Ацы тӕлмацы тыххӕй

АЦЫ чиныг, «Библи – Ног дунейы тӕлмац», тынг баххуыс кӕндзӕн дӕуӕн, цӕмӕй Хуыцауы Ныхас ноджы хуыздӕр бамбарай. Уыцы хъуыддаг дӕ къухы бафтдзӕн, ног компьютерон программӕты руаджы дзы цы хицӕндзинӕдтӕ скодтой, уыдоны фӕрцы.

АЦЫ ТӔЛМАЦ КУЫД КОНД У ӔМӔ ДЗЫ ЦЫ ИС

ТЕКСТЫ АРӔЗТ. Ацы тӕлмацы сӕртӕ ӕмӕ стихтӕ дих сты, англисаг ӕвзагыл «Ног дунейы тӕлмац»-ы куыд дих сты, афтӕ. Ӕмӕ уый стыр ӕххуыс у, Йегъовӕйы Ӕвдисӕнтӕн ӕгас дунейы дӕр цы ахуыры программӕ ис, уый уадзынӕн. Алы стих дӕр абзацӕй, ома ног рӕнхъӕй нӕ райдайы. Стихтӕ абзацтыл дих сты сӕ хъуыдымӕ гӕсгӕ – алы абзацы дӕр ис иу ӕххӕст хъуыды. Поэзийы хуызы дзы цы хӕйттӕ ис, зӕгъӕм, Псаломтӕ, уыдон арӕзт сты, ӕмдзӕвгӕтӕ куыд арӕзт вӕййынц, афтӕ. Алфавиты дамгъӕты равӕрдмӕ гӕсгӕ дзы цы хӕйттӕ ис, ома акростихтӕ, уыдон дӕр нысангонд сты. (Кӕс Псалом 119.)

СӔРГӔНДТӔ. Алы фарсыл дӕр, иуӕй-иу фӕрсты йеддӕмӕ, уӕлейӕ ис сӕргӕндтӕ. Уыдоны фӕрцы ӕнцон ссарӕн у, Библийы кӕм цы фыст ис, уый.

ДЗЫРДАМОНӔНТӔ. Ацы чиныджы фӕстейӕ ис ахӕм хай, «Дзырдамонӕн», зӕгъгӕ. Уым ис Библийӕ кӕцыдӕр дзырдтӕ ӕмӕ, кӕм ӕмбӕлынц, уыцы стихтӕ. Алы дзырдмӕ дӕр дзы ис тынг цыбыр текст, кӕцӕй ист у, уыцы стихӕй. Стӕй ма, цӕмӕй цавӕрдӕр фиппаинаг ӕнцондӕр ссарӕн уа, уый тыххӕй ма дзы ис «Дзырдамонӕн фиппаинӕгтӕн» дӕр.

УӔЛӔМХАСӔН. Уӕлӕмхасӕны цы ӕрмӕг ис, уый хорз ӕххуыс у Библийы сӕйраг ахуырӕдтӕ ӕмӕ семӕ цы фарстатӕ баст сты, уыдон ӕмбарын кӕнынӕн. Уӕлӕмхасӕны кӕрон ма ис ӕхцайы, уӕзбарӕнты ӕмӕ дӕргъбарӕнты таблицӕтӕ, дзуттаг къӕлиндар ӕмӕ, Библийы кӕй кой цӕуы, уыцы бынӕтты картӕтӕ дӕр. Уӕлӕмхасӕны райдианы ис фыст, цавӕр хӕйттӕ дзы ис ӕмӕ сӕ кӕцы фарсыл ссарӕн ис, уый. Уӕлӕмхасӕн бирӕтӕн баххуыс кӕндзӕн Сыгъдӕг Фыстад ноджы лӕмбынӕгдӕр иртасынӕн ӕмӕ Библийы рӕстдзинады тыххӕй ноджы хуыздӕр дзуапп дӕттынӕн (1 Петры 3:15).

СТИХТӔ АСТӔУӔЙ ФӔЛГӔТЫ. Алы фарсыл дӕр астӕуӕй ис фӕлгӕт. Уыцы фӕлгӕтты ӕдӕппӕтӕй ис 125 000 стихӕй фылдӕр. Уыдонӕй бӕрӕг у, Библийы фыст хъуыдытӕн ӕмӕ хабӕрттӕн, иуӕй-иуты йеддӕмӕ, ӕппынкъаддӕр дыууӕ раны кӕй ис сӕ кой. Уыцы стихтӕ кӕрӕдзиимӕ лӕмбынӕг куы барай ӕмӕ сӕм цы фиппаинӕгтӕ ис, уыдон куы иртасай, уӕд фендзынӕ, Библийы 66 чиныджы кӕрӕдзийыл баст кӕй сты ӕмӕ зӕгъӕн кӕй ис, ӕмӕ иууылдӕр иумӕ сты иу чиныг, Хуыцауы фӕндӕй фыст чи ’рцыд, уыцы чиныг.

Фӕлгӕты амынд стихтӕ кӕцӕй ист сты, уыцы чингуыты нӕмттӕ фыст сты цыбыртӕй. Тексты мидӕг дзырдты сӕрмӕ цы дамгъӕтӕ ис, уыдонмӕ гӕсгӕ фӕлгӕты ссарӕн ис уыцы дзырд кӕнӕ хъуыды ӕмбарынгӕнӕг стихтӕ. Стихтӕ се ’ппӕт дӕр астӕуӕй фӕлгӕты кӕм нӕ бацыдысты, уым сӕ иннӕ хай фыст ӕрцыд, сыфӕн йӕ рахиз фарс цы текст ис, уый бынмӕ. Фӕлгӕты амынд сты чингуыты сӕртӕ дӕр.

Фӕлгӕты фыст стихтӕ амонынц ӕмхуызон хъуыдытӕм, цаутӕм, кӕцыдӕр адӕймагӕн йӕ царды хабӕрттӕм, цавӕрдӕр зӕххытӕ ӕмӕ бынӕттӕм, афтӕ ма, пехуымпар-ныхӕстӕ куыд сӕххӕст сты, уый Библи йӕхӕдӕг куыд ӕвдисы, уымӕ дӕр. Амонынц ма, кӕцыдӕр хъуыдыйӕдтӕ, дзырдбӕстытӕ ӕмӕ ӕнӕхъӕн стихтӕ Библийы ноджыдӕр кӕм ӕмбӕлынц, уымӕ; стӕй ма, Моисейы Закъоны бадзырд цы хабӕрттӕм амыдта ӕмӕ уыцы хабӕрттӕ, Чырыстон Грекъаг Фыстытӕм гӕсгӕ, куыд сӕххӕст сты, уымӕ дӕр. Ӕппӕт уыдӕтты фӕрцы адӕймагӕн йӕ бон у Библи ноджы хуыздӕр бамбарын.

ДЗЫРДУАТ. Ацы чиныджы кӕрон ма ис «Дзырдуат» дӕр. Уыцы дзырдуат ӕмбарын кӕны, Библийы цы зынӕмбарӕн ныхӕстӕ ис, уыдонӕй кӕцыдӕртӕ.

ФИППАИНӔГТӔ. Библийы сӕйраг ахуырӕдтимӕ баст чи у, уыцы дзырдтӕй кӕцыдӕртӕм, зӕгъӕм, «уд»-мӕ ӕмӕ «байзӕддаг»-мӕ иуӕй-иу рӕтты лӕууы фиппаинаг, ӕмӕ уый фӕрцы адӕймаг хуыздӕр бамбардзӕн, уыцы дзырдтӕй Библийы фысджытӕ куыд пайда кодтой, уый. Иуӕй-иу фиппаинӕгты та фыст вӕййы ахсджиаг дзырдӕн кӕнӕ дзырдбастӕн йӕ комкоммӕ нысаниуӕг, науӕд ма йӕ ӕндӕрхуызон куыд ис зӕгъӕн, уый. Уыцы фиппаинӕгты фӕрцы хуыздӕр бамбарӕн ис зынӕмбарӕн дзырдтӕ ӕмӕ скъуыддзӕгтӕ, стӕй, Библи цы ӕвзӕгтыл фыст ӕрцыд, уыцы ӕвзӕгты алыхуызон фӕзилӕнтӕ. Фыст ма дзы вӕййы цавӕрдӕр адӕймӕгты ӕмӕ бынӕтты нӕмтты тыххӕй. Цӕмӕй текст ӕнцондӕр ӕмбарӕн уа, уый тыххӕй иуӕй-иу рӕтты фиппаинӕгты фыст ис, тексты цы ӕхца, уӕзбарӕнтӕ ӕмӕ дӕргъбарӕнты кой цӕуы, уыдон нырыккон нымадӕй цас сты, уый. Иуӕй-иу фиппаинӕгты ма фыст ис, кӕс Уӕлӕмх., зӕгъгӕ, цӕмӕй дзы цы Уӕлӕмхасӕн амынд вӕййы, уый бакӕсгӕйӕ адӕймаг цавӕрдӕр хъуыддаг кӕнӕ хабар ноджы бӕлвырддӕр базона ӕ.а.д.

Фиппаинагӕн йӕ нысан фӕлӕууы тексты мидӕг дзырды кӕнӕ дзырдбасты сӕрмӕ. Сӕйраг тексты бынмӕ фиппаинаджы тексты размӕ фӕлӕууы стихы номыр ставд фыстӕй ӕмӕ, сӕйраг тексты цы фиппаинаджы нысан ис, уыцы нысан: ^{*, #, *, *}.

ЦЫБЫРГОНД ДЗЫРДТӔ. Дӕлдӕр ис цыбыргонд дзырдты ӕмбарынгӕнӕн номхыгъд.

аз. ӕв. - азмӕ ӕввахс

арам. - арамейаг

ӕ.а.д. - ӕмӕ афтӕ дарддӕр

ӕвӕц. - ӕвӕццӕгӕн

ӕдӕп. - ӕдӕппӕтӕй

ӕнд. ах. - ӕндӕр ахӕм(тӕ)

бир. ным. - бирӕон нымӕц

г - грамм

грекъ. - грекъагау

дзут. - дзуттагау

иу. ным. - иууон нымӕц

кг - килограмм

км - километр

комк. - комкоммӕ

л - литр

м - метр

мл - миля

н. э. - нӕ эрӕйы

н. э. р. - нӕ эрӕйы размӕ

разн - разныхас

см - сантиметр

ст. - стих

т - тоннӕ

Уӕлӕмх. - Уӕлӕмхасӕн

уырыс. - уырыссагау

ф. - фарс

фип. - фиппаинаг

фф. - фӕрстӕ

КӔРОНБӔТТӔН

2010 азы уагъд «Ног дунейы тӕлмац»-ы алы фарсыл дӕр астӕуӕй фӕлгӕты цы стихтӕ ис, стӕй ма ацы тӕлмацы ноджыдӕр цы ӕрмӕг ис, уый ӕвдисы, Библийы 66 чиныджы кӕрӕдзийыл ӕнгом баст кӕй сты ӕмӕ уыцы чингуытӕй кӕй ис базонӕн рӕстдзинады «сыгъдӕг ӕвзаг» (Софони 3:9). Йегъовӕйы ныхас «тас кӕй уадзы», уыцы адӕм Библи лӕмбынӕг куы иртасой, уӕд ӕй ноджы хуыздӕр ӕмбардзысты (Исай 66:2, 5). Нӕ зӕрдӕ зӕгъы, цӕмӕй ацы тӕлмацӕй чи пайда кӕна, уый рӕстдзинад ноджы бӕлвырддӕр базона ӕмӕ ноджы хуыздӕр бамбара, «Хуыцауы ныхас [кӕй] у удӕгас ӕмӕ дзы [кӕй] ис стыр тых» (Дзуттӕгтӕм 4:12). Амондджын сты, Йегъовӕйы дзаджджын фынгӕй ӕдзух чи хӕры – йӕ удӕгас Ныхасӕй, Библийӕ, йӕхи чи ӕфсады, уыдон (Матфейы 5:3).