Nepeg Mon Amtaen so Nipaakar ed Dios

Pian magmaliw a kaaro na Dios, nepeg mon amtaen so nipaakar ed sikato. Kasin amta na kakaarom so ngaran mo tan kasin uusaren da itan? On. Labay met na Dios a sikatoy nakabat mo tan usaren moy ngaran to. Say ngaran na Dios et Jehova. (Salmo 83:18; Mateo 6:9) Nepeg mo met ya amtaen iray labay to tan agto labay. Kaukolan mon amtaen no sioparay kakaaro to tan sioparay kakabusol to. Mankaukolan na panaon so pangabat ed sakey. Ibabaga na Biblia a makabat so pangigana na panaon pian naamtaan so nipaakar ed si Jehova.​—Efeso 5:​15, 16.

Gawaen na kakaaro na Dios so makapaliket ed sikato. Isipen pay nipaakar ed kakaarom. No makapuy so pantratom ed sikara tan gawaen moray agda labay, kasin tuloytuloy ka nin kaaro ra? Siempre andi la! Ontan met, no labay moy magmaliw a kaaro na Dios, kaukolan mon gawaen so makapaliket ed sikato.​—Juan 4:24.

Aliwan amin a relihyon et mansusumpal ed pikakaaro ed Dios. Si Jesus, a sankaapitan a kaaro na Dios, so analambit na duaran dalan. Say sakey a dalan et maawang tan napnoy totoo. Satan a dalan so ompugta ed kadederal. Samay sananey a dalan et mainget tan dagdaiset so totoon ondadalan ed satan. Satan a dalan so mangitonton ed andi-anggaan a bilay. Kabaliksan na saya a no labay mon nagamoray pikakaaro na Dios, nepeg mon aralen so dugan paraan na panagdayew ed sikato.​—Mateo 7:​13, 14.