Sioparay Kakabusol na Dios?

Say manunan kabusol na Dios et si Satanas a Diablo. Sikatoy sakey ya espiritun pinalsa a nanrebeldi ed si Jehova. Tuloytuloy nin milalaban si Satanas ed Dios tan guguloen ton maong iray totoo. Mauges si Satanas. Sikatoy matila tan manamatey.​—Juan 8:44.

Arum ya espiritun pinalsa so akinonong ed si Satanas diad impanrebeldi to ed Dios. Tinawag ira na Biblia a dedemonyo. Singa si Satanas, saray demonyo et kakabusol na totoo. Labalabay dan pasakitan iray totoo. (Mateo 9:​32, 33; 12:22) Deralen nen Jehova si Satanas tan saray demonyo to ed ando lan ando. Antiktikey lay natitilak a panaon da ed panggugulo ra’d totoo.​—Apocalipsis 12:12.

No labay moy magmaliw a kaaro na Dios, agmo nepeg a gawaen iray labay nen Satanas a gawaen mo. Si Jehova so kagula nen Satanas tan saray demonyo. Sikaray kakabusol na Dios, tan labay dan magmaliw ka met a kabusol na Dios. Nepeg mon pilien no siopay labay mon paliketen​—si Satanas odino si Jehova. No labay moy andi-anggaan a bilay, nepeg mon pilien so panggawa na linawa na Dios. Dakel iray taktika tan paraan nen Satanas pian palikdoen so totoo. Papalikdoen to so maslak a totoo.​—Apocalipsis 12:9.