleyan to a bilang Ari.
Matoor ya Aro a para ed Saray Nilanaan nen Jehova
7. Nipaakar ed antoran pamaakaran a saray patumbok nen Jesus so asubok no nipaakar ed katooran da?
7 Say katuaan a, kayari na insegep to ed tawen, si Jesus so agla nanengneng na mata na totoo so mansumpal ed manangusisay-puson subok na katooran ed saray patumbok to. Kasin sikara so manbilay ed saray prinsipyo ya imbangat to ed sikara? Kasin sikara so mansiansian biig ed mundo? Kasin respetoen da raman so angipabtangan na masanton espiritu na responsabilidad na panangasikaso? Kasin sikara so sigpot-kamarerwa diad panggawa ed kimey ya impabtang to ed sikara?
8. Anto so inretrato na matoor ya aro diad baetan nen Jonatan tan si David?
8 Diad nigeter a panaon et say “arum a karnero” so natipon a mikasakey ed “melag a pulok” a mananawir ed mangatatawen a Panarian. Kasin sikara so tuan mangapresya ed nipabtang a talindeg da a misiglaotan ed si Kristo a bilang Ari tan diad sinansakey? Saray katuaan so mangipanengneng ya abayuboan so puron maapit ya arowan ed limog na amin na saraman so kabiangan na “sakey a pulok” ed leksab nen Jesu-Kristo. Saya so inyanino na samay agnabuyak, agnaumas ya aro nen Jonatan, ya ilalak nen Arin Saul, ed si David. Diad impakatasi to ed nagnap a debosyon nen David ed si Jehova tan panagmatalek to ed Dios diad impamatey to ed si alan a Goliat, si Jonatan so atenyeg a tuloy tan say “mismon kamarerwa to so nisiglaot ed kamarerwa nen David, tan si Jonatan so ginmapon mangaro ed sikato a singa dilin kamarerwa to.” Say panangaro to so agkinmesay sanen pinmatnag ya impabtang nen Jehova so inkaari ed si David tan aliwan diad si Jonatan. Si Jonatan so aminpigapigan impusta to ni so bilay to a para ed si David.—1 Samuel 17:45-47; 18:1; 23:16, 17.
9. Panon a say miulibay a katooran so impanengneng na saray aliwan-Israelitas a nanserbi ed armada nen David?
9 Likud ed si Jonatan, walaray aliwan-Israelitas ya angisiglaot na inkasikara ed si David. Sikara so aliwan inupaan a komikimey noagta mabayanin lalakin kinmiwas diad debosyon ed si David a bilang nilanaan nen Jehova. Diad limog na saraya et saray Sereteo, Peleteo tan saray datin tubon Pilisteon syudad na Gat. Sikara so matoor ya angidapag ed si David sanen si Absalom ya ilalak to so sipapalikdon angegemtan diad impanangguyor ed kapusoan na saray lalaki na Israel. Anggaman ed inkapromeninte tan kasiliban nen Absalom, sikara so agnipaarap ed tinatraidor a kurang diad malamuyot a salita to.—2 Samuel 15:6, 10, 18-22.
10. (a) Panon a say maapit a relasyon ed limog nen Kristo, say alanaan a nakdaan tan say “arum a karnero” so niretrato ed Salmo 45? (b) Diad anton pantalos a ‘saray kakaiban mamarikit so linmoob ed palasyo na ari’?
10 Sananey a makapaligsay-puson salaysay ed siglaotan na limog nen Kristo, say alanaan a nakdaan tan say “arum a karnero” so naromog ed Salmo 45. Saya so aliwa lambengat a marakerakep ya anlong noagta propetiko ed Mesianicon Panarian—a say Dios a mismo so “trono,” salanti, say pundasyon tan suporta na inkaari nen Jesus. (Salmo 45:1-7; Hebreos 1:8, 9) Dineskribre na salmista so nobya nen Kristo, “say anak a bii na ari,” a niyakar ed Ari diad agew na kasal to. Kaibay “toray mamarikit . . . kakaiba to.” Siopa iraya? Sikara so maniilalo ed arapen diad pagmaliw a mangaraldalin ya uuleyan na Panarian na Dios. “Tekep na panliket tan inkagayaga” et sikara so manguulop ed “nobya” a klase ya anggad say unor ed saraya so nikasakey ed si Kristo diad tawen. Kaiba da ra, sikara so “onloob ed palasyo na ari,” aliwan diad isegep ed tawen, noagta diad pangiyapay da na inkasikara ed serbisyo na Ari. Kasin nagmaliw ka a kabiangan na satan a maliket a libot?—Salmo 45:13-15.
Anto So Nakakaukolan na Katooran ed Sikatayo?
11. Antoran kipapasen so mangyan ed sikatayo diad subok no nipaakar ed “agpagmaliw a kabiangan na mundo”?
11 Saray agnabilang a kipapasen ed bilay so mangipanengneng no anto itayon nengneng na totoo. Peteg kasin sikatayo so manisia ed Mesianicon Panarian nen Jehova? Kasin satan so peteg ed sikatayo? Imbaga nen Jesus a saray tuan patumbok to so “aliwan kabiangan na mundo.” Kasin satan so tua ed sika?—Juan 17:15, 16.
12. Anggaman sikatayo so ag-ayadyari, diad antoran malaknab a dalan a niiter tayo so ebidensya na katooran?
12 Diad kipapasen tayon ag-ayadyarin totoo, say katooran so agmankerew na inkayadyari. Balet mankaukolan a paliisan tayo so ginagalan pananumlang ed saray ganggan na Dios, balanglan sikatayo so nanengneng na arum a totoo odino andi. Tenyegen to itayon manggunaet a mangiyaplika ed saray prinsipyo na Biblia a nagnap, imbes a nengnengen no panon so inkamaapit tayo ed saray minumundon dalan. Dagdagen so itayon mamayubo na puron panaggula ed mauges.—Salmo 97:10.
13. Panon so panalimbeng na katooran ed sikatayo a sumpad malamuyot a tongtong na saray apostata?
13 No tuan kagula tayo so mauges, agtayo abuloyan so inkamausyoso a managyat ed sikatayon onapit ed satan. Say pagmaliw a mausyoso nipaakar ed bilay na saray imoral a totoo ed sekso so mangitonton ed kadederal. (Uliran 7:6-23) Sirin, met, say espiritual a deral so nayarin manalona ed saraman so mausyoson manaliw tan mamasa ed saray literaturan pinawala na saray apostata, saray totoon angibeneg ed si Jehova tan diad muyongan to tan insan “pekpeken” da ed salita iray datin kalimog da. (Mateo 24:48-51) Ipapasakbay na Uliran 11:9: “Diad panamegley na sangi to et say sakey ya apostata so mangitarok ed kapara ton too diad kadederal.” Balet say katooran so manalimbeng ed sikatayo a sumpad kapalikdo ed saray malamuyot a tongtong da.—2 Juan 8-11.
14. (a) Anto so sakey ed saray sankaimportantian a dalan a pakapangipanengnengan tayo na katooran tayo ed si Kristo a bilang Ari? (b) Akin a sayan kimey so importantin tuloy?
14 Sakey ed saray sankaimportantian a dalan a pakapangipanengnengan tayo na katooran et diad pagmaliw a sigpot-kamarerwa ed kimey ya imbangat nen Jesus ed saray babangatan to a gawaen. Sikato so personal ya angiletneg na ehemplo diad iyakar ed saray syudad tan binaleybaley ya ipulong so maong a balita na Panarian na Dios. (Lucas 8:1) Impasakbay nen Jesus no anto so gagawaen na saray tuan Kristianos natan sanen inkuanto: “Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan say anggaan so onsabi.” (Mateo 24:14) Sikato so diad panamegley na sayan panangipulong na maong a balita a say salisalan ed Panarian so nipipresenta ed totoo diad amin a pasen ta pian sikara so makapanggawa na personal a desisyon. Para ed baleg ya ulop, satan a desisyon so mangitonton ed kipreserba diad baleg a kairapan. (Apocalipsis 7:9, 10) Kasin sika so matoor ed sayan maganat a kimey?
15. (a) Anto so ibabaga na Salmo 145:10-13 a sasalitaen na saray matoor nen Jehova? (b) Panon so kiyaplika na satan ed sikatayo?
15 Abayagla nensaman et insulat nen salmista David: “Amin na saray gawam so mangidayew ed sika, O Jehova, tan saray matoor mo so mamendito ed sika. Salitaen da so nipaakar ed gloria na inkaarim, tan tongtongen da so nipaakar ed pakapanyarim, ya ipakabat da ed saray anak na totoo so mabibiskeg a kimey mo tan say gloria na karlangan na inkaarim. Say inkaarim so sakey ya inkaari ed amin a panaon ya andi-geter, tan say pananguley mo so diad amin nin ontumbok a kapolian.” (Salmo 145:10-13) Satan ya inkaari so nanaagamil natan diad panamegley na Mesianicon Panarian diad matoor a lima nen Jesu-Kristo, tan ipapatnag tayo so katooran tayo ed Dios tan si Kristo diad pansalitan mabulbulos tan entusiastiko nipaakar ed satan.
16. Panon so pangimpluensya na katooran ed kalaknab a pibiang tayo ed panangipulong ed Panarian tan say motibo na panggawa ed satan?
16 Anton inkaprominente ed dilin bilay mo so inter mo ed sayan kimey na panagtasi ed Panarian? Kasin peteg a satan so iyuunam ed arum niran gegemtan? Say gawaen mon personal so nayarin dakel odino daiset nen say nagawaan na arum. Saray sirkumstansya na sinansakey so manduruma. Balet nagunggunaan itayon amin diad pangitepet tayo ed inkasikatayo na tepetepet a singa saraya: ‘Kasin say pibibiang ko so mangisindag lambengat na sakey a panlikna ed kimey, sakey a pakanonotan ya iyaapay? Kasin satan so moriaen ko lambengat a singa nakakaukolan a para ed kililiktar? Odino kasin say aro ed si Jehova, debosyon ed Mesianicon Ari to tan puron panangimano ed kaparak a too so manenyeg ed siak a mangiyuna ed satan ta pian saray arum ya intereses to so nipaalagey ed liber na satan?’ Say katooran so manenyeg ed sikatayon mananap ed saray dalan diad pangipatnag a sayan kimey so importante ed sikatayo a singa ed Ari tayo.
17. Diad siopa so “pansalitaan na kareenan” nen Jesus sano deralen to so marelmeng?
17 Agla manbayag say Sakey a malikeliket ya intandoro a bilang Ari na saray babangatan to nen sikato so linmoob ed Jerusalem nen 33 K.P. so maneral ed amin a mangipulisay ed inkasoberano nen Jehova a singa nibalikas ed panamegley na Mesianicon Ari To. Balet sikato so “mansalita na kareenan” ed satan a “baleg ya ulop” na totoon nanlapud amin a nasyones ya angalig ed dilin ehemplo na katooran to. Kasin sakey ka ed sikara?—Zacarias 9:10; Efeso 4:20-24.