Руф

1 Адӕмӕн тӕрхонгӕнджытӕ+ куы уынаффӕ кодтой, уыцы бонты зӕххыл скодта ӕххормаг заман+. Ӕмӕ иу лӕг йӕ ус ӕмӕ йӕ дыууӕ фыртимӕ Вифлеемӕй+, Иудӕйы зӕххӕй, ацыд Моавы зӕхмӕ+, цӕмӕй уал иуцасдӕр уым ацардаид. 2 Уыцы лӕгӕн йӕ ном уыди Елимелех, йӕ усы ном та – Ноемин, йӕ дыууӕ фырты та хуындысты Махлон ӕмӕ Хилеон. Уыдон уыдысты Ефремы+ мыггагӕй, Иудӕйы цы Вифлеем ис, уырдыгӕй. Гъемӕ Моавы зӕхмӕ ӕрцыдысты ӕмӕ уым ӕрцардысты.

3 Иуцасдӕры фӕстӕ Елимелех, Ноемины лӕг, амард, ӕмӕ Ноемин баззад йӕ дыууӕ фыртимӕ. 4 Уӕдмӕ лӕппутӕ моаваг чызджытӕ ракуырдтой+. Иуы ном дзы уыди Орфӕ, иннӕйы ном та – Руф+. Ӕмӕ уым иу-дӕс азы фӕцардысты. 5 Стӕй Махлон ӕмӕ Хилеон дӕр амардысты, ӕмӕ уыцы сылгоймагӕн нал дӕр йӕ дыууӕ хъӕбулы уыдысты, нал дӕр йӕ лӕг. 6 Уӕд сыстад ӕмӕ йӕ чындзытимӕ Моавы зӕххӕй фӕстӕмӕ раздӕхт, уымӕн ӕмӕ ма Моавы зӕххыл куы уыди, уӕд фехъуыста, Йегъовӕ йӕ адӕммӕ+ кӕй ӕркаст ӕмӕ сын хойраг кӕй радта+.

7 Ноемин рацыд, кӕм царди, уырдыгӕй+, ӕмӕ йӕ дыууӕ чындзы дӕр уыдысты йемӕ. Ӕмӕ фӕстӕмӕ Иудӕйы зӕхмӕ иумӕ цыдысты. 8 Ӕмӕ Ноемин йӕ дыууӕ чындзӕн загъта: «Ацӕут, уӕ дыууӕ дӕр уӕ мадӕлты хӕдзармӕ аздӕхут. Йегъовӕ уӕ йе ’нувыд уарзтӕй барӕвдауӕд+, сымах уӕхӕдӕг дӕр, чи амард, уыдоны, стӕй мӕн дӕр уе ’нувыд уарзтӕй куыд рӕвдыдтат, афтӕ+. 9 Йегъовӕ уын ахӕм лӕвар ракӕнӕд+, ӕмӕ уӕ алчидӕр йӕ мойы хӕдзары ӕнцойдзинад+ куыд ссара». Уый фӕстӕ сын апъа кодта+, ӕмӕ уыдон тынг ныккуыдтой. 10 Ӕмӕ йын райдыдтой дзурын: «Нӕ! Мах дӕр демӕ цӕуӕм дӕ адӕммӕ»+. 11 Фӕлӕ сын Ноемин загъта: «Аздӕхут, мӕ чызджытӕ. Цӕмӕн цӕут мемӕ? Исты ма мӕ хуылфы фырттӕ ис, цӕмӕй сӕм смой кӕнат?+ 12 Аздӕхут, мӕ чызджытӕ. Ӕз моймӕ цӕуынӕн ӕгӕр зӕронд дӕн. Ӕниу, афтӕ дӕр куы зӕгъин, нырма мӕ ныфс ис, зӕгъгӕ, ӕмӕ тӕккӕ ахсӕв дӕр лӕгимӕ ӕмуат куы ’рцӕуин ӕмӕ фырттӕ куы ныййарин+, 13 уӕд дӕр, цалынмӕ уыдон сыстыр уой, уӕдмӕ ӕнхъӕлмӕ кӕсиккат? Ӕмӕ уыдоны тыххӕй иунӕгӕй ӕрвитдзыстут уӕ бонтӕ ӕмӕ не смой кӕндзыстут? Нӕ, мӕ чызджытӕ! Куы уыл фӕхъуыды кӕнын, уӕд мӕ зӕрдӕ мастӕй фӕцӕйтоны, Йегъовӕ мӕ ныхмӕ кӕй сси, уый тыххӕй»+.

14 Ӕмӕ та ногӕй хъӕрӕй ныккуыдтой. Стӕй Орфӕ йе ’фсинӕн апъа кодта ӕмӕ ацыд. Руф та йемӕ баззад+. 15 Уӕд ын Ноемин загъта: «Уыныс, дӕ идӕдз файнуст аздӕхт йӕ адӕммӕ ӕмӕ йӕ хуыцӕуттӕм+. Ацу, ды дӕр йемӕ аздӕх»+.

16 Фӕлӕ йын Руф загъта: «Ма мын дзур, цӕмӕй дӕ ныууадзон ӕмӕ фӕстӕмӕ аздӕхон. Ды кӕдӕм ацӕуай, ӕз дӕр уырдӕм ацӕудзынӕн, ӕмӕ ӕхсӕв ды кӕм ӕрлӕууай, уым ӕрлӕудзынӕн ӕз дӕр+. Дӕ адӕм уыдзысты мӕ адӕм дӕр+, ӕмӕ дӕ Хуыцау уыдзӕн мӕ Хуыцау дӕр+. 17 Ды кӕм амӕлай, уым амӕлдзынӕн ӕз дӕр+, ӕмӕ мӕ уым баныгӕндзысты. Йегъовӕйы фыдӕх мӕ баййафӕд+, мӕн дӕуӕй мӕлӕт йеддӕмӕ исты куы фӕхицӕн кӕна, уӕд».

18 Ноемин уый куы федта, ӕмӕ Руф йемӕ цӕуын фидарӕй сфӕнд кодта+, уӕд ын ницыуал загъта. 19 Ӕмӕ афтӕ дыууӕйӕ адарддӕр кодтой сӕ фӕндаг суанг Вифлеемы онг+. Куыддӕр Вифлееммӕ ӕрхӕццӕ сты, афтӕ ӕнӕхъӕн горӕт базмӕлыд+. Сылгоймӕгтӕ дзырдтой: «Ай Ноемин у, ӕви?»+ 20 Фӕлӕ сын Ноемин дзуапп лӕвӕрдта: «Ма мӕ хонут Ноемин*. Хонут мӕ Марӕ*, уымӕн ӕмӕ мын Ӕппӕтхъомысджын+ стыр мӕстытӕ бавзарын кодта+. 21 Ардыгӕй дзагхӕдзарӕй ацыдтӕн+, фӕлӕ мын Йегъовӕ афтӕ бакодта, ӕмӕ фӕстӕмӕ афтидкъухӕй ӕрыздӕхтӕн+. Цӕмӕн ма мӕ хонут Ноемин, Йегъовӕ мӕ куы фегад кодта+ ӕмӕ мӕ Ӕппӕтхъомысджын бӕллӕхы хай куы бакодта, уӕд?»+

22 Афтӕ Ноемин Моавы зӕххӕй+ фӕстӕмӕ ӕрыздӕхт, ӕмӕ йемӕ ӕрцыд йӕ чындз дӕр – моаваг сылгоймаг Руф. Ноемин ӕмӕ Руф Вифлееммӕ+ ӕрцыдысты, хъӕбӕрхор кӕрдыны афон куы райдыдта, уӕд+.

2 Ноеминӕн йӕ лӕджы ’рдыгӕй уыди хион+, тынг хъӕздыг+ адӕймаг, хуынди Вооз+. Елимелехимӕ иу хӕдзарвӕндагӕй уыдысты.

2 Иухатт моаваг Руф Ноеминӕн загъта: «Курын дӕ, ауадз мӕ, ӕмӕ хуымтӕм ацӕуон, ӕмӕ кӕй хорзӕх ссарон, уый фӕстӕ ӕфсиртӕ уидздзынӕн»+. Ноемин ын загъта: «Ацу, мӕ чызг». 3 Уӕд Руф ацыди ӕмӕ, хуымтӕм куы бахӕццӕ, уӕд хуымгӕрдджыты фӕстӕ ӕфсиртӕ уидзын райдыдта+. Ӕмӕ, цы хуымы ӕмбырд кодта, уый разынд, Елимелехы хӕдзарвӕндагӕй+ чи уыд, уыцы Воозы+ хуым. 4 Уыцы афон Вооз Вифлеемӕй ӕрбахӕццӕ ӕмӕ хуымгӕрдджытӕн салам радта: «Йегъовӕ уемӕ уӕд!»+ Уыдон дӕр ын дзуапп радтой: «Йегъовӕ дын раарфӕ кӕнӕд!»+

5 Уый фӕстӕ Вооз+ бафарста, хуымгӕрдджытӕн хистӕрӕй ӕвӕрд чи уыд, уыцы кусӕджы: «Ацы ӕрыгон сылгоймаг кӕй бинонтӕй у?» 6 Ӕмӕ йын, хуымгӕрдджытӕн хистӕрӕй ӕвӕрд чи уыд, уыцы лӕппу дзуапп радта: «Уый, Ноеминимӕ Моавы зӕххӕй+ чи ӕрыздӕхт, уыцы моаваг+ сылгоймаг у. 7 Ӕрбацыд мӕм ӕмӕ мын загъта: „Дӕ хорзӕхӕй, бауадз мӕ, ӕмӕ, хуымгӕрдджыты фӕстӕ цы карст ӕфсиртӕ баззайа, уыдон уидзон“+. Гъемӕ хуыммӕ бацыд ӕмӕ райсомӕй нырмӕ бадгӕ дӕр не ’ркодта, ӕрмӕст мӕнӕ ныртӕккӕ иу гыццыл ӕрбадт халагъуды»+.

8 Уӕд Вооз Руфӕн загъта: «Хъусыс, мӕ чызг? Ӕфсиртӕ уидзынмӕ ӕндӕр хуыммӕ ма ацу+, стӕй ардыгӕй дӕр ма ацу, мӕ лӕггадгӕнӕг-сылгоймӕгтӕм хӕстӕг уидз+. 9 Цы хуымы кӕрдой, уымӕ-иу дӕ цӕст дар ӕмӕ-иу семӕ цу. Ӕз мӕ кусджыты бафӕдзӕхстон, цӕмӕй дӕ мачи бахъыгдара+. Куы сдойны уай, уӕд та-иу уӕртӕ, мигӕнӕнтӕ кӕм сты, уырдӕм бацу ӕмӕ-иу дын мӕ кусджытӕ дон сисдзысты, ӕмӕ-иу бануаз»+.

10 Руф уыцы ныхӕстӕ куы фехъуыста, уӕд йӕ зонгуытыл ӕрхауд, йӕ сӕрӕй йын зӕххы онг акуывта+ ӕмӕ йын загъта: «Цӕмӕй дын ссардтон дӕ хорзӕх, ӕмӕ мӕм дӕ хъус ӕрдарай? Ӕз ӕндӕрбӕстаг куы дӕн»+. 11 Вооз ын дзуапп радта: «Дӕ лӕджы мӕлӕты фӕстӕ+ де ’фсинӕн цы хӕрзты бацыдтӕ, уыдӕттӕ мын иууылдӕр радзырдтой+ – дӕ фыд ӕмӕ дӕ мады куыд ныууагътай, стӕй дӕ райгуырӕн зӕхх дӕр, ӕмӕ, кӕй нӕ зыдтай, уыцы адӕммӕ куыд ӕрцыдтӕ, уыдӕттӕ+. 12 Йегъовӕ дын раарфӕ кӕнӕд, афтӕ кӕй бакодтай, уый тыххӕй+. Ӕмӕ, дӕхи кӕй базыры бын бакӕнынмӕ ӕрцыдтӕ+, уыцы Хуыцау, Израилы Хуыцау Йегъовӕ дын дӕ хорздзинад ӕххӕстӕй бафидӕд»+. 13 Уӕд Руф загъта: «Мӕ буц хицау, дӕ хорзӕх дын цы ссарон, уыцы арфӕ мӕ уӕд. Ды мӕ ӕрсабыр кодтай ӕмӕ мын мӕ зӕрдӕ фӕлмӕн ныхасӕй барӕвдыдтай+, кӕд дӕ лӕггадгӕнӕг-сылгоймӕгтӕй иуы аргъ дӕр нӕ дӕн, уӕддӕр»+.

14 Сихорафон куы ’рхӕццӕ, уӕд ын Вооз загъта: «Рацу ӕмӕ исты ахӕр+, дӕ къӕбӕр-иу туаг сӕны дӕр атул». Руф дӕр ӕрбадти хуымгӕрдджыты фарсмӕ, ӕмӕ йӕм Вооз цӕкуытӕ+ алӕвӕрдта. Руф бахордта, бафсӕсти, ӕмӕ ма йын дзы зайгӕ дӕр бакодта. 15 Стӕй сыстад ӕмӕ та ӕфсиртӕ уидзын райдыдта+. Вооз та йӕ кусджытӕн загъта: «Уадз ӕмӕ карст ӕфсирты ’хсӕн дӕр уидза, ма-иу ӕй фӕхъыг кӕнут+. 16 Куыристӕй дӕр-иу ын фӕхицӕн кӕнут ӕмӕ-иу сӕ фӕуадзут – уадз ӕмӕ сӕ уидза+. Ӕмӕ йӕ ма ӕфхӕрут».

17 Афтӕ Руф суанг изӕрмӕ хуымы ӕфсиртӕ фӕуыгъта+, стӕй, цы ӕрӕмбырд кодта, уый ныххоста+, ӕмӕ йын дзы рацыд ефӕйы*+ бӕрц хъӕбӕрхор. 18 Ӕмӕ йӕ хор райста ӕмӕ горӕтмӕ ацыд, ӕмӕ йе ’фсин федта, цас ӕрӕмбырд кодта, уый. Стӕй Руф систа, сихорӕй ма йӕм цы хӕринаг баззад+, уый, ӕмӕ йӕ йе ’фсинӕн радта.

19 Йе ’фсин ӕй бафарста: «Кӕм уыгътай абон ӕфсиртӕ, кӕм куыстай? Арфӕгонд уӕд, дӕумӕ йӕ хъус чи ӕрдардта, уыцы адӕймаг!»+ Ӕмӕ Руф йе ’фсинӕн радзырдта, кӕмӕ куыста, уый, ӕмӕ загъта: «Абон кӕмӕ куыстон, уыцы адӕймагӕн йӕ ном у Вооз». 20 Уӕд Ноемин йӕ чындзӕн загъта: «Йегъовӕ йын раарфӕ кӕнӕд+, удӕгӕсты дӕр ӕмӕ мӕрдты дӕр+ йе ’нувыд уарзтӕй+ ӕнӕхай кӕй нӕ фӕкодта, уый тыххӕй». Стӕй йӕ ныхасмӕ бафтыдта: «Уыцы адӕймаг нӕ хӕстӕг у+. Ӕмӕ уымӕн ис уый бар, цӕмӕй нӕ балхӕна»+. 21 Моаваг Руф ма загъта: «Афтӕ дӕр ма мын загъта, мӕ кусджыты фарсмӕ, дам, уидз ӕфсиртӕ, цалынмӕ мын мӕ тыллӕг иууылдӕр ӕфснайд нӕ фӕуой, уӕдмӕ»+. 22 Ӕмӕ Ноемин+ йӕ чындз Руфӕн+ загъта: «Гъемӕ тынг хорз, мӕ чызг, ӕгайтма йӕ кусджытимӕ уыдзынӕ, ӕмӕ дӕ ӕндӕр хуымы ничи бафхӕрдзӕн»+.

23 Афтӕ Руф куыста Воозы лӕггадгӕнӕг-сылгоймӕгты фарсмӕ ӕмӕ ӕфсиртӕ уыгъта, цалынмӕ хъӕбӕрхор+ дӕр ӕмӕ мӕнӕу дӕр ӕфснайд нӕ фесты, уӕдмӕ. Ӕмӕ йе ’фсинимӕ иумӕ цардысты+.

3 Иухатт ын йе ’фсин Ноемин загъта: «Мӕ чызг, уӕдта дын, амондджын кӕм уай, ахӕм хӕдзар+ бацагурин? 2 Мӕнӕ Вооз нӕ хӕстӕг нӕу?+ Кӕй лӕггадгӕнӕг-сылгоймӕгтимӕ куыстай, уый кой кӕнын. Абон изӕрӕй найгӕнӕн мусы хъӕбӕрхор дымгӕмӕ дардзӕн+. 3 Гъемӕ дӕхи анай, дӕхи хӕрздӕф сойӕ байсӕрд+, скӕн дӕ уӕлӕдарӕс+ ӕмӕ мусмӕ ацу. Ӕрмӕст, цалынмӕ бахӕра ӕмӕ бануаза, уӕдмӕ йӕм дӕхи ма равдис. 4 Куы схуысса, уӕд дӕ хъус дар, кӕм ӕрхуысдзӕн, уымӕ. Стӕй-иу ӕм бацу, йӕ къӕхтырдыгӕй-иу ын йе ’мбӕрзӕн байгом кӕн ӕмӕ-иу уым ӕрхуысс. Дарддӕр та дын йӕхӕдӕг зӕгъдзӕни, цы кӕнгӕ дын у, уый».

5 Руф ын дзуапп радта: «Куыддӕриддӕр мын загътай, афтӕ бакӕндзынӕн». 6 Гъемӕ мусмӕ ацыди ӕмӕ йын йе ’фсин куыддӕриддӕр бафӕдзӕхста, афтӕ бакодта. 7 Уӕдмӕ Вооз бахордта, банызта ӕмӕ йӕ зӕрдӕ бахъӕлдзӕг+. Стӕй ацыд ӕмӕ хоры кӕрийы раз ӕрхуыссыд. Уӕд Руф сусӕгӕй бацыд, йӕ къӕхтырдыгӕй йын йе ’мбӕрзӕн байгом кодта ӕмӕ уым ӕрхуыссыд. 8 Ӕмбисӕхсӕв Вооз базыр-зыр кодта, рабадт, ӕмӕ дын кӕсы, ӕмӕ йӕ дӕлфӕдтӕм – сылгоймаг! 9 Ӕмӕ йӕ бафарста: «Чи дӕ?» Сылгоймаг ын дзуапп радта: «Ӕз Руф дӕн, дӕ цагъар. Де уазӕг бакӕн* дӕ цагъары, уымӕн ӕмӕ ды нӕ хӕстӕг дӕ ӕмӕ дӕуӕн ис уый бар, цӕмӕй нӕ балхӕнай»+. 10 Уӕд ын Вооз загъта: «Йегъовӕ дын раарфӕ кӕнӕд+, мӕ чызг. Ныртӕккӕ цы ӕнувыд уарзт+ равдыстай, уый, фыццаг+ цы ӕнувыд уарзт равдыстай, уымӕй диссагдӕр у. Ды дӕхицӕн цардӕмбал ӕрыгӕтты ’хсӕн нӕ агуырдтай – нӕдӕр мӕгуырты, нӕдӕр хъӕздгуыты ’хсӕн. 11 Уӕдӕ ма тӕрс, мӕ чызг. Цыдӕриддӕр загътай, ӕппӕт дӕр дын сараздзынӕн+, уымӕн ӕмӕ йӕ мӕ горӕты кулдуары раз алчидӕр зоны, ды диссаджы сылгоймаг кӕй дӕ+. 12 Раст у, уӕ хӕстӕг дӕн ӕмӕ мын ис уый бар, цӕмӕй уӕ балхӕнон+, фӕлӕ ма уын мӕнӕй ӕввахсдӕр хӕстӕг дӕр ис+. 13 Ныр уал ам бахсӕвиуат кӕн. Ӕмӕ райсом фендзыстӕм: кӕд дӕ уыцы адӕймаг балхӕна+, уӕд хорз. Кӕд ӕй нӕ бафӕнда, уӕд та дын удӕгас Хуыцау Йегъовӕйӕ сомы кӕнын+: ӕз дӕ мӕхӕдӕг балхӕндзынӕн. Ныр та уал ардыгӕй райсоммӕ афынӕй кӕн».

14 Ӕмӕ Руф райсоммӕ йӕ дӕлфӕдтӕм фӕхуыссыди ӕмӕ, лӕг лӕджы нӕма равзӕрстаид, афтӕ сыстад. Вооз загъта: «Мусмӕ сылгоймаг кӕй ӕрбацыд, уый хъуамӕ мачи базона»+. 15 Стӕй Руфӕн загъта: «Дӕ кӕлмӕрзӕн-ма ӕрбадар ӕмӕ йыл фӕхӕц». Уый дӕр ӕм йӕ кӕлмӕрзӕн бадардта, ӕмӕ йын дзы Вооз ӕхсӕз барӕн къусы* хъӕбӕрхор ӕркодта, стӕй йын йӕ сисынӕн аххуыс кодта ӕмӕ уый фӕстӕ йӕхӕдӕг горӕтмӕ ацыд.

16 Руф та йе ’фсинмӕ ӕрбаздӕхт. Ӕмӕ йӕ йе ’фсин бафарста: «Уый ды дӕ, мӕ чызг?» Уӕд ын Руф радзырдта, уыцы адӕймаг ын цы сарӕзта, уыдӕттӕ иууылдӕр. 17 Стӕй ма загъта: «Мӕнӕ ма мын ӕхсӕз къусы хъӕбӕрхор дӕр радта, де ’фсинмӕ, дам, афтидкъухӕй ма ацу»+. 18 Уӕд ын Ноемин загъта: «Ныр, мӕ чызг, банхъӕлмӕ кӕс, хъуыддаг цӕуыл ахицӕн уыдзӕн, уымӕ – уыцы адӕймаг ӕнцад не ’рлӕудзӕн, цалынмӕ ацы хъуыддаг абон кӕронмӕ нӕ ахӕццӕ кӕна, уӕдмӕ»+.

4 Вооз та ацыд горӕты кулдуары+ размӕ ӕмӕ уым ӕрбадт. Ӕмӕ кӕсы, ӕмӕ уӕртӕ йӕ рӕзты фӕцӕуы, кӕй кой кодта, уыцы хӕстӕг+. Ӕмӕ уыцы адӕймагмӕ* фӕдзырдта: «Рацу-ма, мӕнӕ-ма ам ӕрбад». Уый дӕр ӕм бацыд ӕмӕ ӕрбадт. 2 Уый фӕстӕ Вооз горӕты хистӕр лӕгтӕй+ дӕс адӕймагмӕ фӕдзырдта ӕмӕ сын загъта: «Мӕнӕ-ма ам ӕрбадут». Ӕмӕ уыдон дӕр ӕрбадтысты.

3 Уӕд Вооз уыцы хӕстӕгӕн+ загъта: «Ноемин Моавы зӕххӕй+ фӕстӕмӕ ӕрыздӕхт ӕмӕ, не ’фсымӕр Елимелехы+ чи уыд, уыцы зӕхх уӕй кӕны. 4 Ӕз ахъуыды кодтон, зӕгъын дын хъуамӕ уыцы хабар фехъусын кӕнон ӕмӕ дын зӕгъон, цӕмӕй йӕ балхӕнай+ горӕты цӕрджыты раз ӕмӕ мӕ адӕмы хистӕр лӕгты раз+. Кӕд дӕ фӕнды, уӕд ӕй балхӕн, кӕд нӕ, уӕд та мын ӕй зӕгъ, цӕмӕй йӕ зонон. Дӕ разӕй йӕ чи балхӕна+, ахӕм нӕй, дӕ фӕстӕ та ӕз дӕн». Ӕмӕ уыцы адӕймаг загъта: «Ӕлхӕнын ӕй»+. 5 Уӕд ын Вооз загъта: «Уыцы зӕхх Ноеминӕй цы бон балхӕнай, уыцы бон ӕй хъуамӕ балхӕнай моаваг Руфӕй дӕр, чи амард, уымӕн йӕ усӕй, цӕмӕй мардӕн йӕ бынтӕ йӕ номыл баззайой»+. 6 Ӕмӕ уӕд уыцы хӕстӕг загъта: «Нӕ, уӕд ӕй мӕ бон нӕу балхӕнын. Афтӕмӕй мӕхи бынтӕй дӕр ӕнӕхай фӕуыдзынӕн! Дӕуӕн дӕттын уыцы зӕхх балхӕныны бар, уымӕн ӕмӕ йӕ мӕнӕн мӕ бон нӕу балхӕнын».

7 Израилы та ӕлхӕнын ӕмӕ ивыны фӕдыл рагӕй фӕстӕмӕ дӕр ахӕм ӕгъдау уыди: куы-иу баныхас кодтой, уӕд-иу адӕймаг йӕ дзабыр+ раласта ӕмӕ-иу ӕй иннӕмӕн радта, ӕмӕ-иу афтӕмӕй бафидыдтой. 8 Уымӕ гӕсгӕ уыцы хӕстӕг Воозӕн афтӕ куы загъта, ды йӕ балхӕн, зӕгъгӕ, уӕд йӕ дзабыр+ раласта. 9 Ӕмӕ Вооз хистӕр лӕгтӕн ӕмӕ ӕппӕт адӕмӕн дӕр загъта: «Абон мын сымах ӕвдисӕн+, Ноеминӕй кӕй ӕлхӕнын Елимелехы исбон иууылдӕр, стӕй Хилеоны ӕмӕ Махлоны исбон дӕр иууылдӕр. 10 Ӕлхӕнын ма моаваг Руфы дӕр, Махлоны усы, мӕхицӕн ӕй курын, цӕмӕй, чи амард, уымӕн+ йӕ бынтӕ йӕхи номыл баззайой ӕмӕ мардӕн йӕ ном ма фесӕфа йе ’фсымӕрты ’хсӕнӕй ӕмӕ йӕ горӕты кулдуары разӕй. Абон сымах стут уымӕн ӕвдисӕнтӕ»+.

11 Уӕд, кулдуары раз чи уыд, уыдон се ’ппӕт дӕр ӕмӕ хистӕр лӕгтӕ дӕр загътой: «Мах стӕм ӕвдисӕнтӕ! Дӕ къӕсӕрӕй цы сылгоймаг бахиза, уый Йегъовӕ Рахил+ ӕмӕ Лийӕйы+ хуызӕн скӕнӕд – уыдон сбирӕ кодтой Израилы+. Ефрафӕйы+ нымад адӕймаг цы уай ӕмӕ дӕ ном Вифлеемы+ зындгонд цы уа, уыцы арфӕ дӕ уӕд! 12 Йегъовӕ дын уыцы ӕрыгон сылгоймагӕй уыйбӕрц цот раттӕд+, ӕмӕ дӕ хӕдзар, Фамар Иудӕйӕн+ кӕй ныййардта, уыцы Фаресы хӕдзары хуызӕн куыд суа!»

13 Гъемӕ Вооз Руфы ракуырдта ӕмӕ йемӕ ӕмуат ӕрцыд. Йегъовӕ Руфӕн раарфӕ кодта, ӕмӕ Руф басывӕрджын+ ӕмӕ ныййардта лӕппу. 14 Сылгоймӕгтӕ Ноеминӕн дзырдтой+: «Табу Йегъовӕйӕн+, дӕу абон ӕнӕ хӕстӕгӕй* чи нӕ ныууагъта. Кадджын уӕд йӕ ном Израилы! 15 Ацы лӕппу дын дӕ зӕрдӕмӕ рухс бауагъта ӕмӕ уыдзӕн дӕ дарӕг дӕ зӕронды бонты+, уымӕн ӕмӕ дын ӕй ныййардта дӕ чындз, чи дӕ уарзы+ ӕмӕ дын авд лӕппуйӕ дӕр хуыздӕр чи у, уый»+. 16 Ноемин сывӕллоны йӕ хъӕбысмӕ райста ӕмӕ сси йӕ хъомылгӕнӕг. 17 Сыхаг сылгоймӕгтӕ+ та йыл ном сӕвӕрдтой ӕмӕ дзырдтой: «Ноеминӕн лӕппу райгуырд». Схуыдтой йӕ Овид*+. Уый у Давидӕн йӕ фыд Йессейы+ фыд.

18 Адон сты Фаресы+ байзӕддӕгтӕ: Фаресӕн райгуырд Есром+, 19 Есромӕн райгуырд Арам, Арамӕн+ райгуырд Аминадав, 20 Аминадавӕн+ райгуырд Наассон+, Наассонӕн райгуырд Салмон, 21 Салмонӕн+ райгуырд Вооз, Воозӕн+ райгуырд Овид, 22 Овидӕн райгуырд Йессей+, Йессейӕн райгуырд Давид+.

[Фиппаинӕгтӕ]