Ileta i Jems
4 Me yọ suẹ ẹghwọ* ọrhẹ owọnren uvwre are? Rhẹ ojemẹ ugboma are ro lele are wọnrọn* yọ suiẹ? 2 Are i gwọlọ vwo emru, ọrẹn o vwo te are obọ-ọ. Are e dozighẹ ji vwo ufiuphele kpahen ekwakwa awọrọ, ọrẹn are i vwa sabu vwo ekwakwa na-a. Are a wọnrọn jeghwai fiupheri. Are i vwa sabu vwo ekwakwa are i gwọlọre-e, fọkime are i vwa nọ-ọ. 3 Are i rha tobọ nọ, o vwo te are obọ-ọ, fọkime are a nekpẹn yen fọkiẹ iroro rọ sọre, neneyo are i haye hẹrote edamẹ ugboma are.
4 Era ghwọwe* na, are e rhe taghene eri ha akpọ na mwu ugbehian, a ha oma aye ruẹ evwreghrẹn Osolobrugwẹ? Omarana, kohworho kohworho rọ gwọlọ rhiẹ ugbehian akpọ na, ọ ha omayen ruẹ ọvwreghrẹn Osolobrugwẹ. 5 Gbinẹ are i rorori taghene eyaya ọfuanfon na o ghemeghe ta taghene: “Ẹhẹn rọ ha uvuẹn ugboma ọwan o vwo omẹriọ ọgbogbanhon”? 6 Ọrẹn, ẹghẹlẹ esiri rode rẹ Osolobrugwẹ o tiobọnẹ yọ maido. Omarana, nọ tare: “Osolobrugwẹ ọ hasuẹ era kparoma, ọrẹn o tiobọnẹ ẹghẹlẹ esiri rode rẹn eri vwo omeriotọre.”
7 Omarana, are i homariotọre rẹn Osolobrugwẹ, ọrẹn are i kparehaso i Dẹbolo, ọye nọ nọ zẹ jẹ are vwo. 8 Are i tikẹrẹ Osolobrugwẹ, ọye no no tikẹrẹ are. Are i ghwe abọ fon, are ri rhiẹ iruedandan na. Are i ruẹ ọmudu are fon, are ri vwo ẹhẹn eveva na. 9 Are i vwerhoma, mwuomarhọ ji viẹ. Jenẹ echẹẹ are o wene rhiẹ omemwurhọ, nẹ aghọghọ are o wene rhiẹ omevwerhe. 10 Are i homariotọre rẹn i Jehova,* ọye nọ nọ kparẹ are rierun.
11 Imizu, are i vwa tẹmro hasuẹ owuowọnwa-an. Kohworho kohworho rọ tẹmro hasuẹ omizie, yanghene ha omizie guẹnzọn, ọ tẹmro hasuẹ urhi ji ha urhi na guẹnzọn. Vwana, are i rha ha urhi na guẹnzọn, nọyẹ are i vwa nyalele urhi na-a, ukpomaran are nẹ iguẹnzọn. 12 Ọrojurhi ọrhẹ Oguẹnzọn owu ọvo yọ havwiẹ, ọye yọ sabu simi arhọ ihworho ji ghwọghọ aye. Ọrẹn, wẹwẹ ọrọmo wu na ha ọreva guẹnzọn?
13 Are i kerhọ, are ra ta taghene: “Inyenana yanghene odẹrọsa, ame ine riẹ amwa ọnana ji rhirhiẹ avwaye ẹgbukpe owu, ame ina sueyi ji mẹrẹn erere.” 14 Ọrẹn, are e rhe oborẹ akpenyerẹn are ono rhirhiẹ odẹrọsa na-a. Fọkime are i họhọ evwri rọ homaphia ibiọke, orho ru nọ ramiẹn. 15 Ukpomaran, o fori nẹ are i ta: “Orho rhiẹ ọhọre i Jehova,* ame ine nyerẹn ji ruẹ ọnana yanghene ruẹ ọrana.” 16 Ọrẹn vwana, are na kparoma ji yenyan. Aruẹ omẹyan erana ephian i sọre omamọ. 17 Omarana, orhianẹ ohworho o rhe oborẹ orhomurun, ọrẹn o kwe ruie-e, nọyẹ ọravwọ o ruẹ ọdandan ne.