Anto so Kabaliksan na Sarayan Amin?

INKUAN nen Jesu-Kristo: “Say anggaan na mundo” so napatnagan lapud bakal, kakulangan na tagano, salot, tan saray yegyeg.​—Mateo 24:​1-8; Lucas 21:​10, 11.

Nanlapula nen 1914, say bilay so titigwayen na pambabakal na saray nasyon tan saray etnikon grupo, a mabetbet a resulta na isasalet na saray klero ed politika tan diad aganggano ni et lapud kasmak ya iyaataki na terorista.

Anggaman ed inyaligwas ed produksion na tagano, pirmin kakisiran na tagano so nasasagmak na nilasus milyon a totoo ed sankadalinan. Kada taon et minilyon a totoo so ompapatey lapud kakisiran na tagano.

Say salot so kabiangan met na tanda ya inter nen Jesus. Kayari na Guerra Mundial I et kinmayat so trangkaso ya anigway ed bilay na masulok a 21,000,000. Aliwan singa saray salot nensaman ya angapekta labat ed pigaran lugar, satan so angapekta ed saray nasyon ed sankadalinan ontan met ed ararawi iran isla. Say AIDS so manasalot natan ed interon globo, tan saray salot a singa say TB, malaria, Thypoid, tan Dengue so mantutultuloy a manasalot ed saray onaaligwas a nasyon.

Unong ed report, kada taon et walay pigamplon libo a yegyeg a nandurumay kakasil. Anggaman ed walan kagawaan tan apaaligwas iran metodo ed panangireport, mabetbet a nibabalita iray desyang ed matoon lugar bilang resulta na saray yegyeg.

Impasakbay met na Biblia: “Ingen kabaten mo so saya, a dia ed saray kaunoran ya agew onsabi so saray panaon a maatap [“a mairap a pidenengan,” NW]. Ta saray totoo sikara naani so mangaro ed saray lamalaman da, maaro ra na pilak, managpasirayew, atagey a linawa, maayew, matulay ed saray kaatengan da, malamang, aliwa ran masimpit. Anggapo so aro ra a nianakan, anggapo so panangasi’ra, managpauges, aliwa ra’n maadia, maruksa ra, maingongot ed saray maabig. Managliput, mayu-uges, mapasang, maaro ed saray likeliket, a lalo nen say dia ed Dios. A wala so nengneng da ya inkasanto, et ingen itapat da so pakayari na saya’n inkasanto: onarawi ka met ed saray ontan.”​—2 Timoteo 3:1-5.

Agkayo ta onabobon a manbibilay itayo la ed “panaon a maatap [a mairap a pidenengan]”?

Kasin naiimano yo a diad malaknab a paraan et saray totoo so maaro ed inkasikaran dili, maaro ed kuarta, tan dadagdagen na kinon?

Siopa so makasuppiat a say mundo so napno na totoon mangipipilit ed panlabayan dan dili bangta andiay utang a linawa, mairap a katalosan, aliwan matoor?

Kasin naiimano yo a mapalalo la so itutunganga ed atateng pati say makapakebbiew a pakakaandi na panangaro, aliwan diad pigaran lugar labat noagta ed interon globo?

Seguradon namomoria yo a manbibilay itayo ed mundo a nigalet la’d aro ed liket bangta andian na aro ed kamaongan. Ontan so impaneskribe na Biblia ed saray awawey ya ontalona ed “saray kaunoran ya agew.”

Kasin nakaukolan ni so dakel a paneknek pian nibiig so panaon a pambibilayan tayo? Impasakbay met nen Jesus a legan na satan lanlamang a panaon, say maong a balita na Panarian na Dios so nipulong ed amin a panaayaman a dalin. (Mateo 24:14) Kasin nagagawa la itan?

Say Panag-Bantayan, a nibase ed Biblia a dyurnal a mangiyaapasakey ed panangipalapag ed maong a balita na Panarian nen Jehova, so regular ya iyiimprinta ed dakel a lenguahe nen say dinanman a palapagan.

Kada taon et mangidedeboto iray Tasi nen Jehova na masulok a sakey bilyon ya oras pian personal a mantasi ed arum nipaakar ed Panarian na Dios.

Diad kaplesan et say literatura a mangipapaliwawa ed Biblia so ipapalapag da ed manga 400 a lenguahe, anggan diad saray lenguahe na saray grupon niarawi tan walaan na daiset a populasyon. Nipapasabi la na saray Tasi nen Jehova so maong a balita ed amin a nasyon; napupulongan da met la so dakel iran isla tan teritorya ya ag-ikabkabilangan ed mapolitikan panmoria. Diad maslak a daldalin, sikaray regular a mangikokondukta na programan panangibangat ed Biblia.

On, say maong a balita na Panarian na Dios so nipupulong la ed amin a panaayaman a dalin, aliwan pian kombertien so mundo, noagta pian makapantasi. Saray totoo ed inerman a pasen so naiikdan na pankanawnawan mangipanengneng no kasin importante ed sikara so amalsa ed katawenan tan dalin tan no kasin ipanengneng da so respeto ed saray ganggan to tan ipatnag da so panangaro ed kapara ran too.​—Lucas 10:25-​27; Apocalipsis 4:11.

Agla manbayag, sigpot lan ekalen na Panarian na Dios manlapud dalin so amin a marelmeng tan pagmaliwen To itan a sankagloboan a paraiso.​—Lucas 23:43.

[Kahon ed pahina 6]

Kaunoran Iran Agew na Anto?

Aliwa irayan kaunoran ya agew na amin a katooan. Iyoopresi na Biblia so ilalon pambilay ya ando lan ando ed saraman so manggagawa na linaway Dios.​—Juan 3:​16, 36; 1 Juan 2:17.

Aliwa irayan kaunoran ya agew na dalin. Isisipan na Salitay Dios a say panaayaman a dalin et mansiansia ed ando lan ando.​​—Salmo 37:29; 104:5; Isaias 45:18.

Imbes, saraya so kaunoran iran agew na sayan marelmeng tan andiay-aro a sistema na bengabengatla tan kaunoran met iran agew na saramay manutumbok ed satan.​—Uliran 2:​21, 22.

[Kahon/Litrato ed pahina 7]

Peteg Kasin Salita na Dios so Biblia?

Aminpigan danay ya insulat na saray propeta na Biblia: “Onia so kuan nen Jehova.” (Isaias 43:14; Jeremias 2:2) Anggan si Jesu-Kristo, ya Anak na Dios, so angidanet a sikatoy ‘agnansalita ed inkasikaton [dili].’ (Juan 14:10) Malinew ya ibabaga na Biblia a mismo: ‘Amin a sulat et impuyan na Dios.’​—2 Timoteo 3:16.

Anggapo lay arum a libro a nipalapag ed dakel a lenguahe​—ed masulok lan 2,200, unong ya inreport na United Bible Societies. Anggapo lay arum a libro ed ontan karakel a sirkulasyon​—masulok la natan ya apatiran bilyon a kopya. Agta ontan so nailaloan yo ed mensahen nanlapud Dios a parad amin a katooan?

Parad mas malaknab ya impaningbat ed saray paneknek a say Biblia et impuyan na Dios, nengnengen so Libron Parad Amin a Totoo, impalapag na saray Tasi nen Jehova.

No basaen yo so Biblia tan bidbiren yo so katuaan a talagan Salita itan na Dios, nagunggonaan kayon maong.

[Kahon/Saray litrato ed pahina 8]

Anto so Panarian na Dios?

Satan et gobierno ed tawen a mangirerepresenta na pananguley na tuan Dios, si Jehova, say Amalsa ed tawen tan dalin.​—Jeremias 10:​10, 12.

Ipapabidbir na Biblia a si Jesu-Kristo imay inikdan na Dios na autoridad a manuley. (Apocalipsis 11:15) Sanen wadiad dalin, impatnag nen Jesus a sikatoy walaan la na makapakelkelaw ya autoridad a nanlapud Dios​—sakey ya autoridad ya angiter ed sikato na pakayarin mangontrol ed saray natural a puersa, amaabig na nanduruman klase na sakisakit, tan amaoli ni ingen na saray inaatey. (Mateo 9:​2-8; Marcos 4:​37-​41; Juan 11:​11-​44) Impasakbay na apuyanan a propesiya na Biblia ya iter met na Dios ed sikato so “panuley, tan gayaga, tan sakey a panarian, ya amin so saray baley, saray nasyon, tan pansasalita manlingkor ira komon ed sikato.” (Daniel 7:​13, 14) Satan a gobierno so atawag a Panarian na tawen; diad tawen so pangaagamilan la natan nen Jesu-Kristo ed pananguley to.

[Saray litrato ed pahina 7]

Sankagloboan a panangipulong ed maong a balita