Kapitulo 24
Arateng na Gagala nen Jehova so Maglorian Aligwas
1, 2. (a) Anto so gagala nen Jehova nipaakar ed saray intelihentin pinalsa to? (b) Sioparay nisakup ed nankakasakey a pamilya na managdayew ed Dios? (c) Nipaakar ed saya, anton personal a tepet so mankanepegan na panangonsidera?
AMIN ya intelihentin pinalsa so nankakasakey ed tuan panagdayew tan amin da so manggagayaga ed maglorian kawayangan na saray anak na Dios—satan so makabat tan maaron gagala nen Jehova. Satan met so magunaet a pilalek na amin a manangaro ed inkatunong.
2 Sayan engranden gagala so inggapo nen Jehova a sumpalen sanen inggapo to so kimey to ed panamalsa. Say inmunan pinalsa to et sakey ya Anak, sakey ya amaneknek a “sikato so sinag na gloria to tan nagnap a manangilaman ed inkadios to.” (Hebreos 1:1-3) Sayan sakey so nikadkaduma, unong ta sikato so pinalsa na Dios lambengat. Diad panamegley to et saray arum ya anak so apalsa—ununa, saray angheles ed katawenan, insan say too ed dalin. (Job 38:7; Lucas 3:38) Amin na sarayan anak so anibukel na sakey a sankatalbaan a pamilya. Diad amin da et si Jehova so Dios, say alenleneg a sakey a dayewen. Sikato so Sankatalbaan a Soberano. Sikato met so maaron Ama ra. Kasin sikato met so Amam, tan kasin sakey ka ed saray anak to? Agaylan satan so mablin relasyon!
3. (a) Akin ya anggapo ed sikatayo diad inkianak so ananak na Dios? (b) Balet anton maaron probisyon so ginawa nen Jehova ed saray ilalak nen Adan?
3 Anggaman kuan, nepeg tayon arapen so katuaan a sanen saray inmunan totoon atateng tayo so akondena ed patey bilang managgagalan makasalanan, sikara so pinaekal ed Eden tan intalirak na Dios. Sikara la so aliwan kabiangan na sankatalbaan a pamilya nen Jehova. (Genesis 3:22-24; ipareng so Deuteronomio 32:4, 5.) Amin tayo, lapud sikatayo so ilalak nen makasalanan ya Adan, so nianak a tekep na saray makasalanan a tendensya. Lapud sikatayo so ilalak na atateng ya inekal ed pamilya na Dios, agtayo nibagan sikatayoray anak na Dios lapu lambengat ed letnegan na toon inkianak. Balet kabat nen Jehova ya arum ed limog na saray ilalak nen Adan so mangaro ed inkatunong, tan Sikato so simamaaron nanggawa na probisyon a ditan et saraya so nayarin makarateng ed maglorian kawayangan na ananak na Dios.—Roma 8:20, 21.
Apalaboan a Talindeg na Israel
4. (a) Anton letnegan a saray Israelitas so “ananak” na Dios? (b) Anto so agkabaliksan na saya?
4 Nayarin 2,500 taotaon kayari na inkapalsa nen Adan, innatnat lamet nen Jehova ed saray pigaran totoo so pribilehyo na pisiglaotan ed sikato bilang ananak to. Mitukoyan ed sipanan to ed si Abraham, pinili nen Jehova so Israel a magmaliw a totoo to. Sirin, diad si Paraon na Ehipto, et sinalita to so Israel a bilang “anako.” (Exodo 4:22, 23; Genesis 12:1, 2) Diad saginonor et inter to ed Israel so ganggan to diad Palandey Sinai, a saman a katooan so tinibukel to ed sakey a nasyon tan inusar tora a nipapaakar ed gagala to. Manlapud sankanasyonan a punto de bista, lapud sikara so “nikabiig a kayarian” nen Jehova, sikara so asalitan “ananak” na Dios. (Deuteronomio 14:1, 2; Isaias 43:1) Ontan met, lapud nikadkaduman impideneng to ed saray pigaran sinansakey ed loob na saman a nasyon, sikara so tinukoy nen Jehova a bilang ananak. (1 Awaran 22:9, 10) Sayan talindeg so nibase ed sipanan a relasyon ed Dios. Agto kabaliksan, anggaman kuan, a nanggayagaan da so maglorian kawayangan a niwalad si Adan bilang anak na Dios. Sikara nin siansia so nipuger ed kasalanan tan patey.
5. Panon so impakabalang na Israel ed nikadkaduman talindeg to ed Dios?
5 Anggaman kuan, bilang ananak et sikara so awalaan na apalaboan a talindeg ed Dios. Sikara met so awalaan na responsabilidad a mangigalang ed Ama ra tan mankimey a mitukoyan ed gagala to. Indanet nen Jesus so kaimportantian na pananumpal da ed satan ya obligasyon—ya agda lambengat bidbiren so Dios ya Ama ra, noagta ‘paneknekan da so inkasikara’ ya ananak to. (Mateo 5:43-48; Malaquias 1:6) Anggaman kuan, saray Judios bilang sakey a nasyon so sinmaew ed saya. Sirin, legan na unor a taon na mangaraldalin a ministeryo nen Jesus, sanen saray Judios a mangigetman mamatey ed si Jesus so angikelyaw, “Sikami so walaan na sakey ya Ama, say Dios,” et mabiskeg ya inturo nen Jesus a saray kiwas da tan say espiritun impanengneng da so agmamatua ed ibabaga ra. (Juan 8:41, 44, 47) Nen 33 K.P. say Ganggan a sipanan so impangangga na Dios tan say letnegan ed nikabiig a relasyon a nanggayagaan na Israel so angangga. Ingen, si Jehova so agtinmundan nawalaan ed limog na katooan ed saraman so inawat to a bilang ananak.
Pankakasakeyen nen Jehova So Totoo To
6. Anton “administrasyon” so dineskribe nen Pablo ed Efeso 1:9, 10, tan anto so getma to?
6 Diad saray Kristianos ed Efeso insulat nen apostol Pablo so nipaakar ed programa nen Jehova diad panamakasakey ed katooan—oksuyan na Dios a ditan et saraman so mangaagamil na pananisia so makapagmaliw ya inad-aron membro na sankaabungan to, a kuanto: “Impakabat [na Dios] ed sikatayo so sagradon sekreto na linawa to. Sikato so unong ed maabig a panliketan to a ginagala to ed inkasikato so nipaakar ed sakey ya administrasyon [sankaabungan a panangimaneho] diad nagnap a geter na aturon panaon, salanti, say panipon ed amin a bengatla a mikasakey lamet ed si Kristo, saray bengatla ed katawenan tan saray bengatla ed dalin.” (Efeso 1:9, 10) Sayan “administrasyon” so nisentro ed si Jesu-Kristo. Diad panamegley to, saray totoo so nitarok ed naabobonan a kipapasen ed arap na Dios—arum so walaan na ilalo diad pambilay ed tawen; arum, diad dalin—a manlingkor ed pikakasakey diad saray anghelikon ananak na Dios ya amaneknek a matoor ed si Jehova.
7. Antoray “bengatla ed katawenan,” tan anto so kabaliksan ed sikara na katitipon da?
7 Ununa, ginmapo nen Pentecostes 33 K.P., niiter so imano ed “saray bengatla ed katawenan,” salanti, saraman so magmaliw a kaiban mananawir nen Kristo ed mangatatawen a Panarian. Diad letnegan na pananisia ed bili na bagat nen Jesus, sikara so inyabawag na Dios a matunong. (Roma 5:1, 2) Insan sikara so “nianak lamet,” odino apawala bilang ananak na Dios a walaan na ilalo ed mangatatawen a bilay. (Juan 3:3; 1:12, 13) Diad saraya bilang espiritual a nasyon so nanggawaan na Dios na balon sipanan. Asabi panaon, namparan saray Judios tan Hentiles so nisakup, tan saraya so mandagup na 144,000.—Galacia 3:26-29; Apocalipsis 14:1.
8. Panoy kipareng na relasyon na saray mananawir na Panarian ed Ama diad saraman so Judios ed leksab na Mosaicon Ganggan?
8 Anggaman siansia nin ag-ayadyari ed laman, say nakdaan na ontan a mananawir ed mangatatawen a Panarian so manggagayaga ed mabli tan maapit a relasyon ed Ama. Nipaakar ed saya, insulat nen Pablo: “Natan lapud sikayo so ananak, imbaki na Dios so espiritu na Anak to ed kapusoan tayo tan inkelyaw to: ‘Abba, Ama!’ Kanian, sirin, sikayo so aliwa lan aripen noagta sakey ya anak; tan no anak, mananawir met ed panamegley na Dios.” (Galacia 4:6, 7) Satan ya aramaicon balikas ya “Abba” et kabaliksan to so “ama,” balet ta diad panamablin porma na pananawag—say nengneng ya uusaren na melag ya ugaw ed ama to. Lapu ed inkatalunggaring na bagat nen Jesus tan say dilin agkanepegan a panangasi na Dios, sarayan nailalak-ed-espiritun Kristianos so manggagayaga na relasyon ed Dios a mas nagkalalon maapit nen say anggan siopa a nayari a para ed saray ag-ayadyarin totoo ed leksab na Ganggan. Anggaman kuan, say manatalaran ed arapen ed sikara et nagkalalo nin makapakelaw.
9. Anto so kabaliksan na sigpot a pakamoria diad kipapasen dan ananak?
9 No paneknekan da so inkasikaran matoor ya anggad patey, naawat da so nagnap a pakamoria ed pagmaliw a kipapasen ya anak diad kioli ed ag-ipapatey a bilay ed katawenan. Ditan et sikara so napribilehyoan a manlingkor a mankakasakey ed mismon arapan nen Jehova a Dios. Melag lambengat a bilang na sarayan anak na Dios so wala ni ed dalin.—Roma 8:14, 23; 1 Juan 3:1, 2.
Panagtipon “ed Saray Bengatla ed Dalin”
10. (a) Antoray “bengatla ed dalin,” tan nanlapulad kapigan a sikara so natitipon diad pikakasakey ed panagdayew? (b) Anto so relasyon da ed si Jehova?
10 Say parehon “administrasyon” a manggawan posible ed saray totoon nitipon ed sankaabungan na Dios diad ilalo ed mangatatawen a bilay so mangipapaarap met na imano ed “saray bengatla ed dalin.” Nagkalautla nanlapulad 1935 K.P. a saray totoon walaan na pananisia ed bagat nen Kristo so natitipon a tekep na ilalo ed maandon bilay diad dalin. Benebenek a mikakasakey ed saray nakekeraan na alanaan a klase, itatandoro ra so ngaran nen Jehova tan aalangonen da so panagdayew to. (Sofonias 3:9; Isaias 2:2, 3) Tekep na aralem a respeto et saraya, met, so manawag ed si Jehova a bilang “Ama,” a bidbiren dan sikato so Subol na bilay, tan panggugunaetan dan isindag iray kalidad to unong ya iilaloan to ed saray anak to a gawaen. Panggagayagaan da so naabobonan a talindeg ed arap to diad letnegan na pananisia ra ed nikalbon dala nen Jesus. (Mateo 6:9; Apocalipsis 7:9, 14) Balet kabat dan say gayaga na pagmaliw a sigpot a bidbiren na Dios bilang ananak to so wala ni ed arapen da.
11. (a) Anton sipan so itatarya na Roma 8:19-21 a para ed katooan? (b) Anton “kipatnag na saray ananak na Dios” so magunaet dan aalagden?
11 A singa nipanengneng ed Roma 8:19-21, sikara so magunaet a manalagar ed “kipatnag na saray anak na Dios,” lapud diad satan et say panaon so onsabi a sarayan totoon pinalsa so “nabulos a manlapud panangaripen na kabubulok.” Satan a “kipatnag” so nagawa sano saray totoo dia ed dalin so makanengneng na pamatnagan a saray nailalak-ed-espiritun anak na Dios ya akarateng ed mangatatawen a tumang so kinmiwas la a bilang kakaiba na niglorian Katawan da, si Jesu-Kristo. Saya so nipatnag diad kadederal na interon marelmeng a sistema na bengabengatla, a tumboken na saray bendisyon na Sanlibon Taon ya Uley nen Kristo a sarayan “ananak na Dios” so mibiang ed sikato bilang arari tan saserdote.—Apocalipsis 2:26, 27; 20:6.
12. Kayari na baleg a kairapan, diad anton kanta na panagdayew so pikasakeyan na saray mananalon nailalak-ed-espiritun ananak na Dios, tan anto so kabaliksan to?
12 Agaylan makapalikliket sano nasumpal la so baleg a kairapan tan saramay ananak na Dios a nikasakey ed si Kristo so mankakasakey ed boses da diad panangidayew ed Dios, a magayagan mangiyaabawag: “Baleg tan makapakelaw iray gawam, Jehova a Dios, say Makapanyarin-amin. Matunong tan matua iray dalan mo, Ari ed andi-anggaan. Siopa so peteg ya ag-ontakot ed sika, Jehova, tan mangigloria ed ngaran mo, lapud sika lambengat so matoor? Ta amin a nasyones so ondago tan mandayew ed arap mo, lapud saray matunong a ganggan mo so nipatnag”! (Apocalipsis 15:3, 4) On, amin a katooan, a tinibukel na totoon nanlapu ed amin na saray datin nasyones, so mankakasakey diad panagdayew ed tuan Dios. Anggan saraman so wala ed pakanodnonotan a lubok so napaoli tan naikdan na pankanawnawan mangikasakey na boses da diad panagdayew ed si Jehova.
13. Anton makapakelaw a kawayangan so panggayagaan a tampol na saray niliktar ed baleg a kairapan?
13 Si Satanas a Diablo so aliwa lan “dios na sayan sistema na bengabengatla.” Saray managdayew ed si Jehova diad dalin so agla milaban ed mauges ya impluensya to. (2 Corinto 4:4; Apocalipsis 20:1-3) Saray palson relihyon so agla makapanggawa na mauges ed maaron Dios tayo tan manserbin manangapag ya impluensya ed sosyedad na too. Saray ariripen na tuan Dios so agla makasagmak na ag-inkahustisya tan irap diad lima na totoon walad inkabetang ed gobierno. Agaylan makapakelaw a kawayangan so nanengneng ed saray niliktar ed baleg a kairapan!
14. Diad anton paraan a sikara so nabulos a manlapud kasalanan tan ed amin ya epekto to?
14 Bilang say “Kordero na Dios a mangekal ed kasalanan na mundo,” si Jesu-Kristo so mangiyaplika ed bili na bagat to ta pian punasen to so amin a linmabas a kasalanan na katooan. (Juan 1:29) Diad dalin, sanen imbaga nen Jesus ya aperdona so kasalanan na sakey a too, tinambal to met so sakey ya aperdona bilang prueba na satan. (Mateo 9:1-7) Diad mipadparan nengneng, manlapud tawen et mamilagron tinambal to so bulag, telek, umel, saray apukol, saray ambagel tan saraman so walaan na anggan anto nin arum a sakit. Nankalkalna, diad panamegley na matoor a panangitukoy da na inkasikara ed saray matunong a dalan na Dios, amin a mabulos tan matulok a totoo so nagnap a nalukpos ed “ganggan na kasalanan” ta pian amin na saray kiwas da, kanonotan da tan saray pilalek na puso ra so makapaliket ed sikara tan diad Dios. (Roma 7:21-23; ipareng so Isaias 25:7, 8 tan Apocalipsis 21:3, 4.) Sakbay a manampot so Milenyo, sikara so atulongan la ed nagnap ya inkayadyari ed inkatoo. Sikara so nagnap lan nibulos a manlapud kasalanan tan ed amin a makapaermen ya epekto to. Sikara so manepeg a mangisindag ed ‘talintao tan indengan na Dios’ diad utel na mangaraldalin a Paraiso ya onlaknab ed interon globo.—Genesis 1:26.
15. Diad sampot na Milenyo, anton aksion so alaen nen Kristo, tan tekep na anton getma?
15 Sano nitarok la nen Kristo so katooan ed inkayadyari, iyawat to la ed satan ed Ama to so pakauley a nipabtang ed sikato a nisengeg ed sayan kimey. A singa nipasakbay ed 1 Corinto 15:28: “Sano amin a bengatla so impauleyan la ed sikato [say Anak], sirin say Anak a dili so pauleyan met ed samay Sakey ya angipauley na amin a bengatla ed sikato, pian say Dios komon so wala ed amin a bengatla.”
16. Diad anto natan so kisilongan na amin ya apayadyarin totoo, tan akin?
16 Say ayadyarin katooan la natan so naikdan na pankanawnawan mangipatnag a say agnauman a pili ra et say panlingkor ed alenleng a mabilay tan tuan Dios ed ando lan ando. Sirin, sakbay a sikara so tagibien to a bilang ananak to ed panamegley nen Jesu-Kristo, isilong nen Jehova so amin a totoon apayadyari diad sigpot, pinal a subok. Si Satanas tan saray demonyos to so nabulos a manlapud kaaralman. Saya so mansumpal ed aliwan magnayon a kasakitan na saraman so tuan manangaro ed si Jehova. Balet anggan siopan aliwan matoor a mangiyabuloy na inkasikaran nitonton diad katutunganga ed si Jehova so ando lan andon naderal a kaiba na orihinal a rebelde tan saray demonyos to.—Apocalipsis 20:7-10.
17. Diad kasumpalan na gagala nen Jehova, anton kipapasen so onwala lamet ed limog na amin ya intelihentin pinalsa?
17 Si Jehova natan so simamaaron managibi bilang ananak to ed panamegley nen Kristo ed amin ya ayadyarin totoo a makatalindeg ed satan a pinal, sigpot a subok. Sikara ed satan so nagnap a mibiang ed “maglorian kawayangan na ananak na Dios.” (Roma 8:21) Sikara la ed satan so magmaliw a kabiangan na nankakasakey, sankatalbaan a pamilya na Dios, a diad amin et si Jehova so ando lan ando ya alenleneg a Dios, say Sankatalbaan a Soberano, tan say maaron Ama ra. Insan amin ya intelihentin pinalsa nen Jehova, ed tawen tan ed dalin, so mankakasakey lamet diad panagdayew ed alenleneg a tuan Dios.
Repason Diskusyon
● Sakbay na impanrebelde ed Eden, anto so relasyon na amin a managdayew ed si Jehova ed sikato?
● Anton responsabilidad so nipasakbat ed saraman so ananak na Dios?
● Siopa natan iray ananak na Dios? Siopa ni so magmaliw ya ananak na Dios, tan panon so kisiglaot na saya ed gagala nen Jehova nipaakar ed nankakasakey a panagdayew?