Kapitulo 13
Sakey a Panaon na Kapalsa-Lamet
1. (a) Anto so makapakelaw a pankanawnawa so manaalagar ed saray niliktar ya onloob ed “balon dalin”? (b) Balet anto so kaukolan na satan?
1 Say kililiktar ed anggaan na peles ya abulok a mundo so sakey ya engranden ilalo. Pirawat tayo la so nalukpos ed saray ag-inkahustisya, inkaagum tan diad karamsakan na sayan mundo. Balet sananey a bengatla so manggawan lalon kalikaliktan a sikatayo so makaliktar. Anto ’tan? Say katuaan ya amin na saraman so magmaliw a kabiangan na “balon dalin” so nawalaan met na pankanawnawan nabulos a manlapud saray dilin agda inkayadyari, manlapud sakit tan sakey a bilay na ot-ot, on, anggan manlapud patey. (Apocalipsis 21:1-5) Pian saya so nagawa, anggaman ontan, say kasalanan a mismo so nepeg a nalamut a sigpot. Panon a satan so posibli? Sikato so nisiglaot ed saman so dineskribe nen Jesus a bilang “say kapalsa-lamet.”
2. Anto so “kapalsa-lamet” ya atukoy ed Mateo 19:28?
2 Diad saray apostoles to, imbaga nen Jesus: “Diad kapalsa-lamet, sano say Anak na too so onyurong ed tapew na maglorian trono to, sikayo a tinmumbok ed siak so onyurong met ed saray labinduan trono, a mangukom ed saray labinduan tribu na Israel.” (Mateo 19:28) Say kapalsa-lamet so sakey a panaon na “kapasimbalo,” sakey a panaon “sano amin so nagawan balo,” a singa impangibalikas ed satan na arum iran patalos na Biblia. (The Emphasised Bible, nen Rotherham; The Jerusalem Bible) Diad panamegley na sayan kapalsa-lamet, posibli ed saray totoo so panggayaga lamet ed inkayadyarin wala ed katooan diad gapo.
3. (a) Anto so nansumpalan ed kasalanan nen Adan? (b) Akin ya anggapo ed saray ilalak nen Adan so makayarin mangibulos ed inkasikara diad saray epekto na atawir a kasalanan?
3 Lapud kasalanan ya atawir ed si Adan, amin a kapolian to so nakaukolan ya ompatey, tan dakel so anagmak na makapaermen a sakit ya angipugta ed patey. (Roma 5:12) Anggapo so nipuera a manlapud patey diad panaliw na kuarta. Anggaporay kimey a makayari ed sakey ya ag-ayadyarin too a makagamor na kibulos ed inkasikato odino diad siopaman ni. Kinaukolan na madibinon inkahustisya a pian say katooan so makabawi ed pankanawnawan panggayaga ed maandon bilay, nepeg a niyapay so bagat a misimbangan ed saman so bili ya abalang nen Adan, salanti, say ayadyarin atooan a bilay. Anggapo ed saray ilalak nen Adan so walaan na sakey a bilay ya iyopresi.—Salmo 49:7-9; Eclesiastes 7:20.
4. (a) Panon a nitarya so nakakaukolan a dondon? (b) Panon so kagunggunaan tayo ed satan?
4 Sipapangasi, ginawa nen Jehova a mismo so nakaukolan a probisyon diad impangibaki to ed bogbogtong ya Anak to, si Jesu-Kristo, ed dalin bilang ayadyarin too pian isuko to so bilay to a bilang “kasimbangan a dondon.” (1 Timoteo 2:5, 6) Agaylan abalbaleg a panangipatnag na agkanepegan a panangasi tan ed aro na Dios ed katooan! Say bilay a posibli a bilang nansumpalan so aliwan bengatlan nagegemtan tayo a bilang tumang noagta sakey a regalon manlapud Dios. Anggaman kuan, sikato lambengat so niiter ed saraman so peteg a mamidbir na pankaukolan da ed sayan madibinon probisyon, a mangagamil na pananisia ed satan tan mangipatnag na pananisia ed panamegley na katutulok ed Anak na Dios. (Roma 6:23; Juan 3:16, 36) Balet kapigan so pakasagmak na katooan ed gungguna na satan a bagat?
Saray Gungguna Natan a Manlapud Bagat nen Kristo
5. (a) Siopa so ununan mangungguna ed bagat nen Kristo? (b) Anton arum a grupo so nagunggunaan, tan nagkalautla nanlapulad kapigan?
5 Saray gungguna so ginmapon mangapekta ed bilay na totoo tampol kayari na impangipresenta nen Jesu-Kristo (diad betang a baleg ya Atagey a Saserdote na Dios) ed bili na bagat to diad arap na Dios ed tawen. Ununa, ginmapo nen Pentecostes na 33 K.P., sarayan gungguna so ginmapon naeksperiensia na saraman so, atawag a kaiban mananawir nen Kristo, a manserbin arari tan saserdote a kaiba to ed tawen. (Gawa 2:32, 33; Colosas 1:13, 14) Insan, matalona nen 1935, saray totoon angabrasa ed ilalo ed maandon bilay diad dalin so ginmapon pinmatnag. Say ilalo ra, met, so agawan posibli diad panamegley na bagat nen Kristo. (1 Juan 2:1, 2) Sayan progresibon aplikasyon na bili na saman a bagat so impanengneng na saray agawgawa ed kadaanan ya Agew na Pananakbong ed Israel.
6. Antikey ya idalatdat so agawa ed Agew na Pananakbong?
6 Say mankimey ed sagradon tabernakulo na Israel, tan saginonor ed templo, et sakey ya atagey a saserdote a sikato so sakey a membro na Levitan abung nen Aaron. Arum a lalaki ed abung nen Aaron so katambayan a saserdote, tan saray amin nin lalaki ed tribu nen Levi so nanlingkor a bilang katulongan. Pian nitarya so pananakbong ed saray kasalanan, say atagey a saserdote so angibagat na duaran ayayep, a say dala na balang sakey so nipresentan nambiigan diad Sankasantosan, unong ya imbilin nen Jehova. Ununa et sakey bakan kalakian a walad kalangweran ya inyapay na Aaronicon atagey a saserdote a para ed “sikato tan say abung to,” ya insakup to so interon tribu nen Levi. (Levitico 16:11, 14) Ontumbok et say kanding a nipresenta a bilang iyaapay ed kasalanan a “para ed totoo,” say arum a labinduan tribu. (Levitico 16:15) Niarum ni, saray kasalanan na amin ya Israel so nipatua diad ulo na sakey a mabilay a kanding, tan sikato so nipaarawi ed kalawakan. (Levitico 16:21, 22) Anto so kabaliksan na sayan amin?
7. (a) Anto so inyanino na sakey a bagat diman? (b) Akin a nausar so masulok nen sakey a bagat ya ayep?
7 Ipapaliwawa nen apostol Pablo a say kasumpalan to so nisentro ed sakey a bagat nen Jesu-Kristo. “Si Kristo so linmoob, aliwan diad sakey a masanton pasen a ginawa na lima, a sikato so sakey a sakal na kapetegan, noagta diad tawen a mismo, a natan et pinmatnag ed arap na inkapersona na Dios a para ed sikatayo . . . pian punasen so kasalanan diad panamegley na bagat to.” (Hebreos 9:24-26) Sirin akin a say dala na masulok nen say sakey ya ayep so niloob ed Sankasantosan diad Agew na Pananakbong ed Israel? Saya so panawag na imano ed nanduruman nengneng a gawaen na ayadyarin atooan a bagat nen Jesus. Tan sakey nin nengneng et nipabitar diad impangipatua ed saray kasalanan na nasyon diad ulo na sakey a kanding a mabilay tan insan nipaarawi ed kalawakan.
8. (a) Panon a saray oksuyan ed Agew na Pananakbong so mangipanengneng no siopa so nagunggunaan na ununa ed bagat nen Kristo? (b) Anton aplikasyon na bagat nen Jesus so impanengneng na iyaapay ed kasalanan a “para ed totoo”? (c) Anto nin malaknab a katuaan so niyilustra diad impangiyarawi ed sakey a kanding diad kalawakan?
8 Unong a say dala na bakan kalakian so niyapay a para ed abung nen Aaron so inmunan niloob ed Sankasantosan, sirin saray gungguna na bagat nen Jesus so niyaplikan inmuna ed saraman so mikasakey ed si Kristo ed mangatatawen ya inkasaserdote. Saman so agawa nanlapud 33 K.P. a manpatuloy. Si Jesu-Kristo so andian na saray kasalanan a nepeg a kagawaan na pananakbong, a singa diad si Aaron, balet saraman so magmaliw a katambayan a saserdoten kaiba nen Kristo so walaan na kasalanan. Saraya so inretrato na tribu nen Levi. (1 Pedro 2:4, 5) Say inkipresenta na dala a manlapud komaduan bagat, say kanding ya iyaapay ed kasalanan a “para ed totoo,” so angipatnag a saray arum ed katooan so mangungguna ed bagat nen Jesus kayari na mangatatawen a klase. Saraya so totoon makagamor na bilay ed nipawil a Paraiso ed dalin. Sikara so inretrato “na labinduan [aliwan-saserdote] tribu na Israel” diad Agew na Pananakbong. (Mateo 19:28; Salmo 37:29) Aliwa lambengat a si Jesus so inatey a nisesengeg ed amin na saraya, noagta sikato so aktual ya angekal ed saray kasalanan na saraman so sakripisyon inateyan to, ya intarok to so pakainawaan ed sikara. Saya so impanengneng na katuaan a, diad kaunoran, kayarin saray kasalanan na Israel so nipatua ed mabilay a kanding, sikato so niyarawi ed kalawakan, ya aglan balot anengneng lamet.—Salmo 103:12; Isaias 53:4-6.
9. (a) Antoran bendisyon so panggagayagaan natan na saraman so mangaagamil na pananisia ed bagat nen Kristo? (b) Antoran arum a gungguna so onsabi ed saginonor?
9 Para ed amin a mangagamil na pananisia ed maaron probisyon nen Jehova diad panamegley nen Kristo, say tuan kaperdona na kasalanan, malinis a talindeg ed arap na Dios, so posibli natan anggaman ed saray datin dalan na bilay da. Napanggayagaan da la so mabmablin bendisyon diad panangisaklang na sagradon serbisyo ed Dios a tekep na malinis a konsiensia. (1 Corinto 6:9-11; Hebreos 9:13, 14) Balet agkabaliksan na saya a sikara ed kaplesan so naikdan la na bilay a bulos ed amin ya epekto na kasalanan. (1 Juan 1:8-10; Roma 7:21-25) Para ed saraman so manuley ed tawen a kaiba nen Kristo, say bilay so namoria lambengat sano nasumpal da so mangaraldalin a kurang da tan napaoli ed imortalidad ed katawenan. Para ed arum ed katooan, say nagnap a kabulos ed kasalanan so nagawan posibli diad panamegley na kapalsa-lamet.
“Diad Kapalsa-Lamet”
10. (a) Kapigan so igapo na kapalsa-lamet? (b) Kasin wala nira so naikdan na trono diad kasumpalan na sipan nen Jesus?
10 A singa imbaga nen Jesus, say kapalsa-lamet so “sano say Anak na too [si Jesu-Kristo] so onyurong ed maglorian trono to.” (Mateo 19:28) Siempre, aliwan amin a bengatla so agawan tampol sanen sikato so nitrono. Kayari na inkitrono nen Jesus nen 1914 K.P., inmunan nilinisan to so katawenan, diad impamagit to ed si Satanas tan saray demonyos to. Insan to pinaoli iray alanaan a patumbok to ed mangatatawen a gloria. (Apocalipsis 12:5, 7-12; 1 Tesalonica 4:15-17) Aliwa lambengat a saray matoor ya apostoles nen Kristo so naikdan na “labinduan trono” a nisipan ed sikara, noagta diad pankurang et amin nin arum a 144,000 so nitrono ed tawen diad kioli ra a manlapud saray inaatey.—Apocalipsis 3:21.
11. Diad anton dalan a say “arum a karnero” so manlilikna la ed saray epekto na kapalsa-lamet?
11 Legan a say panagpili ed totoon manibukel na mangatatawen a klase so manasingger ed kasampotan to, say katipon na baleg ya ulop na “arum a karnero” so ginmapo, nagkalautla nanlapulad 1935. Saraya, met, so ginmapon manggayaga ed saray gungguna a manlapud bagat nen Kristo, ‘ya inurasan daray kawes da tan pinaputi da ra ed dala na Kordero.’ Sikara so natutulongan a “mangisulong ed balon personalidad ya apalsa unong ed linawa na Dios diad tuan inkatunong tan katooran.” (Apocalipsis 7:9, 10, 14; Efeso 4:20-24) Diad lawas-ombabaleg a bilang et sikara so nagugunggunaan ed saray probisyon na Dios ed panamegley nen Kristo a mangitonton diad pambilay da ed ando lan ando ed nipawil a Paraiso.—Apocalipsis 7:17; 22:17.
12. (a) Siopa so inrepresenta na “labinduan tribu na Israel” a tinukoy dia nen Jesus? (b) Siopa ra nilikud ed saray niliktar so makagungguna ed kapalsa-lamet?
12 Agla mabayag, natan, say marelmeng a mundo so naderal. Si Satanas tan saray demonyos to so nimedmer ed kaaralman. Say milenyon Agew na Panangukom ed katooan so onggapo. Si Jesu-Kristo so Manangimaton ya Ukom, tan imanoen to ya amin so naikdan na pankanawnawa tan daakan a tulong ta pian sikara so makaaral ed matunong a dalan nen Jehova tan mitukoyan ed saratan. Saramay alanaan a patumbok nen Kristo ya amemben na katooran ya anggad patey so mibiang ed sikato ed kimey, a ‘mangukom ed labinduan tribu na Israel.’ (Lucas 22:28-30; Apocalipsis 20:4, 6) Agkabaliksan na saya a sikara so mangukom lambengat ed silalaman a kapolian na Israel. Noag ingen, sikara so mangukom ed amin ya inretrato na “labinduan [aliwan-saserdote] tribu na Israel” ed Agew na Pananakbong. Isakup na saya so interon mundo na arondon a katooan. (1 Corinto 6:2) Saray niliktar ed baleg a kairapan so ununan mangungguna ed sayan programa na panangitandoro ed katooan. Balet saray binilyon ni so mibiang met, lapud saramay naukom et isakup to “so mabilay tan saray inaatey.” (2 Timoteo 4:1; Gawa 24:15) Agaylan makapaliket sano saray inaatey a sinakup na dondon bagat nen Kristo so onliing! Agaylan lua na gayaga no saray inad-aro so mankakasakey lamet!
13. Panon a saray epekto na milenyon Agew na Pananakbong so tuan sakey a kapalsa-lamet?
13 Saya so panaon sano, asabin siansia, say katooan so nainawaan ed pisikal tan kanonotan iran kaleteyan a pinalesa na kasalanan. Sanen wadiad dalin, tampol a tinambal nen Jesus iray totoon paralitiko, saraman so bulag odino telek odino saraman so umel, tan totoon saray laman da so aderalderal odino say biskeg da so pinakapuy na sakit. Saramay mabibiskeg a kimey so inmunan-taway lambengat ed saman so gawaen to ed amin a katooan legan na Milenyon Uley to. Tekep na maabig a rason, anggan siopan makatasi o makaeksperiensia ed ontan a makapakelaw ya ebidensya na panangasi nen Jehova tan insan idepak da so inkasoberano to so naderal ed ando lan ando. Balet diad panamegley na edukasyon ed matunong iran dalan nen Jehova, say panagnonot tan motibo na saraman so mangipatnag na masimoon a pananisia tan katutulok so kankainot ya onaligwas ya anggad nagamoran da so sigpot ya inkayadyari. Saray ontan a manangaro ed si Jehova so tuan makasagmak na kapasimbalo, sakey a kapalsa-lamet. Sikato so singano sikara so naikdan na balon gapo ed bilay a dingan na sakey a balon Ama, say Maandon Ama, si Jesu-Kristo.—Isaias 26:9; 9:6.
14. Anton mablin relasyon so pribilehyon panggayagaan na saray makapasa ed unor a subok?
14 Insan, kayari na pakapasa ed unor a subok diad panampot na sanlibon taon, sikara so tagibien nen Jehova a Dios ed panamegley nen Kristo a bilang dilin ananak na Dios, a bilang kabiangan na ayadyarin sankatalbaan a pamilya To. Agaylan makapaseseg iyan ilalo—aliwa lambengat a para ed saray niliktar ed baleg a kairapan noagta ontan met ed amin ya inaatey a napaolin mibiang diad panggayaga ed bilay diad sakey a Paraison dalin!—Roma 8:20, 21.