Ileta ra ya Vwe Itu i Kolosi
2 Mi gwọlọre nẹ are i rhe oborẹ mia damoma te fọkiẹ are, ọrhẹ fọkiẹ ihworho ri ha i Laodesia kugbe ọsoso ihworho ri vwa ji mẹren mẹ dẹ.* 2 Neneyo ẹhẹn aye ọ sabu totọre, nẹ ẹgwọlọ o ji mwu aye vwo okugbe. Nẹ aye i ji sabu vwo ebrurhọ fọkiẹ ekwakwa aye i dabu vwẹruọ ye rhẹ imwẹro ọgbogbanhon. Nẹ aye i ji vwo irherhe ọgbagba kpahen odjahen ọfuanfon Osolobrugwẹ, nọyẹ i Kristi na. 3 A dabu tiẹ ọsoso efe ọrẹ ẹghwanren ọrhẹ irherhe nu uvuẹn omayen. 4 Mia tẹmro enana neneyo ohworho owuorowu o jo rho suẹn are vru rhẹ ẹmro ọphiẹrhọ. 5 Dedevwo mẹmẹ ọrhẹ are a havwiẹ ọrẹ ugboma-a, ọrẹn mie roro kpahen are ji ghọghọ ọke mie rhon taghene are a dabu nyalele ẹkwaphiẹrhotọre ji meviẹgbanhan uvuẹn esegburhomẹmro are i vwo kpahen i Kristi na.
6 Omarana, ra mẹriẹn taghene are i rhiabọ dede Ọrovwori Kristi Jesu ne na, are i gba rha nyalelie ọrẹ okugbe. 7 Are i tanghwẹ mwuotọre ji bọn oma are gbanhon uvuẹn i Kristi na, are i mevigbanhon uvuẹn esegburhomẹmro na jerẹ oborẹ e yonirin are. Are i ji rhe dje ekpẹmẹ phia.
8 Are i jomarhotọre nẹ ohworho owuorowu ọ jọ rhọ ha are ruẹ evrẹn nyoma ẹghwanren ọrhẹ iyono ọphiẹrhọ ri sekpahen irueruo ituakpọ kugbe iroro ọrẹ akpọ na, ukperẹ ono rhiẹ ọrẹ i Kristi. 9 Fọkime ọsoso iruemru Osolobrugwẹ i vuọn oma i Kristi na. 10 Omarana, are i me vwo ekwakwa ephian gba ne nyoma yen, ọye yẹ urhomu rẹn ọsoso igọmẹti ọrhẹ omẹgbanhon usun. 11 Fọkiẹ onyerẹnkugbe are i vwori rhẹ ọye, na ji samo are. Ọrẹn, a ha abọ samo are nyoma re tiẹ ugboma ọdandan na nẹ oma are-e. Ukpomaran, a samerẹn are lele oborẹ a samo idibo i Kristi. 12 Fọkime e sinrin are kugbe rhẹ ọye uvuẹn omebrurhame ọnẹyen, fọkiẹ onyerẹnkugbe are i vwori rhẹ ọye, na ji rhọmọ are kugbe nuhwu nyoma esegburhomẹmro are i vwo kpahen ewian igbevwunu Osolobrugwẹ rọ rhọmeriẹn nuhwu na.
13 Habaye, dedevwo are i hwu rhẹ edandan are bi ne ji rhiẹ ihworho ri vwa ji samo, Osolobrugwẹ nọ rhọmerẹn are nuhwu rhẹ i Kristi na. Nọ harhomu edandan ọwan ephian nẹ ẹhẹn rhe 14 ji hionron* ọbe ra ha obọ ya na, rọ vuọnren rhẹ irhi ri hasuẹ ọwan. O tirie notọre nyoma ra kanriẹn mwu orhan oja* na. 15 Ọ nyoma orhan oja ọnana* ban igọmẹti ọrhẹ omẹgbanhon usun sansan firhọ, ji djeyi phia uvuẹn afiede taghene o firi aye kparobọ ne, nọ harẹ aye ludje efikparobọ.
16 Omarana, are i vwe jenẹ ohworho owuorowu ọ ha are guẹnzọn fọkiẹ oborẹ are a ria yanghene oborẹ are a da-a, yanghene fọkiẹ orẹ owuorowu yanghene orẹ ubiamo ọkpokpọ, yanghene orẹ ẹdẹ omeronmo na-a. 17 Erana ephian uhoho ekwakwa ra sa na, ọrẹn ekwakwa erana a rionbọrhọ i Kristi na. 18 Are i vwe jenẹ ohworho owuorowu ro vwo omamerhomẹ kpahen omeriotọre omeru rọ ji ga emakashe, ọ lẹrhẹ osa na va are abọ-ọ. Aruẹ ohworho ọrana “ọ chochọn”* oborẹ o rhiẹromẹrẹn ne. Ọ kparoma ofefe fọkime o vwo iroro ituakpọ ri vwa gba. 19 Ọravwọ ọ vwọ ji sanbọmwu urhomu na-a, rọ yẹ ọsoso ugboma na oborẹ ọ gwọlọre ji mọrọn ọsoso ugboma na kuẹgbe nyoma ẹrhon ọrhẹ irionma. Ọ ji lẹrhiẹ dua riarorhọ fọkiẹ omẹgbanhon ro nẹ obẹ Osolobrugwẹ rhe.
20 Orhianẹ are ọrhẹ i Kristi na i hwu kugbe sekpahen iroro akpọ na, mesoriẹ are e ji nyerẹn kamẹriẹn are i ha usuẹn akpọ na? Are na ji nyalele irhi jerẹ: 21 “Are i vwa haye-e, are i vwa damiẹ-ẹ, yanghene are i vwa hobọte yi-i.” 22 Ekwakwa enana e notọre arha ha aye ruiruo hin, aye i ji nẹ ekama ọrhẹ iyono ituakpọ rhe. 23 Dedevwo, irhi erana i họhọ emru ẹghwanren, ọrẹn aye i vwa ha userhumu rẹn ohworho wọnrọn hasuẹ ojemẹ ugboma na-a. Fọkime ituakpọ ọvo a djẹ oborẹ aye ina ga Osolobrugwẹ lele, aye e dje omeriotọre omeru phia ji ha oja riẹ ugboma aye.