Iner so Direksion na Sayan Mundo?
Inagew-agew lan nibabalita ed interon mundo iray graben problema tan makapakebbiew iran nagagawa! Antoy kabaliksan na satan?
PERSONAL A SEGURIDAD: Papasabogen iray bomba diad saray tindaan. Napapaltog iray managbangat tan saray estudyante diad eskuelaan. Nakikidnap iray ugugaw ya agnai-imano na saray atateng da. Nahoholdap iray bibii tan mamasiken anggano agew.
KIPAPASEN NA RELIHYON: Susuportaan na saray relihyon iray mankalaban ed guerra. Naakusaan na palanit a panagpatey iray klero. Saray pari so seksual a mangaanamot ed saray kalangweran; sasakbongan itan na simbaan. Ondaraiset iray mimimisa; ilalako iray simbaan.
KALIBERLIBER: Nakakalbo iray katakelan parad komersyal iran proyekto. Popopoen na saray mairap-bilay iray kakiewan parad pantungo. Apolusyon la so danum, delikadon inumen. Nadederal so panagsigay lapud basura na saray pabrika tan arum a modernon paraan. Apolusyon lan maong so dagem.
PANANAP NA PAMBILAY: Unong ed report et abebbeba so almo na kada sakey a too diad abalaten na Sahara diad Aprika ed sakey taon. Nalulugi iray negosyo lapud inkaagum na saray direktor na korporasyon, a sengegan na nilibon naaandian na trabaho. Lapud panagsaol et nalulugi iray managpoonan.
KAKISIRAN NA TAGANO: Manga 800,000,000 a totoo ed sankamundoan so naeerasan.
GUERRA: Masulok a 100,000,000 a totoo so inatey lapud guerra nen koma-20 siglo. Magenap la so akasimpen a nuklear ya armas a mamatey ed amin a katooan anggan maminpigan danay. Sibil a pambabakal. Aapektaen na terorismo so interon globo.
SALOT TAN ARUM A SAKIT: Ginmapo nen 1918, say trangkaso Español so amatey ed 21,000,000 a totoo. Say AIDS natan so magmamaliw a say “pirmin manasalot ed awaran na too.” Say kanser tan sakit ed puso so mangitatarok na ermen ed sankamundoan.
Ag-iyaapasakey ed sakey labat a balita. Kasin nambibiigan iratan a nagagawa? Odino kabiangan iratan na sankagloboan a nagagawa a walaan na peteg a kabaliksan?
[Kahon/Litrato ed pahina 5]
Peteg Kasin Mangiyaansakit so Dios?
Lapud pakakagonigon ed makapakigtot iran ebento odino inkaandi na papablien da, pankelawan na dakel a totoo no akin ya ag-onsasalet so Dios pian naamper iratan a bengatla.
Talagan mangiyaansakit so Dios. Sikatoy mangitatarya na napanmatalkan a giya tan peteg ya inawa natan. (Mateo 11:28-30; 2 Timoteo 3:16, 17) Inyareglo toy permanentin pangangga na karawalan, sakit, tan ipapatey. Ipapanengneng na saray probisyon to a sikatoy aglabat mangiyaansakit ed totoo a saksakey so nasyonalidad da noagta ed totoo ed amin a nasyon, tribu, tan pansasalita.—Gawa 10:34, 35.
Kaunongan kaimportante ed sikatayo so gagala na Dios? Kasin amta yo no siopa so Amalsa ed tawen tan dalin? Anto so ngaran to? Anto so gagala to? Ebatan to irayan tepet diad Biblia. Ibaga to ed sikatayo ditan no antoran kundang so gagawaen to pian panampoten so karawalan ontan met ed sakit tan ipapatey. Pian nagunggonaan itayo, anto so nakaukolan tayon gawaen? Kaukolan tayon aralen so nipaakar ed sikato tan ed gagala to. Panon itayon nagunggonaan ed saray probisyon to no agtayo ipatnag so pananisia ed sikato? (Juan 3:16; Hebreos 11:6) Importante met a tuloken iray kakaukolanen to. (1 Juan 5:3) Kasin interesado kayon maong a manumpal ed satan?
Pian natalosan tayo no akin ya iyaabuloy na Dios iray peles a kipapasen, nepeg tayon talosan so sakey ya importantin isyu. Ipaliwawa itan na Biblia. Diad pahina 15 na sayan publikasyon, nabasa yo no anto iyan isyu.