Ileta i Jems
5 Are ri rhiẹ edafe na, are i mọ kerhọ. Are i viẹ ji vwerhoma fọkiẹ ikpokpogho re bru are sa. 2 Efe are i gbon ne, egẹngẹn i ji riẹ ewun are ne. 3 Oro ọrhẹ idọlọ ọfuanfon are i mwu akogba ne, akogba aye no no rhiẹ oseri hasuẹ are, nọ nọ ji riẹ uhwen are. Oborẹ are i kokori nọ nọ họhọ erhanren uvuẹn ẹdẹ ri koba na. 4 Nughe! Osa ihworho ri vuẹn orhọ are, rẹ are i vwe kwe kwa, ọ viẹ phia. Jehova* ro suẹn emakashe na, o rhon oviẹ userhumu ọrẹ ihworho ri vuẹn orhọ are na ne. 5 Are i riakpọ ji ruẹ ojemẹ are uvuẹn otọrakpọ na ne. Are i riẹ emaren ji vwoma ne jerẹ aranmo rọ hẹrhẹ ẹdẹ re ne kpe yi. 6 Are i brorhiẹn kpe ọvwata na jeghwai kpe yi hwu ne. Ọnana yọ soriẹ ọ kparahasuẹ are.
7 Omarana imizu, are i gbe rhe vwo erhionrin hẹrhẹ ọke Ọrovwori na ọnọ ghwẹrioma rhe. Nughe! Ọghwẹrẹ na ọ hẹrhẹ emamọ irhorhomu ọrẹ otọrakpọ na. Omarana, no vwo erhionrin hẹrhiẹ bọmọke oso ọrukaro ọrhẹ oso rọ kẹta ọnọ ki rhọ. 8 Are i ji vwo erhionrin, are i ruẹ ọmudu are gbanhon, fọkime ọke Ọrovwori na ọnọ ghwẹrioma rhe o tikẹrẹ ne.
9 Imizu, are i vwe brenu kpahen owuowọnwa-an, na ja rha ha are guẹnzọn. Nughe! Oguẹnzọn na o mevi anurẹsẹ na ne. 10 Imizu, are i hẹrokele udje emẹraro na ri tẹmro rhẹ odẹ i Jehova,* aye i rioja ekwakwa ibiobiomu ji vwo erhionrin. 11 Nughe! Ame ina sabu ta taghene ihworho ri vwo edirin, i vwo omamerhomẹ.* Are i rhon kpahen oborẹ i Job o vwo edirin lele ọrhẹ ebrurhọ ri Jehova* ọ yẹriẹ, are i ji mẹriẹnvwrurhe ne taghene i Jehova* o vwo ẹgwọlọ okokodo* ọrhẹ arodọmẹ.
12 Ọrọ mai ghanren imizu mẹ, are i vwe dumirhonri-in, are i vwa ha odjuwu yanghene otọrakpọ na yanghene emru ọrọrọ dumirhonri-in. Ọrẹn, jenẹ ẹmro are “Ee” no rhiẹ ee, nẹ “Ẹjo” are o rhiẹ ẹjo, neneyo a ja rha ha are guẹnzọn.
13 O vwo ohworho akpọ ọ bẹn uvwre are? Jenẹ ọrhọ nẹrhomo. O vwo ohworho oma ọ merhan? Jenọ so ijoro ujiri. 14 O vwo ohworho ro kpomẹ uvwre are? Jeno se ekpako ukoko na nẹ aye i nẹrhomo hariẹn. Jenẹ aye i ha emri olivi lerhie uvuẹn odẹ i Jehova.* 15 Ẹrhomo rẹ aye i nẹren rhẹ esegburhomẹmro na nọ nọ lẹrhẹ oma ohworho ro kpomẹ na* gbanhon, Jehova* nọ nọ kpariẹ vẹnrẹn. Habaye, orhianẹ o ruẹ ọdandan bi, na na harhomie.
16 Omarana, are i rha rhian edandan are rẹn owuowọnwan, nẹ are i rha nẹrhomo rẹn owuowọnwan, neneyo a sabu simi are. Ẹrhomo ohworho ọvwata ro nẹ ẹhẹn rhe, o vwo omẹgbanhon omamọ.* 17 Ẹlaijah ohworho jerẹ ọwan, ọrẹn ọke rọ nẹrhomo nẹ ẹhẹn rhe nẹ oso ọ jọ rhọ rhọ, oso ọ rhọ uvuẹn otọre na ẹgbukpe esa gbẹ ibiamo erha-an. 18 Ọke oru, nọ rharhumu nẹrhomo, oso nọ rhọ nẹ odjuwu rhe, ewawọ ni mwu nẹ otọre na rhe.
19 Imizu, orhianẹ o vwo ohworho ro beghe nẹ urhomẹmro na, ọrẹn ọwọrọ nọ ha userhumu riẹn ghwẹrioma rhe, 20 are i gbe rhe taghene kohworho kohworho rọ ha userhumu rẹn oruọdandan tiobọnu ọdandan ọnẹyen, ono simie* nẹ uhwu, Osolobrugwẹ nọ nọ harhomu edandan buebun ọrẹ oruọdandan na.