Ileta Ọreva ra ya Vwe Itu i Kọrint
8 Vwana imizu, mi gwọlọre nẹ are i rhe kpahen ẹghẹlẹ esiri rode Osolobrugwẹ ro tiobọnu rẹn ikoko ri ha i Masidonia. 2 Uvwrọke aye a rioja edamuni egbogbanhon, aye ni dje uruemru ghwologhwolo* phia nyoma aye e toro itetoro rhẹ aghọghọ, dedevwo aye ivwiegbere obẹta. 3 Fọkime aye i tiobọnu lele oborẹ aye i vwori. Ee, mie se oserie taghene ọ tobọ bun ghwẹ oborẹ aye i vwori. 4 Aye na ha ẹhẹn omobọ aye rẹ ame kọke kọke taghene ame i yẹ aye uphẹn rẹ aye ine toro ghwologhwolo ji vwobọrhọ owian userhumu rẹn ihworho efuanfon na. 5 Aye i tobọ ru ghwẹ oborẹ ame i fiẹrorhọ, fọkime aye i homakpahontọre rẹn Ọrovwori na vwẹre, aye i ki homakpahontọre rẹn ame nyoma ọhọre Osolobrugwẹ. 6 Omarana, ame ni jiririe rẹn i Taitọs taghene ọ wian owian rọ tonrhọ uvwre are na hin, nọyẹ ọrẹ ono koko itetoro are i torori ghwologhwolo na. 7 Omarana, jerẹ oborẹ are a dabu rhe ruẹ uvuẹn i kemru kemru, uvuẹn esegburhomẹmro, uvuẹn ẹmro, uvuẹn irherhe ọrhẹ oruru ọgbogbanhon, kugbe uvuẹn ẹgwọlọ ame i vwo kpahen are, are i ji rhe ruẹ rhọ uvuẹn uruemru re toro ghwologhwolo na.
8 Mi vwa ha ẹmro mẹ je ekama rẹn are-e, ọrẹn mi gwọlọ je are rhe kpahen oruru awọrọ, ni mi ji rhe sẹ ẹgwọlọ are ọrẹ obọdẹn. 9 Fọkime are i rhe kpahen ẹghẹlẹ esiri rode Ọrovwori ọwan Jesu Kristi taghene dedevwo ọye o feri, no rhiẹ ovwiegbere fọkiẹ are, neneyo are i sabu fe nyoma erhirhiẹ ogbere yi.
10 Ọnana yẹ irorẹdjẹ mẹ sekpahen ẹmro ọnana: Ọnọ rhua erere vwe are fọkime o te ẹgbukpe owu ne rẹ are i tuẹn owian ọnana rhọ ne. Are i ji djephia ne taghene are i vwo omwemẹ rẹ are ine ruie. 11 Omarana, are i gba wian owian are i tonrhọ na hin, neneyo are i ha aruẹ omwemẹ are a tuiẹnrhọ na wian yen ye te ẹta lele oborẹ are i vwori. 12 Fọkime omwemẹ na ọrhọ havwiẹ vwẹre, ọrana yọ mai je Osolobrugwẹ, fọkime oborẹ ohworho o vwori yo tiobọnẹ, rhẹ oborẹ o vwo vwo-o. 13 Mia gwọlọ ruẹ ekwakwa lọhọ rẹn awọrọ, ni mi ruie gbanhon rẹn are-e. 14 Ọrẹn, mi gwọlọre nẹ ekwakwa i serhọ ovwan, neneyo oborẹ are i vwo bun ọke ọnana ọ sabu hẹrote edamẹ aye. Habaye, oborẹ aye i vwo bun nọ nọ sabu hẹrote edamẹ are, nẹ ekwakwa ephian i sabu serhọ ovwan. 15 Jerẹ oborẹ a yariẹ rhotọre: “Ohworho ro vwo ekwakwa i buebun, o vwo bun pha-an. Ohworho ro vwo vwo bun, oborẹ o vwori ọ kamu pha-an.”
16 Vwana, ame a kpẹmẹ Osolobrugwẹ taghene ọ lẹrhi Taitọs vwo ọdamẹ okokodo kpahen are jerẹ ame, 17 fọkime ọ nyalele urhebro ame i tiobọnu riẹn. Ọrẹn, fọkime o vwo omwemẹ ọgbogbanhon, ọye ọvo o brorhiẹn ne ro no bru are rhe. 18 Ọrẹn, ame e dje omizu ọhworhare ọrọrọ lelie. Ikoko na ephian e jirie fọkiẹ oborẹ o ruẹ sekpahen iyẹnrẹn esiri na. 19 Haba ọrana, ikoko na yi ji haye mwu no rho lele ame ọke ame a ghalẹ itetoro na rẹn imizu na. Ọnana ọ rhua ujiri vwe Ọrovwori na ji djephia taghene ame i mwuegbe rẹ ame ina ha userhumu phia. 20 Omarana, ame a jomarhotọre neneyo ohworho owuorowu o jo rho brenu kpahen ame sekpahen itetoro ro nẹ ẹhẹn rhe rẹ ame a ghalẹ na. 21 Fọkime ame ‘a fuephan hẹrote i kemru kemru, rhẹ uvuẹn obaro i Jehova* ọvo-o, ọrẹn tobọ te obaro ituakpọ.’
22 Habaye, ame e ji dje omizu ọhworhare ọrọrọ lele aye. Ame i nirien so ne uvuẹn erhirhiẹ sansan, ji mẹriẹn taghene o gbẹro rhotọre uvuẹn erhirhiẹ buebun. Ọrẹn vwana, o gbẹro rhotọre vrẹn ọke bi fọkiẹ ẹruẹhaso ọgbogbanhon ro vwo kpahen are. 23 Orhianẹ are e vwo ẹhẹn eveva kpahen i Taitọs, ọye ugbehian mẹ ro ji leli mẹ wian fọkiẹ erhumu are. Orhianẹ are e vwo ẹhẹn eveva kpahen imizu na, aye inyikọ uvuẹn ikoko na ra ha ujiri vwe i Kristi. 24 Omarana, are i gbe djephia taghene are i vwo ẹgwọlọ kpahen aye, ji dje rẹn ikoko na oborẹ ọsoriẹ ame a ha are yenyan.