Kapitulo 22

Mantultuloy a Salitaen so Salita na Dios a Tekep na Tepel

Ag-onsasaral ed Dilin Biskeg Tayo

5. (a) Pian napaneknekan tayo so inkasikatayon matoor ya ariripen na Dios, anto so sakey a manunan nakakaukolan? (b) Akin a saray miting so importante?

⁵ Wala ra, siempre, so dakel a nalalanor diad pagmaliw a matoor ya aripen na Dios. Balet manuna ed amin na saratan et say panagmatalek ed si Jehova tan diad saray tarya to. Panon so pangipanengneng tayo na ontan a panagmatalek? Sakey a dalan et diad iyatendi ed saray pantitipon ed kongregasyon. Sikatayo so papasesegen na Kasulatan ya agmamaulian ed saratan. (Hebreos 10:23-25) Saramay nantultuloy a matoor a tasi nen Jehova, balanglan diad arap na agpananginenen na publiko odino diad panamasegsegang, so angibanikel na inkasikara diad pagmaliw a maparanay ya onatendi ed saray pantitipon a kaiba daray kaparan managdayew. Diad sarayan miting et saray pikakabat tayo ed Kasulatan so napadaak, balet aliwa lambengat ed basta panliket ed saray balon bengatla so managyat ed sikatayo. (Ipareng so Gawa 17:21.) Say apresasyon tayo ed kabkabat-a-maong iran katuaan so ombulaslas, tan say inkamaimano tayo ed saray dalan a pangusaran tayo ed sikara so napatarem. Say ehemplon inletneg ed sikatayo nen Jesus so magmaliw a nipurek ed kapusoan tan kaisipan tayo. (Efeso 4:20-24) Sikatayo so niyasingger ed saray Kristianon agagi tayo diad nankakasakey a panagdayew tan sikatayo so personal a napabiskeg diad pantultuloy a panggawa ed linawa na Dios. Say espiritu nen Jehova so mangitarya na panangiwanwan ed panamegley na kongregasyon tan diad panamegley na satan ya espiritu et si Jesus so wala ed pegley tayo sano sikatayo so mantitipon ed ngaran to.​—Apocalipsis 3:6; Mateo 18:20.

6. Diad saray pasen a sinebelan iray Tasi nen Jehova, anto so nagagawa nipaakar ed saray miting?

⁶ Kasin sika so maparanay ya onaatendi ed amin a miting tan kasin iyaaplikam a personal so narerengelan mon sasalaysayen? No maminsan, sano walad leksab na panangisebel, nakaukolan so panggawa ed saray miting diad angkelag iran grupo ed saray pribadan abung. Saray pasen tan panaon so nayarin manduruma tan nayarin aliwan naynay a kumbeniente, arum iran miting so nagawa ed aralem lan labi. Balet, anggaman ed personal iran kairapan odino kaatapan, saray matoor ya agagin lalaki tan bibii so manggugunaet diad pagmaliw a presente ed kada miting.

7. (a) Panon ni so pakapangipatnag tayo na panagmatalek ed si Jehova? (b) Panon a saya so ontulong ed sikatayon mansiansian mansalitan sitetepel?

⁷ Say panagmatalek ed si Jehova so nipanengneng met diad maparanay ya iyasingger ed sikato diad pikakasi​—aliwan singa pormal lambengat a gagawaen, noagta tekep na impapuson pakamoria a nakaukolan tayo so tulong na Dios. Kasin satan so gagawaen mo? Si Jesus so nampikasin paulit-ulit kaleganan na mangaraldalin a ministeryo to. (Lucas 3:21; 6:12, 13; 9:18, 28; 11:1; 22:39-44) Tan diad samay labin sakbay na inkipasak to et pinaseseg toray babangatan to: “Mansiansia kayon manbantay tan manpikasi, pian agkayo natukso.” (Marcos 14:38) No naabet tayoray pirmin agpanangimano ed mensahe na Panarian, nayarin wala so pakatukso diad itayer ed ministeryo tayo. No sikatayo so ludlureyen na totoo odino no wala so nagkalalon mabiskeg a panamasegsegang, nayarin liknaen tayo so natukson mandeen la pian satan so napaliisan. Balet no sikatayo so manpikasin mapetepet a para ed espiritu na Dios ya ontulong ed sikatayon mantultuloy a mansalitan sitetepel, sikatayo so nasalimbengan a sumpad isuko ed ontan a pakatukso.​—Lucas 11:13; Efeso 6:18-20.

Sakey a Rekord na Makpel a Panagtasi

8. (a) Akin a say rekord na Gawa so nagkalautlan makapasagyat ed sikatayo? (b) Ebatan iray tepet a nitarya ed sampot na sayan parapo, ya idanet no panon a say impormasyon so makagungguna ed sikatayo.

⁸ Say rekord a wala ed libro na Gawa so nagkalautlan makapainteres ed sikatayon amin. Ibabaga to no panon a saray apostoles tan arum iran babangatan, totoon walaan na liknaan a singa sikatayo, so analona ed saray babeng tan nansumpal a makpel tan matoor a tastasi nen Jehova. Usisaen tayo so kabiangan na satan a rekord diad tulong na saray onggendan a tepet tan nisitan kasulatan. Legan a satan so gawaen tayo, imanoen no panon a sikayon personal so nagunggunaan a manlapud basaen yo.

Kasin saray apostoles so edukadon tuloy a lalaki? Kasin sikara a sinansakey so nianak ya andi-takot, anggaman anto so nagawa? (Gawa 4:13; Juan 18:17, 25-27; 20:19)

Anto so tinmulong ed si Pedro a mansalitan makpel diad arap na Judion korte ya angondena ed dilin Anak na Dios diad akaunan pigaran simba? (Gawa 4:8; Mateo 10:19, 20)

Anto so gagawaen na saray apostoles kaleganan na saray simba sakbay a sikara so nidunget ed Sanhedrin? (Gawa 1:14; 2:1, 42)

Sanen sikara so ginanggan na manuley ya ontundan manpulong ed ngaran nen Jesus, anto so inyebat nen Pedro tan Juan? (Gawa 4:19, 20)

Kayari na inkibulos da, diad siopa so kinerewan da lamet na tulong? Kasin impikasi ra ed sikato so pangitunda la ed panamasegsegang, odino anto? (Gawa 4:24-31)

Diad panamegley na anton paraan so pangitarya nen Jehova na tulong sano saray sumusumpa et salien dan patundaen so kimey na panagpulong? (Gawa 5:17-20, 33-40)

Panon so impangipanengneng na saray apostoles ya atalosan da so rason na inkiliktar da? (Gawa 5:21, 41, 42)

Anggan sanen dakel ed saray babangatan so ataytayak nisengeg ed biskeg na panamasegsegang, anto so intultuloy dan gawaen? (Gawa 8:3, 4; 11:19-21)

9. (a) Antoran makapaliket a resulta so onsabi a manlapud ministeryo na saramay inmunan babangatan? (b) Panon so kalanor tayo?

⁹ Say kimey da a misiglaotan ed maong a balita so aliwan maapa. Ngalngalin 3,000 babangatan so abautismoan nen Pentecostes 33 K.P. “Saray mananisia ed Katawan so nantultuloy a naaruman, dakerakel a lalaki tan bibii.” (Gawa 2:41; 4:4; 5:14) Kabekta et nibalita ya anggan sakey ed saray sankabiskegan a manamasegsegang, si Saulo na Tarsus, so nagmaliw a Kristiano tan sikato so makpel a nantasi ed katuaan. Sikato so atawag na apostol Pablo. (Galacia 1:22-24) Say kimey a ginmapo nen inmunan siglo so agtinmunda. Sikato so binmiskeg ed sarayan “kaunoran ya agew” tan adampot to la so amin a pasen na dalin. Walaan itayo na pribilehyon mibiang ed satan, tan legan a satan so gawaen tayo, makaaral itayo ed ehemplon inletneg na saray matoor a tastasin nanserbin akauna nen say sikatayo.

10. (a) Antoran pankanawnawa so inusar nen Pablo a mantasi? (b) Diad antoran dalan so pangilalaknaban yo na mensahe na Panarian ed arum?

¹⁰ Sanen naaralan nen Pablo so katuaan nipaakar ed si Jesu-Kristo, sikato so agnanabala. “Tampol . . . inggapo ton impulong si Jesus, a sayan Sakey so Anak na Dios.” (Gawa 9:20) Inapresya to so agkanepegan a panangasi na Dios ed sikato tan amoria to a balang sakey et nakaukolan to so maong a balita a naawat to. Unong ed ugali ed saman ya agew, lapud sikato so sakey a Judio et sikato so linma ed saray sinagoga, a saratan so Judion pasen ed mapublikon pantitipon, pian mantasi. Sikato met so nampulong ed kabkaabungan tan akikatunongan ed totoo diad tiendaan. Tan sikato so mabulos a linma ed saray balon teritorya pian ipalapag so maong a balita.​—Gawa 17:17; 20:20; Roma 15:23, 24.

11. (a) Panon so impangipanengneng nen Pablo a legan a makpel, et sikato met so makatebek diad nengneng na impantasi? (b) Panon so nayarin pangisindag tayo ed satan a kalidad sano mantatasi ed kakanayon, katrabahowan odino kaeskuelaan?

¹¹ Si Pablo so makpel, balet ta makatebek, a singa nepeg tayo met a pagmaliwan. Diad saray Judios et inmapelo ed basiyan na saray sipan a ginawa na Dios ed atateng da. Diad Griego et sikato so nansalita ed letnegan na saray bengatlan kabisado ra. No maminsan et inusar to so dilin eksperiensia to diad impakaaral ed katuaan bilang sakey a paraan ed pangiter na pantasi. A singa impaliwawa to: “Gawaen ko so amin a bengatla a nisesengeg ed maong a balita, pian komon et siak so magmaliw a manangipabang ed satan diad arum.”​—1 Corinto 9:20-23; Gawa 22:3-21.

12. (a) Anggaman makpel, anto so ginawa nen Pablo ta pian napaliisan to so pangipilit ed pirmin pibarangkaan ed saray sumusumpa? (b) Kapigan so pangalig tayon sikakabat ed satan ya ehemplo, tan panon? (c) Manlapud iner so panlapuan na biskeg diad pantultuloy a mansalitan sitetepel?

¹² Sanen say isusumpa ed maong a balita so nanggawan mapatnag a magmaong so pampulong ed arum a pasen odino iyalis ed sananey a teritorya ed kaleganan to, saya so ginawa nen Pablo imbes ya ipaskar to so pirmin pibarangkaan ed saray kakabusol na katuaan. (Gawa 14:5-7; 18:5-7; Roma 12:18) Balet ta agton balot imbaing so maong a balita. (Roma 1:16) Anggaman aromog nen Pablo so sankaugesan, sankarawalan, a panagtrato na isusumpa ya aliwan makapaliket, “pinabiskeg to so inkakpel to diad panamegley na Dios tayo” pian mantultuloy a manpulong. Anggaman ed saray mairap a sirkumstansyan asagmak to, inkuanto: “Say Katawan so tinmalindeg ed abay ko tan inikdan toak na biskeg, pian diad panamegley ko et nagawaan komon a nagnap so panagpulong.” (1 Tesalonica 2:2; 2 Timoteo 4:17) Say ulo na Kristianon kongregasyon, say Katawan a Jesus, so mantultuloy a mangitarya na biskeg a nakaukolan diad panggawa ed kimey ya impasakbay to a para ed agew tayo.​—Marcos 13:10.

13. Anto so mangiter na ebidensya ed Kristianon inkakpel, tan anto so letnegan na satan?

¹³ Walaan itayo na nagnap a rason diad pantultuloy a mansalitan sitetepel ed Salita na Dios, a singa ginawa nen Jesu-Kristo tan saray arum a matoor ya ariripen na Dios nen inmunan siglo. Agkabaliksan na saya so pagmaliw a mapasang odino masebeg diad indengan tayo. Anggapo so pankaukolan na pagmaliw ya aliwan makonsidera odino ipilit so mensahe ed saraman so agmalabay. Balet ta sikatayo so ag-onsuko lapud saray totoo so ag-ondengel, nisay sikatayo so natalagnaw la diad isusumpa. Singa si Jesus, ituro tayo so Panarian na Dios a bilang say manepeg a gobierno ed interon dalin. Mansalita itayo a tekep na tepel lapud irerepresenta tayo si Jehova, say Sankatalbaan a Soberano, tan say mensahen iyaabawag tayo so agnanlapud sikatayo noagta nanlapud sikato.​—Filipos 1:27, 28; 1 Tesalonica 2:13.

Repason Diskusyon

● Akin ya importante so pangipanabang ed mensahe na Panarian ed amin no nayari? Balet antoray reaksion a nailaloan tayo?

● Panon so pangipanengneng tayo ya agtayo sasalien so manmatalek ed dilin biskeg tayo a manlingkor ed si Jehova?

● Antoran mablin leksion so naaralan tayo a manlapud libro na Gawa?