Say Dios so Sankaabigan a Nakaarom ed Kapiganman

Say pagmaliw a kaaro na Dios so sankaabigan a bengatlan nagawa ed sika. Bangatan ka na Dios no panon so pagmaliw a maliket tan maligen; ibulos to ka manlapud dakel iran lingon sisiaen tan makapasakit ya agagamil. Dengelen toray pikakasim. Tulongan to kan naeksperiensia so akindalem a kareenan tan kompiyansa. (Salmo 71:5; 73:28) Antabayan ka na Dios ed panaoy gonigon. (Salmo 18:18) Tan iyoopresi ed sika na Dios so regalo ton andi-anggaan a bilay.​—Roma 6:23.

Diad iyaapit mo ed Dios, onapit ka met ed kakaaro na Dios. Magmaliw iran kakaarom met. Diad tua, magmaliw iran singa agagim a lalaki tan bibii. Maliket iran mangibangat ed sika nipaakar ed Dios tan ontulong ed sika tan mamaseseg ed sika.

Ag-itayo mipara ed Dios. Legan mon panggugunaetan so pikakaaro ed Dios, nepeg mon talosan so importantin katuaan. Say pikakaaro ed Dios et agto kabaliksan a pankaaro na mankaparan persona. Abaybayag lay inkiwala to tan sikatoy mas makabat tan mas makapanyari nen say sikatayo. Sikato so makanepegan a Manuley tayo. Kanian no labay tayo so magmaliw a kaaro to, nepeg itayon ontalineng ed sikato tan gawaen so ipapagawa to ed sikatayo. Lawas a manresulta iya ed pankaabigan tayo.​—Isaias 48:18.