Sakey a Panmadmaran ed Apalabas

Ag-abuloyan nen Jehova iray mauges a totoo a maneral ed Paraiso. Saraman labat so kakaaro to so manayam ditan. Anto so nagawa ed mauges a totoo? Pian naamtaan so ebat, konsideraen so tuan istorya nipaakar ed si Noe. Nambilay si Noe nilibon taon lay apalabas. Sikatoy maong a too a lawas nanggunaet a manggaway linawa nen Jehova. Balet mauges so ginawa na arum a totoo ed dalin. Kanian inkuan nen Jehova ed si Noe a Sikatoy mangitarok na delap pian deralen ya amin iramay marelmeng a totoo. Binilin To si Noe a mangipaalagey na biong ta pian sikato tan say pamilya to et ag-ompatey sano onsabi so Delap.​—Genesis 6:​9-18.

Si Noe tan say pamilya to so nampaalagey na biong. Pinasakbayan nen Noe so totoo ya onsabi so Delap, balet ag-ira dinmengel ed sikato. Intultuloy dan ginawa so mauges iran bengatla. Sanen asumpal lay biong, inloob nen Noe iray ayayep ed biong, tan sikato tan say pamilya to so linmoob met. Insan impasabi nen Jehova so maksil a bagyo. Inmuran ed loob na 40 agew tan 40 labi. Adelap so intiron dalin.​—Genesis 7:​7-12.

Inaatey iray marelmeng a totoo, balet akaliktar si Noe tan say pamilya to. Sikaray maligen ya intarok nen Jehova ed dalin ya alinisan manlapud karelmengan panamegley na Delap. (Genesis 7:​22, 23) Ibabaga na Biblia a maminsan lamet et onsabi so panaon a deralen nen Jehova iramay agmalabay a manggawa na maptek. Agnaderal iray maong a totoo. Sikaray manbilay ya ando lan ando ed Paraison dalin.​—2 Pedro 2:​5, 6 9.

Dakel a totoo natan so manggagawa na mauges iran bengatla. Say mundo so napno na kaguloan. Paulit-ulit ya ibabaki nen Jehova iray Tastasi to pian pasakbayan iray totoo, balet maslak et agmalabay ya ondengel ed saray salita nen Jehova. Agda labay ya umanen iray dalan na kabibilay da. Agda labay ya awaten so ibabaga na Dios nipaakar ed no anto so duga tan aliwa. Anto so nagawa ed sarayan totoo? Kasin nasabin siansiay panguman da? Dakel so agbalot manguman. Onsabi so panaon sano saray marelmeng a totoo so naderal tan aglan balot manbilay lamet.​—Salmo 92:7.

Say dalin so agnaderal; pagmaliwen itan a paraiso. Saraman so magmaliw a kakaaro na Dios so manbilay ya ando lan ando ed Paraiso diad dalin.​—Salmo 37:29.