Ileta ra ya Vwe Itu i Kolosi
1 Pọl ro rhiẹ ọnyikọ i Kristi Jesu nyoma ọhọre Osolobrugwẹ ọrhẹ Timoti ro rhiẹ omizu ọwan. 2 Mia ya ileta ọnana vwe ihworho efuanfon na ọrhẹ imizu ra fuephan ri ji vwo okugbe rhẹ i Kristi uvuẹn i Kolosi:
Jenẹ Osolobrugwẹ ro rhiẹ Ọsẹ ọwan o tiobọnu ẹghẹlẹ esiri rode ọrhẹ ufuoma rẹn are.
3 Ame a kpẹmẹ Osolobrugwẹ ọke ephian ro rhiẹ Ọsẹ Ọrovwori ọwan Jesu Kristi, ọke ame a nẹrhomo rẹn are. 4 Fọkime ame i rhon kpahen esegburhomẹmro are i vwo kpahen i Kristi Jesu ọrhẹ ẹgwọlọ are i vwo kpahen ihworho efuanfon na ephian, 5 fọkiẹ ifiẹrorhọ ra sẹroriẹ rẹn are obẹ idjuwu na. Are i kiki rhon kpahen ifiẹrorhọ ọnana ọke e ghwoghwo iyẹnrẹn esiri ọrẹ urhomẹmro na 6 rẹn are. Jerẹ oborẹ iyẹnrẹn esiri na ọ mọ emamọ ji kerabọ uvuẹn ọsoso akpọ na, omaran ọ ji phia uvwre are nẹ ẹdẹ are e rhon ji vwo irherhe ọgbagba kpahen urhomẹmro ọrẹ ẹghẹlẹ esiri rode Osolobrugwẹ. 7 Ọnana yẹ oborẹ are i yono mie Ẹpafras ro rhiẹ omizu ame i vwo ẹgwọlọ kpahen, ro rhiẹ odibo i Kristi rọ fuephan wian owian ro fori nẹ ame i wian bi. 8 Ọ ji ta rẹn ame kpahen ẹgwọlọ rẹ ẹhẹn ọfuanfon na o mwu are djephia.*
9 Ọnana yọ soriẹ, nẹ ẹdẹ ame e rhon kpahen ekwakwa enana, ame na nẹrhomo rẹn are ji rẹ Osolobrugwẹ taghene ọ yẹ are irherhe rọ gbare sekpahen ọhọre ọnẹyen ọrhẹ obọdẹn ẹghwanren, nẹ ẹhẹn ọfuanfon na o ji mwu are vwẹruọ ekwakwa ephian. 10 Neneyo are i sabu nyerakpọ are izede ro fori rẹn era ga i Jehova,* nẹ are i dabu lẹrhẹ oma merhiẹn nyoma are ina wian emamọ ewian ji rhe ruẹ riaro uvuẹn irherhe ọgbagba are i vwo kpahen Osolobrugwẹ. 11 Jenẹ Osolobrugwẹ ọ yẹ are omẹgbanhon nẹ usuẹn omẹgbanhon rode ọnẹyen, neneyo are i sabu diẹn ebẹnbẹn rhẹ erhionrin kugbe aghọghọ. 12 Are i rha kpẹmẹ Ọsẹ na rọ lẹrherẹ are mwuovwan rẹ are ine lele ihworho efuanfon ri ha uvuẹn ude na ghalẹ uku.
13 Osolobrugwẹ o simirin ọwan nẹ omẹgbanhon okuku na, ji kpare ọwan ruẹ uvie Ọmọyen ro vwo ẹgwọlọ kpahen na. 14 Nyoma Ọmọyen yẹ ọwan e vwo ugbomọphẹ nyoma otan na ọrhẹ ẹharhomu edandan ọwan. 15 Ọye yẹ uhoho Osolobrugwẹ ra vwa mẹrẹn na, ọye yẹ ọmọkpako usuẹn ekwakwa ra maren ephian. 16 Nyoma ọmọ na ya ma ekwakwa ri hẹrhẹre ephian obẹ idjuwu ọrhẹ uvuẹn otọrakpọ na, te ekwakwa ra mẹrẹn ọrhẹ ekwakwa ra vwa mẹrẹn, sẹ aye aga usun yanghene usuon yanghene igọmẹti yanghene omẹgbanhon usun. A ma ekwakwa ri hẹrhẹre na ephian nyoma yen, a ji ma aye hariẹn. 17 Habaye, ọ havwiẹ vwẹre bọmọke ekwakwa ri hẹrhẹre na i ki rhirhiẹ ye, nyoma yen yẹ ekwakwa ri hẹrhẹre na ephian e nyerẹn. 18 Ọye yẹ urhomu ugboma na ro rhiẹ ukoko na. Ọye yẹ ọtonrhọ na ọrhẹ ọmọkpako ra rhọmọ nuhwu na, neneyo o rhiẹ ohworho ọrukaro uvuẹn ekwakwa ephian. 19 Fọkime oma ọ merhen Osolobrugwẹ ro no ruẹ ekwakwa ephian gba uvuẹn omayen. 20 Osolobrugwẹ nọ nyoma Ọmọyen kwaphiẹrhọ rhẹ ekwakwa ri hẹrhẹre na ephian, sẹ ekwakwa ri ha otọrakpọ na yanghene ekwakwa ri ha obẹ idjuwu na, no ji vwo ufuoma rhẹ aye nyoma ọbara Ọmọyen ro rhie rhẹ orhan oja* na.
21 Itiọrurhomẹmro, are i serabọ rẹn Osolobrugwẹ ji rhiẹ evwreghrẹn yen bi, fọkime are i fi ẹhẹn kpahen ewian ọkon. 22 Vwana, o mo lele are kwaphiẹrhọ ne nyoma ugboma ọmọyen ro hwuru na, nẹ are i sabu rhiẹ ihworho ri fonron, ihworho ri vabọ upe ọrhẹ ihworho ri vwa riẹ iborhin obaruiẹ. 23 Takpu are i daji uvuẹn esegburhomẹmro na, are i tanbọmwu usimo na ji mevigbanhon. Are i vwe beghe nẹ ifiẹrorhọ ọrẹ iyẹnrẹn esiri na rẹ are i rhonrin, re ji ghwoghwo rẹn ọsoso ihworho ri ha otọre odjuwu na-a. Fọkiẹ iyẹnrẹn esiri ọnana yọ soriẹ mẹmẹ ro rhiẹ i Pọl, e rhiẹ odibo.
24 Vwana, mia ghọghọ uvuẹn ojẹriọ mia ria fọkiẹ are. Mia ji rioja jerẹ i Kristi na, ọrẹn o ji vwo ikpokpogho mi na dẹrughwaroghwu fọkiẹ ugboma i Kristi na ro rhiẹ ukoko na. 25 Mi rhiẹ odibo ọrẹ ukoko ọnana lele owian Osolobrugwẹ o tiobọnu mẹ fọkiẹ erhumu are, ni mi dabu ghwoghwo ẹmro Osolobrugwẹ, 26 nọyẹ odjahen ọfuanfon re tinu rẹn enyerakpọ ọrẹ ahwanren* ọrhẹ ivwiẹ ri vrẹnren na. Ọrẹn vwana, o djerie fiotọre rẹn ihworho efuanfon enẹyen ne. 27 Oma ọ merhen Osolobrugwẹ ro no dje odjahen ọfuanfon na ro rhiẹ obọdẹn efe rẹn ihworho efuanfon ri ha uvwre egbamwa na. Odjahen ọfuanfon ọnana yẹ i Kristi ro vwo okugbe rhẹ are, ọrhẹ ifiẹrorhọ are ine vwo odidi rhẹ ọye. 28 Ọye yẹ ame e ghwoghwo kpahan. Ame a ha orhetio rẹn ihworho ephian ji ha ẹghwanren yono ihworho ephian, neneyo ame i sabu ha userhumu rẹn ihworho ephian ri vwo okugbe rhẹ i Kristi do te edje. 29 Fọkiẹ ọnana yi mia dabu wian gbanhan ji ruẹ ekete omẹgbanhon mẹ o teri rhẹ omẹgbanhon ọnẹyen rọ wian ewian eduado uvuẹn oma mẹ.