Mikakaaro ed Sika so Dios

Labay na Dios so mikaaro ed sika. Kasin naisip mo la a nayarian moy magmaliw a kaaro na sankatalonggaringan a Persona ed uniberso? Si Abraham, a nambilay nensaman, so atawag a kaaro na Dios. (Santiago 2:23) Nanggayagaan met na arum ya abitla ed Biblia so pikakaaro ed Dios tan abendisionan iran tuloy. Natan, walaray totoo ed amin a parti na dalin a nagmaliw lan kakaaro na Dios. Nayarian mo met so magmaliw a kaaro na Dios.

Say pagmaliw a kaaro na Dios so magmaong nen say pagmaliw a kaaro na siopaman a too. Agbalot dismayaen na Dios iray matoor a kakaaro to. (Salmo 18:25) Say pagmaliw a kaaro na Dios et magmaong nen say pakawalaan na kaykayamanan. Sano ompatey so mayaman a too, onla’d arum so kuarta to. Balet, saramay panggagayagaan day pikakaaro ed Dios so walaan na kayamanan ya anggapoy makasamsam.​—Mateo 6:19.

Arum a totoo so nayarin mamatunda ed sika diad panaral mo nipaakar ed Dios. Pati arum ni ingen ed kakaarom tan kapamilyam so manggawa ed saya. (Mateo 10:​36, 37) No elekan ka na arum odino pagyawen da ka, tepetan moy inkasika, ‘Siopan talagay labay kon paliketen​—totoo odino Dios?’ Isipen pa iya: No inkuan na sakey ed sika ya agka la mamangan, kasin unoren mo? Siempre andi! Kaukolan moy tagano pian manbilay. Balet nayarian na Dios a pambilayen ka na ando lan ando! Kanian agbalot aabuloyan so siopaman a mamatunda ed sika diad panaral mo no panon so pagmaliw a kaaro na Dios.​—Juan 17:3.