No Panon a Nagawan Mabunga so Panagbasa Yo ed Biblia

“MAPALAR iraman so duruka ed espiritu.” Saratan so manangilukas a salita na bantog a Sermon ed Palandey nen Jesus, unong ed pigaran lenguahen-Ingles a Biblia. (Mateo 5:3, Revised Standard Version, edisyon a Protestante tan Katoliko) Kasin natalosan yo so peteg a labay nen Jesus ya ibaga diad “duka ed espiritu”? Kasin tutukoyen toraman so adismaya? Odino kasin tinukoy to so saray maletey ya impanisip? Say unor so singa ompatnag ya aliwan ontan, balet seguradon importantin amtaen.

Saray Tasi nen Jehova, a binidbir na anggan saray kritiko ra a matalunggaring iran estudyante na Biblia, so akaromog a say New World Translation of the Holy Scriptures so dinaydayew ya akaabet ed saray nakakaukolan diad inkamalinew tan inkasusto. Satan a balikas ed Sermon ed Palandey so impatalos to na onia: “Maliket iraman so manonot ed espiritual a nakakaukolan da.”

Inako na arum iran komentaryo na Biblia a saya so labay ya ibaga na “duka ed espiritu.” Akin, sirin, a dakel iran agano nin bersyon, a singa say Katolikon Jerusalem Bible tan say New International Version, so angipilit diad impangusar ed balikas a “duka ed espiritu”?

Sayan ehemplo so mangipanengneng a ta pian nagawan mabunga so panagbasa na sakey ed Biblia, nakaukolan so pamili ed sakey a patalos a matoor, malinew, tan natalosan.

Manepeg ya Awawey

Say mabungan panagbasa ed Biblia so mankaukolan met na manepeg ya awawey ed biang na managbasa. Saraman a parehon salita ed Sermon ed Palandey so agaylan abig ya anegek no anto so nepeg ya awawey tayo, salanti: “Maliket iraman so manonot ed espiritual a nakakaukolan da.” Kasin say bilay yo so onkukulang na tuan espiritual a kalaknab? Kasin sikayo so sikakabat ed katuaan a nakaukolan yon taganoen so kanonotan tan puso diad espiritual a tagano? Say Biblia so makatulong ed sikayon mamano ed satan a nakakaukolan.

Anggaman kuan, agyo naromog so tagano na nonot tan puso ed Biblia no satan so basaen yo a singa gawaen yo ed anggan anton nengneng na literatura. Nepeg a satan so arapen yo, “aliwan bilang singa salita na totoo, noagta, a singa simamatua, bilang say salita na Dios.” (1 Tesalonica 2:13) Babasaen yo, aliwan say pilosopya na too odino nasyonalistikon awaran, noagta saray kanonotan na Dios tan say awaran na impideneng to ed saray ariripen to ed dalin. Kinarga to met so makapakelaw iran propesiya, arum ed saraya so asumpal la, bang saray arum so nasusumpal ed arap na mata tayo odino nagawa ni ed arapen a para ed sankabalgan a pankaabigan na katooan.

Lapud say Biblia so Salita na Dios, say pambasa ed satan a mabunga et nakakaukolan to a say sakey a too so nepeg ya onkerew na tulong To. Say pikakasi ed Dios so, sirin, matukoy a gawaen diad panagbasa ed Biblia. Diad saray simplen salita, nibalikas ed puso yo, onkerew ed sikato a tulongan to kayon mantalos ed babasaen yo tan no panon so pangiyaplika yo ed satan diad personal a bilay yo. No maminsan et onkukulang itayo na abilidad a mangusar ed pikakabat ya agamoran tayo, a satan ya abilidad et say kakabatan. Isisimbawan mismo na Biblia: “No wala so siopaman ed sikayo ya onkukulang na kakabatan, sikato so pankerew yo ed Dios, lapud sikato so mabunlok ed amin tan agmanbalaw; tan niiter ed sikato. Balet paulian yon itultuloy to so onkerew ed pananisia, ya agmanduaruwan balot.”​—Santiago 1:5, 6.

Pambasa a Tekep na Pananisia

Nayarin ikuan yo: ‘Panon so pangipikasik ed pananisia tan manbasa a tekep na pananisia no siak so kulang na pananisia?’ Bueno, no arapen yo so panagbasa ed Biblia a ‘sinononot ed espiritual a nakakaukolan yo,’ say pananisia yo so ondaak legan a gagamoran yo so pikakabat ed si Jehovan Dios tan diad saray makapakelaw a gagala to a nisentro ed si Kristo. Say tuan pananisia so aliwan kapara na bulag a kredulidad. Isalaysay na Biblian mismo so pananisia a bilang “say nipaseguron panilalo ed saray bengatlan inilaloan, say mapatnag a kiparungtal na katuaan anggaman agni anengneng.”​—Hebreos 11:1.

Kakaukolan na tuan pananisia so pikakabat, tan satan a pikakabat so manggawa ed saray bengatlan insipan na Dios a magmaliw a peteg anggaman saratan so agni anengneng. Say pananisia, sirin, so bengatlan nagamoran. Tumboken to so panagbasa tan panagdengel ed saray bengatla nipaakar ed Dios tan diad makapakelaw iran gagala to ed katooan. A singa inkuan nen apostol Pablo, “Tumboken na pananisia so bengatlan nadngel. Insan say bengatlan nadngelan diad panamegley na salita nipaakar ed Kristo.”​—Roma 10:17.a

Legan ya ondadaak so pananisia yo, say panagbasa yo ed Biblia so magmaliw a lalon mabunga. Akin? Lapud say “panilalo [yo] ed saray bengatlan inilaloan” so magmaliw a lalon “nipaseguro.” Nayarin saya so niilustra ed sakey a balon impankaaro ed baetan yo tan diad sananey a too. Legan ya onlabas so panaon tan nakabatan yon magmaong so too, say talek yo ed satan a sakey so ombaleg. Diad kaunoran, kayari na impanbilay ed saray dakel a kipapasen a say kaaro yo so agtokayon balot intelmer, onsabin iter yo so mabiskeg a talek ed satan a too. No sikato so mansulat ed sikayo, amta yo no panon yon talosan so espiritu na labay ton ibaga. Anggano say sakey ya estansa so aliwan tanton malinew, kabat yon maong so too ya andian kayo na kairapan diad pantebek ed kanonotan to. Basaen yo so sulat na satan a kaaro yo a sitatalek, ya aliwan tekep na suspetsa.

Mipadpara, diad lalon pakaamta yo ed Biblia tan say Utor to, si Jehovan Dios, ditan say lalon talek yo ed Dios tan diad Salita to so ombaleg. Anggaman arum ed saray salaysay ed awaran na Biblia so nayarin singa mairap a talosan et agto mayegmegen itan a talek. Alimbawa, anggano say rason ed maples a kiwas na Dios a sumpad arum a too odino nasyon so aliwan tampol a malinew, nawalaan kayo na talek a satan so nakaukolan. Singa say paraan na nayarin ibaga yo ed sakey a kaaron panmamatalkan: ‘Bueno, no saman so ginawa to, nayarin nepeg a wala so maabig a rason.’

Siempre, say pananisia yo ed Dios so napabiskeg no makaromog kayo na rason no akin a sikato so kinmiwas ed ontan a dalan odino no akin a sikato no maminsan so ompatnag a mangipapaleen diad ikiwas to a sumpad marelmeng. Balet nayarin nakaukolan yo so tulong. Satan so mangitarok ed sikatayo diad sananey ya importantin nengneng na mabungan panagbasa ed Biblia.

Say Pankaukolan na Tulong

Matalonan bengatla so pamasa ed interon Biblia. Diad anggan anton pamaakaran na sakey a kapitulo ed kada agew, nakaukolan yo so masulok a taloy taon diad pamasa ed Hebreo tan Griegon Kasulatan. No mamasa kayo na talora odino apatiran kapitulo ed kada agew, nakaukolan yo so ngalngalin sakey a taon. Anggaman kuan, pian naala so inkalapagan ya ideya ed no anto so karga na Biblia, nayarin igapo yo ed Salmos tan Uliran. Insan ompawil ed Genesis, Exodo, tan Ununan Samuel sakbay ya onla ed panaon Kristiano, ed Mateo, Gawa, tan pigaran sulat ya insulat ed saray inmunan Kristiano, a singa say Filipos, Santiago, tan Ununa odino Komaduan Pedro.

Legan a saya so gawaen, namoria yo a ta pian nagamoran yo so praktikal tan espiritual a gunggunan manlapud Biblia, maabig so pananap ed no anto so ibabaga to ed sakey a tema. Saray balikas ed sakey a tema so nayarin malaknab a nisian, nayarin liknaan yo so pankaukolan na katulongan diad panagaral ed Biblia ya ontulong ed sikayon makaaral ed no anto so ibabaga na Kasulatan, tema por tema. Ontan met, lapud saray libro na Biblia so agnauksoy ed estrikton kronologon oksuyan, saray ontan a tulong so makatulong ed sikayon manebek ed pansusuldongan na panaon. Say heograpiko tan historikon materyal so makatulong met a tuloy diad pantalos ed Kasulatan.

Iner so pakaromogan na ontan iran katulongan diad panagaral ed Biblia? Diad agano niran taon saray Katolikon utor so angipalapag na dakel a libron panulong ed saray dakel a Katoliko diad panagbasa ra ed Biblia. Balet saratan ya utor so niiyan ed kaatapan. No saratan ya utor so tuan manutulong ed saray Katolikon mantalos ed Biblia, saray Katoliko so maganon makadiskobre na dakel ed saray bangat na Katoliko ya agnaromog ditan. Diad biek a dapag, no saray utor so mamatunong ed Katolikon doktrina, leglemewen da so kumpyansa na saray managbasa ed Biblia lapud iyuunor da so Kasulatan ed tradisyon na iglesia.​—Ipareng so Marcos 7:13.

Lalon ondarakel iray masimoon a Katolikon mangaawat na tulong ed saray Tasi nen Jehova. Diad dakel iran dalin, nilibu-libo ed saray Katoliko so manbabanikel a mamasa ed Biblia a tekep na pakatalos ingen ta samsamet so nanaawat da odino anggapo ni ingen so nanaawat dan tulong a manlapud saray papari ra. Kapadpara da man so Etiopen opisyal a mamabasa ed libro nen Isaias. Sanen tinepetan nen ebanghelisador a Felipe no peteg a natatalosan to so babasaen to, sipapaabeban inmebat so Etiope: “Panon kon natalosan no anggapo so sakey a mangiwanwan ed siak?” (Gawa 8:31, RS, Katolikon edisyon) Sikato so tinulongan nen Felipe, tan diad saginonor sayan masimoon a too so nagmaliw ya abautismoan a Kristiano. Mipadpara, legan a sikara so mankabkaabungan, naabet na saray Tasi nen Jehova iray Katoliko, tan sano ikuan na saraya a walaan ira na Biblia ed abung da, kerewen na saray Tasi no kaliktan da so tulong pian peteg a nagawan mabunga so panagbasa ra ed Biblia.

Panagbasa a Mamawala na Bunga

Diad panagbangat na Biblia a kimey da, saray Tasi nen Jehova so manguusar na dakel iran katulongan diad panagaral ed Biblia, a singa say My Book of Bible Stories (116 iran salaysay ed Biblia a nipresenta ed simplen lenguahe tan diad kronologon oksuyan), Is the Bible Really the Word of God? (para ed sientipiko tan historikon ebidensya ed inkamatua na Biblia), “All Scripture Is Inspired of God and Beneficial” (sinansakey a libron sumarya ed karga na Biblia, tekep na heograpiko tan historikon impormasyon), tan You Can Live Forever in Paradise on Earth, (a tinugyop toray kasulatan ed 30 makana ran tema, a pati say makapakelaw ya ilalon itatarya na Salita na Dios ed saray masimoon a managbasa na Biblia natan).

Sarayan katulongan ed panagaral na Biblia, dingan na personal a tulong ya iyoopresin maliket na saray Tasi nen Jehova ya anggapoy bayar, so manggawan maliket tan mabunga diad panagbasa yo ed Biblia. Naromog yo so panangiwanwan a para ed inagew-agew a panagbilay tan makapakelaw ya ilalo na pambilay ed insipan na Dios a Balon Oksuy, a ditan, et say linawa na Dios so “nagawa, ed dalin a singa ed tawen.”​—Mateo 6:10, JB.

[Paimano ed Leksab]

[Litrato ed pahina 7]

Binidbir na Etiope so nakaukolan pian natalosan so Biblia