Ileta Ọrukaro ra ya Vwe Itu i Kọrint
14 Are i rhe dje ẹgwọlọ phia, ọrẹn are i ji damoma vwo ẹghẹlẹ ri nẹ obẹ Osolobrugwẹ rhe, maido ẹghẹlẹ aruẹmẹrẹn. 2 Fọkime ohworho rọ djẹ edjadjẹ sansan, ọ vwọ tẹmro rẹn ituakpọ-ọ, ukpomaran ọ tẹmro rẹn Osolobrugwẹ. Fọkime o vwo ohworho rọ kerhọ ye-e, ọrẹn ọ tẹmro odjahen ọfuanfon nyoma ẹhẹn ọfuanfon na. 3 Ọrẹn, ohworho rọ mẹraro ọ bọn awọrọ gbanhan, ọ ha urhebro rẹn aye ji bru aye urhe nyoma ẹmro enẹyen. 4 Ohworho rọ djẹ edjadjẹ sansan, ọ bọn omayen ọvo gbanhan, ọrẹn ohworho rọ mẹraro, ọ bọn ukoko na gbanhan. 5 Vwana, mi gwọlọre nẹ are ephian i djẹ edjadjẹ erọrọ, ọrẹn ọrọ nọ mai je mẹ yẹ ọrẹ are ina mẹraro. Itiọrurhomẹmro, ohworho rọ mẹraro ọ do ghwẹ ohworho rọ djẹ edjadjẹ sansan, jokpanẹ ọravwọ ọ rhian edjadjẹ na neneyo ọ sabu bọn ukoko na gbanhon. 6 Ọrẹn imizu, mi rhe bru are rhe ji djẹ edjadjẹ sansan, erere ọgo yẹ are ina mẹrẹn? Ọrẹn, are ina mẹrẹn erere orhianẹ mi tẹmro rẹn are nyoma oghwolophia yanghene irherhe yanghene aruẹmẹrẹn yanghene uyono.
7 Ọ họhọ ekwakwa ri vwe nyerẹn ra ha kporo ikpekporo, jerẹ iflutu yanghene isorogun. Marhẹ ohworho ono ru rhe sẹ iflutu ye kporo yanghene isorogun, orhianẹ e fiẹ ovẹnẹ rhẹ oborẹ e kporo aye lele-e? 8 Fọkime orhianẹ edon ukpori na o fiotọre-e, ọrọmo yo no mwuegbe hẹrhẹ upheri? 9 Omaran ọ ji havwọ, orhianẹ are a ha ẹrẹnmo are tẹmro rẹ ihworho ine kiki vwẹruọ ye-e, marhẹ ohworho ono ru rhe oborẹ are a ta? Itiọrurhomẹmro, are ina rha tẹmro rhẹ aphẹrẹ. 10 O vwo aruẹ edjadjẹ sansan uvuẹn akpọ na, ọrẹn e vwẹruọ aye ephian. 11 Orhianẹ mie vwẹruọ oborẹ ohworho ọ ta-a, ni mi na họhọ ọpha rẹn ọrọ tẹmro na, ọravwọ nọ nọ ji họhọ ọpha ha mẹ. 12 Omaran ọ ji havwọ rẹn are, ra mẹriẹn taghene are i gwọlọ vwo ẹghẹlẹ erẹ ẹhẹn ọfuanfon na, are i gba damoma vwo ẹghẹlẹ ri na bọn ukoko na gbanhon.
13 Omarana, jenẹ ohworho rọ djẹ edjadjẹ sansan, ọ nẹrhomo neneyo ọ sabu rhian edjadjẹ na. 14 Orhianẹ mia nẹrhomo uvuẹn edjadjẹ ọrọrọ, ẹghẹlẹ ọrẹ ẹhẹn ọfuanfon na yo mwu mẹ nẹrhomo na. Ọrẹn, mi vwe vwẹruọ oborẹ mia ta-a. 15 Ni me mi ne ruo? Mi na nẹrhomo nyoma ẹghẹlẹ ọrẹ ẹhẹn ọfuanfon na, ọrẹn mi na ji nẹrhomo ni mi vwẹruọ oborẹ mia ta. Mi na so ijoro ujiri nyoma ẹghẹlẹ ọrẹ ẹhẹn ọfuanfon na, ọrẹn mi na ji so ijoro ujiri uvuẹn edjadjẹ mie vwẹruọ ye. 16 Orhianẹ wa nẹrhomo ekpẹmẹ nyoma ẹghẹlẹ ọrẹ ẹhẹn ọfuanfon na, marhẹ ohworho kpekpa rọ ha uvwre are ono ru ta taghene “Isẹ,” wu rha nẹrhomo hin? Fọkime o rhe oborẹ wa ta-a. 17 Itiọrurhomẹmro, are a kpẹmẹ Osolobrugwẹ uvuẹn izede ro serhọ, ọrẹn ọ vwọ bọn ọwọrọ gbanha-an. 18 Mia kpẹmẹ Osolobrugwẹ taghene edjadjẹ mia djẹ i bun ghwẹ ọrẹ are ephian. 19 Ọrẹn, ono rhomu orhianẹ mi tẹmro isionrin ri mi vwẹruọ ye uvuẹn ukoko na neneyo mi sabu yono awọrọ, ghwẹ ọrẹ mi na tẹmro uriusionrin akwa ikpe uvuẹn edjadjẹ sansan.
20 Imizu, are i vwa họhọ emọvwerhe sekpahen oborẹ are e vwẹruọ emru lele-e, ukpomaran are i họhọ emọvwerhe sekpahen obiobiomu eruo. Are i ji rhiẹ imirẹghwa uvuẹn oborẹ are e vwẹruọ emru lele. 21 A yariẹ rhẹ uvuẹn Urhi na taghene: “‘Mi na tẹmro rẹn ihworho enana rhẹ ẹrẹnmo epha, kugbe evwẹrugbunu epha. Udabọ ọrana, aye i ji kwe kerhọ mẹ-ẹ,’ omaran i Jehova* ọ tare.” 22 Omarana, edjadjẹ rhẹ oka rẹn idibo i Kristi-i, ọrẹn oka rẹn eri vwe rhiẹ idibo i Kristi. Habaye, aruẹmẹrẹn ọ havwiẹ fọkiẹ eri vwe rhiẹ idibo i Kristi-i, ukpomaran ọ havwiẹ fọkiẹ idibo i Kristi. 23 Omarana, orhianẹ ọsoso ukoko na i vwoma uvuẹn ekete owu ji djẹ edjadjẹ sansan, ihworho kpekpa yanghene eri vwe rhiẹ idibo i Kristi i rha ruẹ uvwre are, aye i ta taghene are e kpomorhuẹ? 24 Orhianẹ are ephian a mẹraro, ọrẹn ohworho ro vwo rhiẹ odibo i Kristi yanghene ohworho kpekpa nọ ruẹ uvwre are, nọ nọ ha oborẹ o rhonrin kpọ omayen vi ji ni omayen so. 25 Odjahen ri ha uvuẹn ọmuduie ni ne ghwolophia, te erhirhiẹ ro no se gbughwaro rhotọre ji ha ẹga rẹn Osolobrugwẹ, nọ nọ ta: “Osolobrugwẹ ọ ghini ha uvwre are.”
26 Ni me yẹ are ine ruo imizu mẹ? Are i rha vwoma kugbe, owuọwan ọnọ so ijoro, ọwọrọ ọnọ ha uyono phia, ọwọrọ ọnọ rhian oghwolophia, ọwọrọ ọnọ djẹ edjadjẹ sansan, ọwọrọ ọnọ rhian oborẹ ọ djẹre na. Are i ruẹ ekwakwa ephian ha bọn owuowọnwan gbanhon. 27 Ihworho arha djẹ edjadjẹ sansan, jeno rhiẹ awanva yanghene awansa ọvo orho bun omamọ. Owu ọ ta hin vwẹre nẹ ọreva ye ọ ki ta, habaye ohworho ọnọ vi rhian oborẹ aye i tare na. 28 Ọrẹn, orhianẹ o vwo ohworho rọ nọ rhian otọriẹ-ẹ, ọravwọ ọgbọ fọ uvuẹn ukoko na, nọ tẹmro rẹn omayen ọrhẹ Osolobrugwẹ ọvo. 29 Jenẹ emẹraro awanva yanghene awansa i tẹmro, nẹ eri hẹrhẹre i damoma vwẹruọ oborẹ o mevirhọ. 30 Ọrẹn, orhianẹ Osolobrugwẹ o dje emru rẹn ohworho ro siyẹ avwaye, jenẹ ọrọ tẹmro bi na ọ fọdu. 31 Are ephian ina sabu mẹraro, ọrẹn owu ọ ta hin vwẹre nẹ ọreva ye ọ ki ta, neneyo ihworho ephian i sabu yono ji mẹrẹn uduẹharhaghwẹ. 32 O fori nẹ emẹraro na i suẹn oborẹ aye a ha ẹghẹlẹ erẹ ẹhẹn ọfuanfon na ruiruo lele. 33 Fọkime Osolobrugwẹ rhẹ Osolobrugwẹ ro ruẹ yanghan yangha-an, ukpomaran ọye Osolobrugwẹ ufuoma.
Jerẹ oborẹ ọ havwọ uvuẹn ukoko ihworho efuanfon na, 34 jenẹ emẹse na i fọdu uvuẹn ikoko na, fọkime e kwenu rẹn aye nẹ aye i tẹmro-o. Ukpomaran, jenẹ aye i homariotọre jerẹ oborẹ Urhi na ọ ji ta. 35 Aye i rha gwọlọ yono emru, jenẹ aye i nọ esa aye oboghwa, fọkime emru ophọphọme rẹ ọmase ọnọ tẹmro uvuẹn ukoko na.
36 Obẹ are yẹ ẹmro Osolobrugwẹ ọ tonrhọ? Gbinẹ are ọvo ye tiobọnie riẹn?
37 Ohworho orho roro taghene ọye ọmẹraro yanghene o vwo ẹghẹlẹ ọrẹ ẹhẹn ọfuanfon na, nọyẹ ono vi kwerhọ ye taghene ekwakwa mia ya vwe are na akama Ọrovwori na. 38 Ọrẹn, ohworho ọrhọ djẹ ẹmro enana fughwẹ, ana ji djẹ ọravwọ fughwẹ.* 39 Omarana, imizu mẹ, are i rha damoma mẹraro, ọrẹn are i vwa dobọ edjadjẹ erọrọ ẹdjẹ ji-i. 40 Ọrẹn, jene ruẹ ekwakwa ephian dẹndẹn, ji lele ẹkwaphiẹrhotọre.