Asingger Lay Paraiso!

Saray mauges a bengatlan nagagawa natan ed dalin et pakapatnagan ya asingger lay Paraiso. Imbaga na Biblia a naeksperiensia tayo iray alay uges a panaon antis ya onsabi so Paraiso. Manbibilay itayo la natan ed ontan iran panaon! Niraya so pigaran bengatla ya imbaga na Biblia a nagawa:

Angkakabaleg a guerra. “Ontalindeg naani nasyon sumpa ed nasyon tan panarian sumpa ed panarian.” (Mateo 24:7) Nagagawa la iyan propesiya. Nanlapula’d nen taon 1914, agawa lay duaran guerra mundial tan dakel ya angkekelag a guerra. Minilyon lan totoo so inatey lapud saratan.

Kasmak a sakisakit. Niwala so ‘salot ed nambabangil a pasen.’ (Lucas 21:11) Kasin nagagawa iya? On. Say kanser, sakit ed puso, tuberculosis, malaria, AIDS, tan arum niran sakit so anigway la ed minilyon a totoo.

Kakulangan na tagano. Diad intiron dalin et walaray totoon andian na magenap a nakan. Minilyon a totoo so ompapatey kada taon lapud eras. Saya so sananey nin tanda a magano lan onsabi’d dia so Paraiso. Ibabaga na Biblia: “Wala naani eraeras.”​—Marcos 13:8.

Yegyegyeg. “Wala ra naani . . . yegyeg ed nambabangil a pasen.” (Mateo 24:7) Saya met so nagagawa la ed panaon tayo. Masulok a sakey milyon a totoo so inatey-atey la lapud yegyegyeg nanlapula’d nen 1914.

Marelmeng a totoo. Saray totoo so magmaliw a “maaro ed kuarta” tan “maaro ed inkasikaran dili.” Sikaray magmaliw a “maaro ed likeliket imbes a maaro ed Dios.” Saray ananak so magmaliw a “matunganga ed saray kaatengan.” (2 Timoteo 3:​1-5, NW) Agka kasi onabobon ya ontan so dakel a totoo natan? Andian ira na respeto ed Dios, tan guguloen da iraman so manggugunaet a makaaral nipaakar ed Dios.

Krimen. Niwala met so “iloor na kaugsan.” (Mateo 24:12) Seguradon miabobon ka a say krimen et mas mauges nen say nen apalabas iran taon. Saray totoo ed inerman a pasen so napepeligro ompano natakewan, nasaol, odino napasakitan.

Amin na sarayan bengatla so mangipapanengneng ya asingger lay Panarian na Dios. Ibabaga na Biblia: “Ontan yo met sano nanengneng yo so sarayan bengatla a nagawa, amtaen yo a say panariay Dios asingger la.” (Lucas 21:31) Anto so Panarian na Dios? Satan so mangatatawen a gobierno na Dios a pagmaliwen ton Paraiso iyan dalin. Salatan na Panarian na Dios iray gobierno na too.​—Daniel 2:44.