Manayam ed Paraiso Iray Kakaaro na Dios

Say Paraiso et aliwan singa say mundon panaayaman tayo natan. Agbalot nilabay na Dios a say dalin et napano na kaguloan tan kaermenan, ot-ot tan kairapan. Diad arapen, gawaen na Dios a paraiso so dalin. Anto so itsura na Paraiso? Nengnengen tayo pa no antoy ibabaga na Biblia:

Maong a totoo. Say Paraiso so magmaliw ya ayaman na kakaaro na Dios. Maabig so gawaen da parad sakey tan sakey. Sikaray manbilay unong ed matunong iran dalan na Dios.​—Uliran 2:21.

Daakan a tagano. Diad Paraiso, anggapo lay eras. Ibabaga na Biblia: “Wala so daakan ya ilik [odino, tagano] ed tapew na dalin.”​—Salmo 72:16.

Marakep iran kaabungan tan makapalikliket a trabaho. Diad Paraison dalin, kada pamilya so walaan na abung ton dili. Mankimey so balang sakey a panlapuan na tuan liket.​—Isaias 65:​21-23.

Kareenan ed sankamundoan. Saray totoo so agla manbabakal tan agla ompatey makasengeg ed guerra. Ibabaga na Salitay Dios: “[Say Dios] patundaen to so bakabakal.”​—Salmo 46:​8, 9.

Maong a bunigas. Isisipan na Biblia: “Say manaayam [ed Paraiso] agto naani ikuan, Mabeblay ak.” (Isaias 33:24) Ontan met, anggapo lay lupoy odino bulag odino telek odino emel.​—Isaias 35:​5, 6.

Naandi lay ot-ot, kaermenan, tan ipapatey. Ibabaga na Salitay Dios: “Anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”​—Apocalipsis 21:4.

Naandi lay mauges a totoo. Isisipan nen Jehova: “Say marelmeng napegpeg a manlapu ed dalin, tan saray liputan nabagot ira ed sikato.”​—Uliran 2:22.

Manaaroan tan manrerespetoan so totoo. Anggapo lay ag-inkahustisya, panaglames, agum, tan busolan. Mankakasakey lay totoo tan manbilay ira a mitunosan ed saray matunong a dalan na Dios.​—Isaias 26:9.