Popular a Lingon-Pantalos Nipaakar ed Biblia

MASULOK a 8,000,000 pounds sterling! Agaylan makapakelaw a presyo na sakey a libro! Ingen, sanen say martinite na managlako so dinmapo diad impanlakon agawa ed London legan na Disyembre 1983, saman so presyon imbayar na analiw, ya angirepresenta ed Republika Pederal na Alemanya. Anton libro so walaan na ontan lan kablian? Sikato so kabiangan na Biblia, diad tua et saman so koma-12 siglon pinasinag a libro na saray Ebanghelyo.

Antokaman a rason diad impanaliw ed sayan abalbaleg a presyo na sayan manuskriton libro, makapasagyat a say ontan a presyo ed sakey a kimey na arte so para ed kabiangan na Biblia. Isindag to so panmoria na dakel a totoo a say Biblia so sankablian. Saray arum, anggaman kuan, so mangipasen ed Biblia a makasuspetsa odino anggan bubusolen. Akin?

Popular Iran Lingon-Pantalos

Dakel a totoo, nagkalautla’d saray dalin na Protestante, so mangibabagan say Biblia so singa sakey a daan a byolin a nayarin usaren a panugtog ed dakel iran tuno. Liknaen dan say Biblia so nayarin usaren a pamaneknek ed anggan antoran manggugutgutan a doktrina. Ikuan da: ‘Depende labat ed dalan a pangipatalos mo ed satan.’ Kasin saya so duga?

Inako, say Biblia so nayarin napanaonan diad getman panuporta ed mandurumaan a punto de bista. Ingen no saray balikas so inala ed konteksto, agta say kimey na anggan siopan utor so nagawan ompatnag a sumlangen to so inkasikato? Kasin saya so simamatua, anggaman kuan? Pansiansiaen na saray Tasi nen Jehova a say matuan panagbasa ed Biblia so agmangipalugar ed manggugutgutan iran panangipatalos ed manunan doktrina.

Ikuan na Biblia a mismo, “Ta saya so kabat yon ununa, ya anggapo so propesiya na Kasulatan a nanlapu ed anggan anton pribadan panangipatalos.” (2 Pedro 1:20) Diad arum a salita, say puersan amakiwas diad impansulat ed mapropetikon Kasulatan so aliwan basta puersa na too, noagta satan so masanton espiritu, odino aktibon puersa na Dios. Sikato so ununa ed amin a propeta tan Managpuyan ed amin a tuan propesiya na Biblia diad panamegley na agnanengneng ya aktibon puersa to.

Sananey a popular a lingon-pantalos et, bangta say Dios na apuyanan a Kristianon Griegon Kasulatan so mapangasi tan maaro, say Dios na apuyanan a Hebreon Kasulatan so maruksa tan manangibabales. Insulat nen Stendhal a managsulat a Pranses a say Dios “so sakey a maruksan manuley, tan, a singa ontan, so napno na saray kanonotan na panangibales; sasalitaen labat na Biblia to so makapakebbiew a pananusa.” Sayan opinyon so aliwan makapakelaw, a nanlapud sakey a toon kabat ya ateistikon bulos-a-managnonot. Makapasinagem, ontan met so opinyon na dakel iran manatawag na inkasikaran Kristiano, a pati arum ed saray klero.

Say katuaan so namparan diad kabiangan na orihinal a nisulat ed Hebreo tan kabiangan a nisulat ed Griego, et ibabaga na Kasulatan a wala lambengat so “sakey a Dios.” (1 Corinto 8:6; Deuteronomio 6:4) Namparan saratan a parte so mangipapanengneng a say Dios so mapangasi, maptek, maaro, tan mapekder. (Exodo 34:6, 7; Salmo 103:6-8; 1 Juan 4:8; Hebreos 12:28, 29) Arum ed saray sankamatamoyan a balikas ed Kasulatan so naromog ed Hebreon kabiangan na Biblia, a singa diad saray Salmo. Diad pantotongtong, say “Balon Sipan” so nankarga ed saray mabitar a salaysay na ansakit a panangukom a nidapo ed marelmeng. (2 Tesalonica 1:6-9; Apocalipsis, kapitulo 18 tan 19) Say Biblia a manlapud gapo ya anggad sampot so mangitatarya na makapakelaw ya ilalo ed matunong. (Genesis 22:17, 18; Salmo 37:10, 11, 29; Apocalipsis 21:3, 4) Sirin, say Biblia so mantutukoyan ed inkasikato a manlapud gapo ya anggad sampot.

Sakey a “Libro na Protestante”?

Maslak so lingon-pantalos ed limog na saray nilasus-milyon a Katoliko ed mundo a say Biblia so sakey a “libro na Protestante.” Saray masimoon a Katoliko so agnatetel ed sayan panmoria. Diad saray dakel a siglos et insebel na Iglesia Katolika Romana so pambasa ed Biblia diad anggan anton lenguahe likud ed Latin. Saya so angyan ed Kasulatan ya agnagawat na maslak ed saray patumbok a Katoliko. Tua, nanlapulad 1897 tan nagkalautla ed komaduan Konsilyo Vaticano (1962-1965), saray Katoliko so walaan na kanepegan a manbasa ed kaslakan-lenguahe ran Biblia ya inaprobaan na Roma. Balet saray tradisyon so mairap ya ompatey. Sirin saray dominante na Katolikon bansa, say panagbasa na Biblia so siansia nin nikasakey ed Protestantismo.

Dakel ed saray aktibon Katoliko ed agano niran taon ya angala na Biblia so andian na pakatebek. Akin ya ontan? Lapud say iglesia ra so siansia nin mangibabangat a say pambasa ed Biblia so mapeligro. Akin? Lapud ibabaga na Iglesia Katolika Romana a say Biblia so agnankarga na kumpleton panangiparungtal ed Kristianon katuaan; nakaukolan to so kakumpleto diad panamegley na “tradisyon.” Diad libro ton La Parole de Dieu (The Word of God), si Georges Auzou, a Katolikon propesor na Sagradon Kasulatan, so nansulat: “Inunaan na saray tradisyon, pinunggos to, inulop to tan nilampasan to so Kasulatan. . . . [Saya] so ontulong ed sikatayon mantalos no akin a say Iglesia so agbalot nanggawa ed panagbasa ed Biblia odino panagaral ed Biblia ya estrikton obligasyon odino absoluton nakakaukolan.”

Akin a Basaen so Biblia?

Anggaman kuan, dakel a masimoon iran Katoliko ed sankamundoan so mamapawala na Biblia tan manaanap na tulong diad pantalos ed satan. Satan met so tua ed dakel iran adismayan Protestante tan anggan arum ed saray manangiteen na ilalo ed komunismo, sosyalismo, odino siensia.

Diad pangusisa ed saray rason na apasimbalon interes ed espiritual iran pamaakaran, insulat na sakey a relihyoson managsulat a si Alain Woodrow ed peryodiko na Paris a Le Monde: “Saya so ununan gendagendat a reaksion diad inkadismayan intarok na insaew na baleg iran sistema na kanonotan, ideolohya, odino pulitika tan siensia.” Inter to a bilang malaknab nin rason so “pakadismaya ed paalagey iran iglesia lapud pikukumpromiso ra ed pulitikal tan pinansyal a pakayari na sayan mundo,” tan, kaunoran, saman so tinawag to na “apocaliptikon takot.”

Nayarin sakey ka ed saraman so ginmapon manbabasa ed Biblia. No ontan, nakaukolan mon amtaen no panon so pambasam ed Biblia a mabunga.