Iner so Direksion na Bilay Mo?
• Dakel a totoo so nigalet lan maong ed inagew-agew a panagbilay da ya agda la tanto nononoten no iner so aarapen da.
• Papakabatan itayo na Biblia nipaakar ed alay abig iran nagawa ed arapen. Ipapasakbay met na satan ed sikatayo so onsabin sankagloboan a pananguman ed saray institusyon na too. Pian nagunggonaan itayo tan napaliisan so desyang, maganat so positibon ikiwas.
• Walaray totoo ya amta ra so ibabaga na Biblia tan sasalien dan iyaplika itan balet aabuloyan da iray kapagaan ed bilay a mangisuawi ed sikara.
• Kasin maliket kayo ed direksion na bilay yo? Sano mangiplano kayo na saray aktibidad yo, kasin nononoten yo no panon irayan makaapekta ed manbayag iran kalat yo ed bilay?
[Kahon/Saray litrato ed pahina 9]
Anto So Sankaimportantian ed Sika?
Panon kaimportante ed sika iray onggendan? Numeroan iratan.
Dakel ed saratan so walaan na dugan pasen ed bilay, balet no kaukolan moy manpili, dinan so unaen mo? onkomadua? tan ontumbok ni ra.
․․․ Panligliwaan
․․․ Trabahok odino karerak
․․․ Bunigas ko
․․․ Dilin liket ko
․․․ Asawak
․․․ Atateng ko
․․․ Ananak ko
․․․ Sakey a balibalin abung, mararakep iran kawes
․․․ Pagmaliw a sankaabigan ed antokaman a gawaen ko
․․․ Panagdayew ed Dios
[Kahon ed pahina 10, 11]
Kasin Saray Pipilien Mo et Mangipaarap ed Sika ed Talagan Labay Mon Direksion?
NONOTEN IRAYAN TEPET
PANLIGLIWAAN: Kasin say pipilien ko a panligliwaan et pakarepreskoan ko? Kasin mapeligro itan, a pakarisgoan na bunigas ko odino pakabaldadoan ko ni ingen? Kasin “panliketan labat” itan a mangilalanor ed panliket a pigaran oras balet mangitarok na manbayag a kaermenan? Anggano say panligliwaan a pilien ko et maabig, kasin dakel ya oras so uusaren ko ed satan kanian ngalngali anggapo lay oras ko ed mas importante iran bengatla?
TRABAHOK ODINO KARERAK: Kasin onkakana itan pian suportaan iray pankaukolan ed bilay, odino kasin aripen ak la na satan? Kasin say trabahok et mankakaukolan na dakel a panaon tan sagpot ko a mangaapekta la ed bunigas ko? Kasin lablabayen koy man-overtime ed trabahok nen say mangusar na panaon a kaibay asawak odino ananak ko? No say amok et walay ipatrabaho ton pakakonsiensiaan ko odino mabetbet a makasbel ed espiritual iran pankaabigan, kasin gawaen ko itan a trabaho ta pian agak nasisante?
BUNIGAS KO: Kasin agko pampapagaan itan, odino lawas kon aasikasoen itan? Kasin totongtongen kon naynay itan? Kasin say paraan na pangaasikasok ed satan et pakapatnagan na kapagaan ko ed pamilyak?
DILIN LIKET KO: Kasin saya so manunan nononoten ko? Kasin iyuunak itan nen say liket na asawak odino pamilyak? Kasin say paraan a panaanap ko ed satan et mitunosan ed panagdayew ko ed tuan Dios?
ASAWAK: Kasin ipapasen koy asawak a basta labat kaibak sano mitunosan itan ed personal a pankaabigan ko? Kasin mapagalang so pidedeneng ko ed asawak, bilang sakey a makanepegan na dignidad? Kasin say pananisiak ed Dios so mangaapekta ed panmoriak ed asawak?
ATATENG KO: No minor de edad ak ni, kasin matulok ak ed atateng ko—a marespeto ak ya oneebat ed sikara, gagawaen iray ipapagawa ran kimey, onsesempet ed abung ed oras ya imbaga ra, papaliisan iray pililimog tan aktibidad ya isesebel da? Bilang sakey a wala la’d edad, kasin dedengelen koy atateng ko tekep na respeto, ya iikdan ira na matukoy a tulong sano nakaukolan iya? Kasin say pidedeneng ko ed sikara et lapud pankaabigan kon dili odino lapud simbawa na Salitay Dios?
ANANAK KO: Kasin responsable ak a mangibangat ed saray ananak ko nipaakar ed susto iran estandarte ed moral, odino kasin iilaloan ko so eskuelaan a manggawa ed satan? Kasin mangigagana ak na panaon a kaibay ananak ko, odino akauley laray gakgalaw, TV, odino kompyuter pian mansiansia iran okupado? Kasin didisiplinaen koy ananak ko no ibaliwala da iray panonot na Dios, odino gagawaen ko labat itan sano wala labat so agawaan dan makapasyodot ed siak?
SAKEY A BALIBALIN ABUNG, MARARAKEP IRAN KAWES: Antoy ipapatnag na pangaasikasok ed itsurak tan ed saray kaykayarian ko—kasin lapud iilaloan kon impresyon ed siak na saray kakaabay? lapud pankaabigan na pamilyak? lapud sakey ak a managdayew ed Dios?
PAGMALIW A SANKAABIGAN ED ANTOKAMAN A GAWAEN KO: Kasin moriaen kon importante so panggawa ed saray bengatla ed maabig a paraan? Kasin panggugunaetan koy magmaliw a sankaabigan? Kasin panaburidoan ko no walay sananey a magmaong so panggagawa toy sakey a bengatla?
PANAGDAYEW ED DIOS: Kasin mas importante ed siak so pakagamor na abobon na Dios nen say pakagamor na abobon na asawak, ananak ko, atateng ko, odino amok? Ta pian napansiansia so mainawan panagbilay, kasin ipapasen koy serbisyok ed Dios bilang agtanto importante no ikompara ed mainawan panagbilay?
NONOTEN A MAONG SO SIMBAWA NA BIBLIA
Panon kaimportante ed bilay mo so panagdayew ed Dios?
Eclesiastes 12:13: “Takotan mo so Dios, tan unoren mo so saray ganggan to; ta saya sikato so katiponan na kanepegan na too.”
TEPETAN MOY INKASIKA: Kasin napatnagan ed bilay ko ya ontan so panmoriak ed saray bengatla? Kasin nadedetermina ed katutulok ko ed saray ganggan na Dios no panon kon aasikasoen iray responsabilidad ko ed abung, diad trabaho, odino diad eskuelaan? Odino kasin say arum a pankaabigan odino desdes ed bilay so maneditermina no kasin mangigagana ak na panaon parad Dios?
Anto so nengneng na relasyon mo ed Dios?
Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.”
Mateo 4:10: “Sika igalang mo naani so Dios a Katawan mo, tan sikato labat so panlingkoran mo.”
TEPETAN MOY INKASIKA: Ontan kasi so liknaan ko nipaakar ed Dios? Kasin say inagew-agew iran kimey ko, ontan met ed paraan a pangaarap ko ed saray kairapan, so pakapatnagan na ontan a panagmatalek tan debosyon?
Panon kaimportante ed sika so panagbasa tan panagaral ed Biblia?
Juan 17:3: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”
TEPETAN MOY INKASIKA: Kasin say pamapablik ed panagbasa na Salitay Dios tan panagdalepdep ed satan so pakapatnagan a talagan papanisiaan ko itan?
Panon kaimportante ed sika so iyaatendi ed saray miting ed kongregasyon na saray Kristiano?
Hebreos 10:24, 25: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, . . . tan nagkalalo la, lapud nanengneng yo a manasingger so agew.”
Salmo 122:1: “Nanliket ak nensaman nen imbaga ra ed siak, onla itayo ed abung nen Jehova.”
TEPETAN MOY INKASIKA: Kasin napatnagan ed kabibilay ko a papablien ko iyan panangiwanwan a naromog ed Salitay Dios? Legan na apalabas a bulan, kasin wala iray asaew kon Makristianon miting lapud inabuloyan koy arum a bengatla a makasalet ed saratan?
Kasin maseseg kan mibibiang ed pangitongtong ed arum nipaakar ed Dios tan ed gagala to?
Mateo 24:14: “Saya ya ebanghelyo na panarian nipulong naani ed sankamundoan ya onkanan pamintuaan . . . et saman la onsabi so anggaan.”
Mateo 28:19, 20: “Onla kayo sirin, tan manggawa kayo na saray babangatan ed amin a nasyones, . . . ya ibangat yo ran mangunor na amin a bengabengatla ya ingganggan ko ed sikayo.”
Salmo 96:2: “Kantaan yo si Jehova, galgalangen yo so ngaran to; ipanengneng yo so panangilaban to ya inagew-agew.”
TEPETAN MOY INKASIKA: Kasin ipapasen kon importante iyan aktibidad ed bilay ko? Kasin say panginanabang ko ed satan et pakapatnagan na kombiksion ko nipaakar ed inkaseryoso na panaon a pambibilayan tayo?