Ileta Ọreva ra ya Vwe Itu i Kọrint
7 Omarana imizu mi vwo ẹgwọlọ kpahen, ra mẹriẹn taghene e vive enana rẹn ọwan ne na, jene ruẹ oma ọwan fon nẹ ekwakwa ri na sabu gbe ugboma na ọrhẹ ẹhẹn na aghwa, ne rhiẹ ihworho ri dabu fon ra zofẹn Osolobrugwẹ.
2 Are i rhie ọmudu are firhọ rẹn ame. Ame e ruẹ ohworho owuorowu sọ-ọ, ame e biomu ohworho owuorowu-u, ame a ji ghwa ohworho owuorowu re-e. 3 Mi vwa tẹmro enana ni mi brorhiẹn kpe are-e. Fọkime mi tariẹ bi ne taghene are i ha uvuẹn ọmudu ame, nẹ ọwan i hwu kugbe ji nyerẹn kugbe. 4 Mi vwo ugbomọphẹ rode mi ne lele are tẹmro. Mia ha are yenyan omamọ. Mi mẹrẹn obọdẹn urhebro ne, mi ji vwo aghọghọ rode udabọ ojẹriọ ame ephian.
5 Itiọrurhomẹmro, ọke ame e te i Masidonia, oma o fun ame kakaka-a.* Ọrẹn, ame na rioja ọrẹ kizede kizede, fọkime o vwo owọnren uvuẹn otafe, ofẹn ọ ji ha uvwre ame. 6 Ọrẹn, Osolobrugwẹ rọ ha urhebro rẹn erẹ ẹhẹn aye o seriotọre, nọ ha urhebro rẹn ame nyoma ẹrhiọ i Taitọs. 7 Ọrẹn, rhi fọkiẹ ẹrhiọ ye ọvo-o, ukpomaran ame i ji mẹrẹn urhebro fọkime are i bọnriẹn gbanhon. Ọ ji nẹ iyẹnrẹn rẹn ame kpahen omwemẹ are i vwori rẹ are ina mẹren mẹ, omemwurhọ okokodo are, ọrhẹ ọdamẹ okokodo* are i vwo kpahen mẹ. Omarana, oma nọ dabu merhen mẹ rhọ.
8 Ọrhọ tobọ rhianẹ mi lẹrherẹ are mwuomarhọ nyoma ileta mẹ, mi vwa vioja ye-e. Ọrhọ tobọ rhianẹ mi vioja ye ọke ukaro (fọkime ileta na ọ lẹrhere are mwuomarhọ ibiọke ọvo), 9 vwana mia ghọghọ, rhi fọkime are i mwuomarhọ ọvo-o, ọrẹn fọkime are i mwuomarhọ te erhirhiẹ are a ghwẹriẹ. Are i mwuomarhọ uvuẹn izede Osolobrugwẹ, omarana ame arha suẹ ẹkuọn owuorowu rẹn are-e. 10 Fọkime omemwurhọ lele izede Osolobrugwẹ, ọ lẹrhẹ ohworho ghwẹriẹ ji suẹn riẹ usimirhọ, a vwa ji vioja ye-e. Ọrẹn, omemwurhọ ọrẹ akpọ na, o suẹn riẹ uhwu. 11 Are i gbe ni oborẹ omẹdamu are o lele fi ne, fọkime are i mwuomarhọ lele izede Osolobrugwẹ, are i ruẹ oma are fon, are i tuekwẹre kpahen obiobiomu, are i vwo ofẹnzẹ, ojemẹ ọgbogbanhon, oruru, are i ji kpọ oborẹ ọsọre vi! Are i dje oma are rhiẹ ihworho ri fonron* sekpahen ẹmro ọnana uvuẹn erhirhiẹ ephian. 12 Dedevwo mi ya ileta vwe are, mia ya ye fọkiẹ ohworho ro ru sọ na yanghene fọkiẹ ọre ru sọ na-a. Ọrẹn, mi yariẹ neneyo are i djephia uvuẹn obaro Osolobrugwẹ taghene are i vwo omwemẹ are ina kerhọ ame. 13 Ọrana yọ soriẹ udu ame ọ gbanhon.
Ọrẹn, haba uduẹharhaghwẹ ame i vwori, ame i ji ghọghọ maido fọkiẹ aghọghọ i Taitọs o vwori, fọkime are ephian i yẹriẹ urhebro.* 14 Mi harẹ are yenyan rẹn i Taitọs, ọrẹn are a lẹrhẹ ofa ro mẹ-ẹ. Ukpomaran, are ni djephia taghene ọsoso ẹmro mi ha yenyan rẹn i Taitọs urhomẹmro, jerẹ oborẹ ọsoso ẹmro mi ta rẹn are i rhiẹ urhomẹmro. 15 Habaye, ẹgwọlọ okokodo ro vwo kpahen are, ọ gbanhonrhọ ne, ọke rọ karorhọ oborẹ are ephian e ru huphele ọrhẹ oborẹ are i ru rhiabọ dedie rhẹ ofẹn kugbe ighweghwe. 16 Mia ghọghọ fọkime mi na sabu hẹrosuẹ* are uvuẹn i kemru kemru.