Sioparay Kakaaro na Dios?

Si Jesu-Kristo et Anak nen Jehova tan sikatoy sankaapitan tan pinabpabli ton kaaro. Sakbay a nambilay si Jesus bilang too diad dalin, sikatoy nambilay la ed tawen bilang makapanyarin espiritun pinalsa. (Juan 17:5) Insan sikatoy linma diad dalin pian ibangat ed totoo so katuaan nipaakar ed Dios. (Juan 18:37) Inter to met so bilay to bilang too pian isalba iray matulok a totoo manlapud kasalanan tan ipapatey. (Roma 6:23) Si Jesus et Ari la natan ed Panarian na Dios, sakey a mangatatawen a gobierno a pagmaliwen ton Paraiso iyan dalin.​—Apocalipsis 19:16.

Saray anghel so kakaaro met na Dios. Saray anghel so agnambilay ed dalin bilang totoo. Sikaray apalsa ed tawen antis a ginawa na Dios so dalin. (Job 38:​4-7) Walaray minilyon ya anghel. (Daniel 7:10) Labay na sarayan mangatatawen a kakaaro na Dios a naaralan na totoo so katuaan nipaakar ed si Jehova.​—Apocalipsis 14:​6, 7.

Say Dios so walaan met na kakaaro ed dalin; tatawagen toran tastasi to. Ipaamta na sakey a testigo ed korte iray amta to nipaakar ed sakey a too odino sakey a bengatla. Ipapaamta met na saray Tastasi nen Jehova ed arum iray amta ra nipaakar ed si Jehova tan say gagala to. (Isaias 43:10) Singa saray anghel, labay kan tulongan na Tastasi a makaaral na katuaan nipaakar ed si Jehova. Labay dan magmaliw ka met a kaaro na Dios.